ءسابىز شىرىنىنىڭ دەنساۋلىققا پايداسى

نۇر- سۇلتان. قازاقپارات - قازىرگى تاڭدا جۇمىسىمىزدىڭ كوپ بولىگىن كومپيۋتەردىڭ كومەگىمەن اتقارۋعا تۋرا كەلەدى. ال ونىڭ كوزىمىزگە، جالپى دەنساۋلىعىمىزعا زياندى ەكەنى بەلگىلى. سوندىقتان، دارىگەر ماماندار كوزىمىزدى قورعاۋ ءۇشىن ءسابىز شىرىنىن ىشۋگە كەڭەس بەرەدى.

ول ادامنىڭ وپتيكالىق جۇيەسىن جاقسارتادى. ونىڭ قۇرامىنداعى پايدالى ەلەمەنتتەر قان اينالىمدى دا قالىپقا كەلتىرۋگە كومەكتەسەدى. سونىمەن قاتار، جۇرەك- قان تامىر اۋرۋلارى، بۇيرەك، باۋىر اۋرۋلارىنا شالدىققان كەزدە وتە پايدالى. ونى اسقازان ءسولىنىڭ قىشقىلدىعىن تومەندەتۋ ءۇشىن دە تۇتىنادى. كۇنىنە ءبىر رەت 100 م ل- دەن قابىلداڭىز. وعان ءسۇت نەمەسە قايماق قوسىپ ىشۋگە بولادى.

جوتەل كەزىندە.

ءسابىز شىرىنى مەن ءسۇتتى بىردەي كولەمدە ستاقانعا قۇيىپ، كۇنىنە بىرنەشە رەت ءىشىڭىز. ءسۇتتىڭ ورنىنا مايلى كىلەگەي قوسساڭىز دا بولادى. شامامەن 100 م ل شىرىنعا 1 اس قاسىعى جەتكىلىكتى.

سوزىلمالى دەمىكپەگە شالدىقساڭىز.

كۇنىنە 4-6 رەت 1:1:0,2 پروپورتسيادا شىرىن قوسپاسىن قايناعان سۇتپەن جانە بالمەن ارالاستىرىپ ءىشىڭىز. بۇل قوسپانى مىندەتتى تۇردە جىلى كۇيىندە تۇتىنۋىڭىز كەرەك.

اۋىز قۋىسىنىڭ اۋرۋلارىنا، انگيناعا ۇشىراساڭىز تاماعىڭىزدى ءسابىز شىرىنىمەن شايىڭىز.

ءسابىز، قىزىلشا، قيار شىرىنىنىڭ قوسىندىسى ارقىلى باۋىرىڭىزدى ءارتۇرلى اۋرۋدان قورعاي الىسىز. ونى ءوت قابىنا تاس بايلانعان كەزدە دە تۇتىنىڭىز.

ءسابىز سۋسىنىن كۇنىنە 1-2 ليتر ءىشىپ تۇرساڭىز، دەنساۋلىعىڭىزدى ءتۇرلى اۋرۋدان امان الىپ قالاسىز.

massaget.kz پورتالىنان الىندى.