ماحابباتتى «شىنىقتىرۋ»: عاشىقتىقتان ءلاززات الا الماي ءجۇرسىز بە؟
ال سۇيىكتىمىزبەن ارامىزداعى سەزىمدى ارتتىرىپ، «سۋپەر» ماحابباتقا قول جەتكىزۋ ءۇشىن نە ىستەۋ كەرەك؟
ءبىز ارەكەت جاساۋدان گورى، قارسى تاراپتىڭ قادام جاساعانىن كۇتۋدى ءجون كورەمىز. الايدا كوڭىلىڭىزدىڭ تۇكپىرىندە ماحابباتىڭىزدى بەرىك ەتۋگە دەگەن نيەت جاتسا، نە سەبەپتى ارەكەت جاساماسقا؟ ولاي بولسا، قول ۇستاسقان عۇمىرلارىن باقىتتى ءارى باياندى ەتكىسى كەلەتىن عاشىقتارعا ارناپ ماحاببات «جاتتىعۋلارىن» ۇسىنامىز.
ءبارىنىڭ نەدەن باستالعانى ەسىڭىزدە مە؟
ءومىر وزەن زىمىراپ اققان سايىن سەزىمىمىز قىلاڭ بەرگەن ساتتە بويىمىزدا سارقىلماستاي كورىنگەن ءتوزىم مەن نازىكتىكتى، تۇسىنىستىك پەن الاۋلاعان سەزىمدى ۇمىت قالدىرىپ جاتامىز. جوق، ولاردى قايتارۋعا ءتيىسسىز. ماحابباتقا تولى كوزدەرىڭىزبەن سۇيىكتىڭىزگە قاراڭىز دا، بارلىعىن تاعى ءبىر ەسكە الىڭىزشى!
قالاۋىڭىزدى جاسىرماڭىز.
سۇيگەن ادامىمىزدىڭ ءوزىمىز جايلى ءبارىن بىلەتىنىنە سەنەتىنىمىز سونشا، ىشىمىزدەگىنى ءسوزسىز ءبىلىپ، ايتىلماعان قالاۋىمىزدىڭ، اشىلماعان سىرىمىزدىڭ ورىندالعانىن كۇتۋگە داعدىلانىپ العانبىز. كۇتكەنىمىز ورىندالماي جاتسا، اراداعى سەزىمنىڭ ءسونىپ، ءبىر- ءبىرىمىزدى تۇسىنۋدەن قالدىق دەگەن سارۋايىمعا سالىناتىنىمىز تاعى بار. الايدا بەيكۇنا پەرىشتەڭىزدى كىنانىڭ استىنا الىپ، سەزىمىنە شەك كەلتىرگەنشە، جاي عانا قالاۋىمىزدى ايتىپ، تىلەگىمىزدى ءبىلدىرۋ - ماسەلەنىڭ شەشىمى ەمەس پە؟
«كۇنىڭ قالاي ءوتتى؟» - دەگەن سۇراق قويماۋعا تىرىسىڭىز.
ادەتكە اينالىپ كەتكەن وسىناۋ قارابايىر سۇراققا «جاقسى، ءوزىڭ شە؟» دەگەن جاۋاپ الاتىنىمىزدى ءبىلىپ تۇرامىز-اۋ. مۇنداي ديالوگ سىزدەردى جاقىنداستىرۋدان بۇرىن، ارالارىڭىزدى اشا ءتۇسۋى مۇمكىن. ونىڭ ورنىنا «جۇمىستا قانداي قىزىقتار بولدى؟»، «جاڭالىقتار وقىدىڭ با؟ بۇگىن قانداي وقيعالار بولدى ەكەن؟» سىندى سۇراقتار قويىپ كورىڭىزشى. اڭگىمەلەرىڭىزدىڭ بىردەن جاراسىپ، قۇشاق ايقاستىرا ءتاتتى ۇيقىعا باتقانشا ءبىراز جايدى تالقىلايتىندارىڭىز انىق.
عاشىقتار - ءبىر- بىرىنە سىنشى.
سۇيىكتىڭىزدىڭ قىزىعۋشىلىعى، ۇناتاتىن زاتتارى جايلى بىلەتىنىڭىز كوپ پە؟ «بىلەتىن شىعارمىننىڭ» اياسىنان جاۋاپ ىزدەمەي، عاشىعىڭىزدان ءار الۋان زاتتار جايلى كوزقاراسىن سۇراپ كورىڭىز. بۇل رەتتە ءار زات جايلى ايتقانداعى كوڭىل- كۇيىنە، كوزىندەگى وتقا نازار سالىپ، بەلگىلەپ العانىڭىز ابزال. ناتيجەسىندە سۇيىكتىڭىزگە نە ۇنايتىنىن ناقتى ءبىلىپ، سىيلىق جاساعىڭىز كەلگەندە ارتىق باس قاتىرمايسىز.
سەكسۋالدى بولا ءبىلىڭىز.
«سەكسۋالدى» ءسوزىن تەك جاتىن بولمەمەن بايلانىستىراتىنىمىز وكىنىشتى، ارينە. ءبىراق مۇندا ءسوز جاتىن بولمەسى ەمەس، كۇندەلىكتى ءومىرىڭىز جايلى. بالكىم، سۇيىكتىڭىزدى ىدىس جۋىپ تۇرىپ اندەتكەنىڭىز ىنتىقتىراتىن شىعار. مۇنداي ۇساق- تۇيەكتىڭ بارلىعىنا نازار اۋدارىپ، ءبىر-ءبىرىڭىزدى نەنىڭ ىنتىقتىراتىنى تۋراسىندا ءسوز قوزعاۋدان ۇيالماڭىز. ەسەسىنە سۇيگەن ادامىڭىزدى جاڭا قىرىنان تاني تۇسەسىز ءارى جاڭا سەرپىن الاسىز. ول سەرپىننىڭ ءلاززاتى دا از ەمەس...
دەمالىسىڭىزعا شىعارماشىلىقپەن قاراڭىز.
ىزدەسەڭىز بولعانى، عالامتور كەڭىستىگىندە «ەستەن كەتپەس دەمالىس سىيلار 10 ورىن»، «شىعىندالۋدى قاجەت ەتپەيتىن تاماشا كەزدەسۋگە ارنالعان 20 سەناريي» سىندى ەرەكشە ويلار جەتكىلىكتى. وعان جانە ءوز قيالىڭىزدى قوسىڭىز. بىرگە فيلم كورىپ، پيتستسا جەۋگە ۋاقىت قاشان دا تابىلادى. ال قيالىڭىزعا ەرىك بەرەتىن رومانتيكالىق كەزدەسۋلەردىڭ اسەرى ەشقاشان دا ۇمىتىلماق ەمەس.
ومىرىڭىزدەگى قيىندىقتار ماحاببات ءلاززاتىنان ايىرماۋى ءتيىس.
ءومىرىڭىز بەن جۇمىسىڭىزداعى قيىندىقتار ماحابباتتى ەكىنشى ورىنعا ىسىرۋعا ماجبۇرلەيدى. سول سەبەپتى سۇيىكتى ادامىڭىزدىڭ جانىندا قيىندىقتار جايلى ەسكە الماعانىڭىز ءجون. اڭگىمە- دۇكەن قۇرىپ، بىرگە وتكىزگەن ءار مينۋتىڭىزدىڭ راحاتىن سەزىنىپ، ورتاق ىستەرىڭىزگە بارىنشا قىزىعۋشىلىق تانىتىڭىز. قيىندىقتار ساناڭىزدى تۇمشالاپ، ومىرىڭىزگە دەندەۋگە قاشان دا ۇلگەرەدى. ءبىراق قيىندىق ءسىزدى ەمەس، قيىندىقتى ءسىز باسقارۋعا ءتيىسسىز.
ۇرىس- كەرىس دەمالىستى تالاپ ەتەدى.
ارالارىڭىزداعى ۇرىس ءورشي تۇسسە، بارماعىڭىزدى شايناتاتىن ارەكەتكە بارماستان بۇرىن اڭگىمەنى ءبىراز ۋاقىتتان سوڭ جالعاسىتۋردى ۇسىنىڭىز. اڭگىمەگە قايتا ورالعانشا ۋاقىت- ەمشى ءبارىن ورنىنا كەلتىرىپ، بويىڭىزدى سەزىم ەمەس، اقىل بيلەمەك. مۇندايدا ماسەلەنىڭ شەشىمى دە وزدىگىنەن تابىلادى.
ىشتەگى سەزىمدى شىعارۋدىڭ ايىبى جوق.
كوبىنە ءبىز ماقۇلداۋ نە اشۋلانۋ سىندى كوڭىل تەڭىزىنىڭ بەتىندە قالقىعان سەزىمدەردى عانا كورسەتەمىز. الايدا سەرىگىڭىزگە ءوزىڭىزدىڭ مۇنداي كۇيگە ءتۇسۋىڭىزدىڭ سەبەبىن تەرەڭىنەن تانىتۋعا تىرىسىڭىز. بالكىم، قۋانتاتىن نە مۇڭايتاتىن جاعداي ورىن العان بولار. بالكىم، ءوزىڭىزدى جاپادان- جالعىز قالعانداي سەزىنەتىن شىعارسىز. وسى سىندى تەرەڭنەن سىر تارتاتىن سەزىمدەر ادامداردىڭ تۇسىنىستىگى مەن قولداۋىنا سەپ بولادى.
كەشىرىم سۇراۋ - كىشىرەيۋ ەمەس.
كەشىرىمنىڭ قارىم- قاتىناستا الار ورنى ەرەكشە. دەسە دە ول شىنايى بولۋى شارت. ارالارىڭىزداعى مۇزدى ءجىبىتۋ ءۇشىن بوي الدىرعان قاتەلىگىڭىزدىڭ شىنايى سەبەبىن ءتۇسىندىرىپ، كەشىرىم سۇراي ءبىلىڭىز. وعان قوسا، بارىنشا شىنايى بولىپ، سوزىڭىزگە وتىرىك ارالاستىرۋدان اۋلاق بولعانىڭىز ءجون. وتىرىكتىڭ ارتىندا ەش قايىر جوق.
Stan.kz
