يتاليالىق كومپانيا قازاقستاندىق ەت برەندىن جاساپ، ونى ەۋروپا مەن رەسەيگە ەكسپورتتاۋعا نيەتتى
بۇل تۋرالى بۇگىن پارلامەنت سەناتىندا وتكەن پارلامەنتتىك تىڭداۋ بارىسىندا اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.
ءمينيستردىڭ ايتۋىنشا، قازاقستاننىڭ د س ۇ- نا كىرۋىنە بايلانىستى اۋىل شارۋاشىلىعىنىڭ ەكسپورتقا باعىتتالعان ءوندىرىسىن دامىتۋ ءۇشىن اۋقىمدى مۇمكىندىكتەر تۋادى. بۇدان بولەك، مەملەكەت باسشىسى ەت پەن ءسۇت سالاسىنا ستراتەگيالىق ينۆەستورلار تارتۋ جانە ەت سالاسىنىڭ الەمدىك نارىعىندا كوشباسشى بولىپ تابىلاتىن ءىرى كومپانيالارمەن ەت ەكسپورتىن قامتاماسىز ەتۋدى تاپسىرعان بولاتىن. وسىعان بايلانىستى مينيستر بىرلەسكەن ينۆەستيتسيالىق جوبالاردى قۇرۋ تۋرالى ءبىرقاتار قۇجاتتارعا قول قويىلعانىن اتاپ ءوتتى.
«ماسەلەن، وسىنداي كومپانيالاردىڭ ءبىرى قىتايلىق «Rifa Holding Group» ترانس ۇلتتىق كورپوراتسياسى بولىپ تابىلادى. ول «ەۋرازيا اگروحولدينگ» كومپانياسىمەن بىرىگىپ شىعىس قازاقستان وبلىسىندا ەت كلاستەرىن قۇرۋ جونىندەگى مەموراندۋمعا قول قويدى. سونىمەن قاتار، ەلىمىزدىڭ ءىرى كاسىپورىندارىنىڭ ءبىرى «اكتەپ» ج ش س مەن يتالياندىق «Inalca Eurasia» كومپانياسى رەسپۋبليكانىڭ ءۇش وبلىسىندا جالپى قۋاتى ءبىر ۋاقىتتا 44 مىڭ باستى بورداقىلايتىن بورداقىلاۋ الاڭدارىن سالۋ ءۇشىن تىگىنەن ينتەگراتسيالانعان كومپانيا قۇرۋدى قاراستىرىپ جاتىر. سونداي- اق ەت كومبيناتىنىڭ قۋاتىن 20 مىڭ توننا ەت جانە ەت ونىمدەرىنە ۇلعايتا وتىرىپ، جاڭعىرتۋدى كوزدەيتىن ينۆەستيتسيالىق كەلىسىمگە قول قويىلدى. ينۆەستيتسيا كولەمى 100 ميلليون دوللاردى قۇرايدى. سونداي- اق يتاليالىق كومپانيا قازاقستاندىق ەت برەندىن جاساۋعا جانە ونى ەۋروپا ەلدەرى مەن رەسەيگە ەكسپورتتاۋدى قامتاماسىز ەتۋگە نيەتتى»، - دەپ اتاپ ءوتتى مينيستر.
اۆتور: قانات مامەتقازى ۇلى
