بۇل كۇنى قازاق ارحەولوگيا عىلىمىنىڭ نەگىزىن قالاعان كەمال اقىشيەۆ تۋعان
قازاقستاننىڭ ەڭبەك سىڭىرگەن عىلىم قايراتكەرى، گەرمان ارحەولوگيا ينستيتۋتىنىڭ كوررەسپوندەنت- مۇشەسى اقىشەۆ كەمال دۇنيەگە كەلدى.
پاۆلودار وبلىسىنىڭ باياناۋىل كەنتىندە تۋعان. قازاق مەملەكتتىك ۋنيۆەرسيتەتىن بىتىرگەن. 1950-1955 -جىلدارى - قازاق عىلىم اكادەمياسىنىڭ اسپيرانتى، كىشى، اعا عىلىمي قىزمەتكەرى. 1955-1990 -جىلدارى ش. ءۋاليحانوۆ اتىنداعى تاريح، ارحەولوگيا جانە ەتنوگرافيا ينستيتۋتى ارحەولوگيا ءبولىمىنىڭ مەڭگەرۋشىسى قىزمەتىن اتقارعان. 1991 -جىلدان ءا. مارعۇلان اتىنداعى تاريح، ارحەولوگيا جانە ەتنوگرافيا ينستيتۋتىنىڭ ءبولىم مەڭگەرۋشىسى، باس عىلىمي قىزمەتكەرى بولىپ قىزمەت اتقارىپ كەلەدى.
ك. اقىشيەۆ 1954 -جىلدان باستاپ سولتۇستىك، وڭتۇستىك جانە جەتىسۋ ارحەولوگيالىق ەكسپەديتسيالارىن ۇيىمداستىرۋشىسى جانە جەتەكشىسى بولدى. كونە جانە ورتا عاسىرلارداعى قازاقستان ەسكەرتكىشتەرىن، الەمدىك ماڭىزى زور ەسىك وباسىنان تابىلعان «التىن ادام»، بەسشاتىر، وتىرار جادىگەرلەرىن زەرتتەگەن. قولا، ەرتە تەمىر داۋىرلەرىنىڭ مادەنيەتىن كەزەڭدەۋ جانە مەرزىمدەۋ ماسەلەلەرىن انىقتادى. عالىم - كونە قازاقستان تاريحىنىڭ نەگىزگى تۇجىرىمدارىن جاساۋعا بەلسەنە قاتىستى. ورتالىق ازيا وركەنيەتى جۇيەسىندە ەجەلگى قازاقستاننىڭ ورنىن ايقىنداۋعا ەلەۋلى ۇلەس قوستى. ونىڭ 220-عا جۋىق عىلىمي ەڭبەگى، سونىڭ ىشىندە 14 مونوگرافياسى بار.
«پاراسات» وردەنىمەن ماراپاتتالعان.
