جاستاردىڭ باسىم بولىگى وندىرىستىك سالا ەمەس، قوعامدىق سالا ماماندىعى بويىنشا وقىپ جاتىر - ءبىلىم جانە عىلىم ءمينيسترى

استانا. قازاقپارات - جاستاردىڭ باسىم بولىگى وندىرىستىك سالا ەمەس، گۋمانيتارلىق سالا ماماندىعى بويىنشا وقىپ جاتىر.

بۇل تۋرالى بۇگىن ماجىلىستە تەگىن تەحنيكالىق جانە كاسىبي ءبىلىم بەرۋ تەتىگىن ەنگىزۋ ماسەلەلەرىنە ارنالعان دوڭگەلەك ۇستەلدە ق ر ءبىلىم جانە عىلىم ءمينيسترى ەرلان ساعاديەۆ ءمالىم ەتتى.

ءمينيستردىڭ كەلتىرگەن دەرەگىنە قاراعاندا، بۇگىنگى كۇنى رەسپۋبليكا بويىنشا 807 كوللەدج جۇمىس ىستەپ تۇرسا، ولاردىڭ 345 ى جەكە مەنشىك نىسانىندا بولىپ تابىلادى. «كوللەدجدەردە 499,5 مىڭ ادام ءبىلىم الۋدا. بۇل رەتتە ونداعى جاستاردىڭ باسىم بولىگى، شامامەن 51,5 پايىزى اقىلى نەگىزدە وقىپ جاتىر. سونىڭ ىشىندە ولاردىڭ نەگىزگى بولىگى وندىرىستىك سالا ەمەس، گۋمانيتارلىق ماماندىقتار بويىنشا ءبىلىم الۋدا»، - دەيدى مينيستر ە. ساعاديەۆ.

ونىڭ سوزىنە قاراعاندا، مەكتەپ تۇلەكتەرىنىڭ جۇمىسپەن قامتىلۋ جاعدايىنا تالداۋ جاسالعان. «بىزدە 2015 -جىلى 9 -سىنىپتى بىتىرگەن تۇلەك سانى 221 مىڭ ادام بولسا، 10-11 -سىنىپتى جالعاستىرعاندار سانى 134 مىڭ، ال كوللەدجدەردە وقۋعا كەتەتىندەر سانى 85 مىڭ ادام بولىپ وتىر. سوسىن كوللەدجدى بىتىرگەننەن كەيىن دە 33 مىڭ ادام سوندا وقۋىن جالعاستىرادى، ولار جوعارى وقۋ ورىندارىنا بارمايدى. ال 21 مىڭ ادام مەكتەپ بىتىرگەنننەن كەيىن ەشقانداي دا ارنايى ءبىلىم الماي، بىردەن ەڭبەك نارىعىنا كەلەدى»، - دەدى ە. ساعاديەۆ.

اۆتور: قانات مامەتقازى ۇلى