كەيكى باتىردىڭ باس سۇيەگىن ەلگە جەتكىزۋ بىرنەشە جىلعا سوزىلىپ كەتۋى ىقتيمال
بۇل تۋرالى بۇگىن حالىقپەن ەسەپتىك كەزدەسۋ وتكىزگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«اپتاسىنا ءبىر مارتە تۇراقتى تۇردە رەسەيگە حات جولداپ وتىرامىن. ءبىزدىڭ وتانداستارىمىز بۇل ىستە بىزگە بوساڭسۋعا مۇمكىندىك بەرمەيدى، بۇل قۋانىشتى جاعداي. مەنىڭشە بۇل ماسەلە جاقىن ۋاقىتتارى شەشىمىن تابادى، رەسەيلىك تاراپ وزدەرىنىڭ كەلىسىمدەرىن بەردى»، - دەيدى مينيستر.
ونىڭ سوزىنە قاراعاندا، كەيكى باتىردىڭ باس سۇيەگىن ەلگە جەتكىزۋ بىرنەشە جىلعا سوزىلىپ كەتۋى ىقتيمال.
«ءبىزدىڭ عالىمدار باس سۇيەكتىڭ قايدا جاتقاندىعىن انىقتادى. الماتىداعى مەملەكەتتىك مۋزەيدىڭ ديرەكتورى باستاعان ەكسپەديتسيا مۇراعاتتاعى قۇجاتتاردى تاپتى. ەندى تەك تەحنيكالىق ماسەلەلەردى شەشۋ عانا قالدى. ول قانشاعا سوزىلاتىنىن ايتۋ قيىن، بىرنەشە جىل بولۋى مۇمكىن. بەلسەندى ارىپتەستىكتىڭ ارقاسىندا ءبىز وزىمىزگە قۇندى جادىگەردىڭ ەلگە ورالۋىنا قول جەتكىزە الامىز دەپ سانايمىن»، - دەدى ا. مۇحامەدي ۇلى.
1916 -جىلى ۇلت- ازاتتىق كوتەرىلىستىڭ داڭقتى قولباسشىلارىنىڭ ءبىرى، اتاقتى مەرگەن كەيكى باتىر ءوز ەلى ءۇشىن باسىن بايگەگە تىككەندىگى بەلگىلى. باتىردى قىزىل اسكەر ايۋاندىقپەن ءولتىرىپ، ەكى قولى مەن باسىن كەسىپ العان. باتىر بابامىزدىڭ باسى ءالى كۇنگە سانكت- پەتەربوردا ساقتاۋلى تۇر. بۇنى ق ر سىرتقى ىستەر مينيسترلىگىنىڭ سۇراۋىنا وراي 1995 -جىلى رەسەي سىرتقى ىستەر مينيسترلىگى دە جاۋاپ حاتىندا راستاعان. ۇلت-ازاتتىق كوتەرىلىستىڭ ءجۇز جىلدىعىنا وراي، باتىردىڭ باسىن قايتارىپ، تۋعان جەرىنە جەرلەۋ ماسەلەسىن ۇكىمەت قولعا الۋدى جوسپارلاپ وتىر.
اۆتور: جاسۇلان جولدىبايەۆ
