الەمدەگى ەڭ بويشاڭ بيكەشتەر - فوتو
سونىسىمەن دە ادام ءومىرى قىزىق ءارى قيىن، قۋانىشتى، كەيدە ءتىپتى قورقىنىشتى. بۇل - تاعدىر.
كەيبىر ارۋلار اياعىنا بيىك وكشەلى اياقكيىم كيىپ، بويىن بىرەر سانتيمەترگە ۇزىن كورسەتكىسى كەلەدى. ال بۇگىنگى ءبىزدىڭ كەيىپكەرلەرىمىز اياقتارىنا وكشەلى اياقكيىم كيگەن ەمەس، ولار ونسىز دا بويشاڭ. ولار - سۇڭعاق بويىمەن رەكوردتار كىتابىنا ەنگەن ارۋلار.
ياو دەفەن - 236 س م
گيننەستىڭ رەكوردتار كىتابىنا الەمدەگى ەڭ بويشاڭ بيكەش رەتىندە ەنگەن ياو دەفەن 40 جاسىندا، 2012 -جىلى ومىردەن ءوتتى. بويى - 236 س م، ال سالماعى - 200 ك گ بولعان ەكەن.
سەندي اللەن - 232 س م
1955 -جىلى تۋىلعان امەريكاندىق سەندي اللەننىڭ بويى 14 جاسىندا 2 مەترگە جەتىپتى. قاتارلاستارىنىڭ جانىندا ءوزىن جايسىز سەزىنگەن ول گيننەستىڭ رەكوردتار كىتابىنا حات جازىپ، ونداعى قىزمەتكەرلەردەن ءوزى سياقتى بويشاڭ اداممەن تانىستىرۋلارىن وتىنگەن ەكەن. وسىلايشا ءوزى دە رەكوردتار كىتابىنا ەنىپتى. سەندي بار ءومىرىن الەم ەلدەرىن شارلاۋمەن وتكىزگەن. 2008 -جىلى 53 جاسىندا كوز جۇمدى.
زەيناب بيبي - 218 س م
بۇگىندە ەڭ بويشاڭ كوزى ءتىرى ايەل ادام 1974 -جىلى پاكىستاندا دۇنيەگە كەلگەن. زەينابتىڭ بويى 13 جاسىندا 2 مەتردەن اسىپتى. تۋعان ولكەسىندەگى ءدىني ۇيىمدار جاس قىزدىڭ ەرەكشە بويشاڭ بولۋىن جاماندىققا جورىپ، ۇنەمى سەس كورسەتۋمەن بولىپتى. بىردە ءتىپتى وعان تاس اتقان ەكەن. سوندىقتان ومىرىنە قاۋىپ ءتوندىرۋشى مۇنداي توپتاردان قۇتىلۋ ءۇشىن زەيناب ۇلى بريتانياعا كوشىپ كەتىپتى. قازىر ول مانچەستەردە ءومىر ءسۇرىپ جاتىر.
مالگوجاتا دۋدەك - 218 س م
ول - وسىناۋ ەرەكشەلىگىنە قاراماستان، ءومىرىن ءماندى دە ءساندى وتكىزگەن وتە بەلسەندى جان. مالگوجاتا 12 جاسىندا ونىڭ ەرەكشە ۇزىن بويى باسكەتبولدا جاقسى ناتيجەگە جەتۋگە كومەكتەسەتىنىن ۇققان. وسىلايشا ول سپورتقا كەلەدى. از ۋاقىتتا پولشانىڭ بۇكىل كلۋبتارىنىڭ جاتتىقتىرۋشىلارى مەن جانكۇيەرلەرىنىڭ كوڭىلىنەن شىعادى. كوپتەگەن جىلدار ول پولشا قۇراما كومانداسىندا وينادى. كەيىن وتباسىمەن اۆسترالياعا قونىس اۋدارىپ، سول جەردە 37 جاسىندا ومىردەن ءوتتى.
گيتيكا شريۆاستاۆا - 211 س م
باسكەتبول اكەسىنىڭ جولىن قۋعان گيتيكا ءۇندىستاننىڭ ۇلتتىق باسكەتبول كومانداسىندا وينايدى. بۇگىندە ونىڭ ءومىرى قاراپايىم ۇندىلىكتەردىڭ ومىرىنەن ەش ەرەكشەلەنبەيدى. ول دا وزگەلەرمەن بىرگە ءتۇرلى قوعامدىق ورىنداردا بوي كورسەتىپ، قارتتارعا قولعابىس ەتەدى. گيتيكا - بويىنداعى ەرەكشەلىككە قاراماستان، قوعامنان اجىراپ قالماۋدىڭ، بەلسەندى ءومىر ءسۇرىپ، وزگەلەرمەن تەڭ بولۋدىڭ ۇلگىسى.
شۆەتلانا سينگح - 210 س م
ول - ءوز بويىن ماقتان تۇتادى جانە ەشكىمنەن كەم ەمەس ەكەنىن جاقسى تۇسىنەتىن ادام. سوندىقتان دا ەل قاتارلى ءومىر ءسۇرۋ ءۇشىن ەشتەڭەدەن باس تارتپايدى. جولداسى ورتا بويلى، «قاراپايىم» بولعانىمەن، ۇلى كاران دا شۆەتلانا سياقتى «سۇيەكتى» بولىپ ءوسىپ كەلەدى. مىنە، گەن دەگەن وسى!
مالي دۋانگدي - 208 س م
تايلاندتىڭ جاس تۇرعىنى دوستارىنىڭ كوپ بولۋىن ارماندايدى. 208 س م بويى مەن 130 ك گ- دەن استام سالماعىنا قاراماستان، ول سونداي ءالسىز ءارى قورعانسىز. بۇگىندە ول تەك دارىلەردىڭ ارقاسىندا امان ءجۇر. ءدارى- دارمەكتى كوپ قابىلداۋدىڭ سالدارىنان كوزى دە كورمەي قالعان ەكەن.
ەۆا بەيبزيللا - 208 س م
كاليفورنيا شتاتىندا دۇنيەگە كەلگەن ەۆا - ەڭ بويشاڭ مودەل. ول كاسىبي فوتوگرافتارمەن جۇمىس ىستەپ، بويشاڭدىعىنا قاراماستان، ەشكىمنەن كەم تۇسپەيتىنىن، ونىڭ دا وزگە مودەلدەر سياقتى كوز تارتار كەلبەتى مەن ءمۇسىنى بارىن بۇكىل ەلگە دالەلدەدى. بۇل - ونىڭ باتىلدىعى.
كەرولاين ۆەلتس - 208 س م
1986 -جىلى بەرلين ماڭىندا دۇنيەگە كەلگەن كەرولاين دا - مودەل. ونىڭ سالماعى - 120 ك گ. ول، وزگە دە ەرەكشە بولمىستى جاندار سياقتى فوتوگرافتار اراسىندا وتە تانىمال. ينتەرنەتتەن كەرولايننىڭ كوپتەگەن سۋرەتتەرىن تابۋعا بولادى.
ەليساني سيلۆا - 206 س م
ينتەرنەت كەڭىستىگىندە برازيليالىق ەليساني مەن ونىڭ جىگىتى فرانچينالدونىڭ سۋرەتتەرى دە تولىپ ءجۇر. فرانچينالدو سۇيىكتىسىنىڭ وزىنەن 43 س م ۇزىن ەكەنىنە ەش قىمسىنبايدى. سوندىقتان دا بولار، ولاردىڭ ەڭ ءساتسىز تۇسكەن سۋرەتتەرىنەن دە ماحاببات پەن قۋانىش بايقالادى.
فوتوگرافتار مەن جۋرناليستەر «سوڭىنان ءتۇسىپ»، قاراپايىم جۇرت تاڭعالا قارايتىن الىپ-ادامداردىڭ عۇمىرى، ادەتتە، تىم قىسقا بولادى. بۇل ەرەكشە دەنە ءبىتىمىنىڭ ار جاعىندا ءتۇرلى اۋرۋلاردىڭ جاتقانى تۇسىنىكتى. باس ميىنىڭ قاتەرلى ىسىگى، گورموندار جۇمىسىنىڭ بۇزىلۋى، ت. ب.. بۇل ەرەكشەلىكتىڭ ءوز قيىندىعى مەن قاۋپى بار.
دايىنداعان: قۇرالاي مۇرات قىزى
دەرەككوز: top-reyting.ru
