نيگەريا تۋماسى ن. نازاربايەۆقا قازاق تىلىندە ءان سالىپ بەردى
قازاقستاندا 5 جىل تۇرىپ جاتقان ونەرتانۋشى جانە مۋزىكانت دانيەل دجەيمس دانلادي- بۆاي قازاقستان حالقى اسسامبلەياسى كەڭەسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» اتتى XXIV سەسسياسىندا قازاق تىلىندە ءان شىرقاپ بەردى.
«مەنىڭ اكەم نيگەريالىق، انام - ورىس. قازاقستاندا 5 جىل تۇرىپ جاتىرمىن. مەن قازاقستان ازاماتىمىن. ت. جۇرگەنوۆ اتىنداعى ۇلتتىق ونەر اكادەمياسىندا وقيمىن»، - دەدى دانيەل بۆاي.
«نيگەريالىق بىزدە ءالى بولعان ەمەس، تامىرىڭدى وسىندا جاي»، - دەپ قالجىڭدادى ن. نازاربايەۆ. «باستاپ تا كەتتىم»، - دەدى دانيەل قازاق تىلىندە. - قازاقتا «قارا» دەگەن قاسيەتتى ۇعىم بار. توبەدە كوك اسپان، تومەندە قارا جەر بولسا، ونىڭ ۇستىندە بەيبىتشىلىك پەن تاتۋلىقتىڭ قارا شاڭىراعى - قازاقستان! قازاقتار تالاي ۋاقىت بويى تاۋەلسىزدىكتى اڭساپ كەلدى، ءبىراق بۇل ارمانعا ءسىز قول جەتكىزدىڭىز، پرەزيدەنت مىرزا».
«مەن تاڭدانامىن، ەگەر ول قازاقشاعا سۋداي بولسا، قازاقستاندىقتاردىڭ وزدەرىندە قانداي كەدەرگى بار؟»، - دەدى ەلباسى نيگەريالىق «قارا دومالاقتىڭ» قازاقشاسىنا تاڭدانىپ.
دانيەل بۆاي پرەزيدەنتپەن اڭگىمەسىندە بار ءومىرىن ونەرگە ارنايتىندىعىن ايتىپ قالدى. «دومبىرادا وينايمىن، اسابا دا بولام كەيدە. ۇلتتىق اندەردى دە بىلەم، بىرەۋىن ايتىپ بەرەيىن»، - دەپ قولقا سالدى ول.
قازاقستان پرەزيدەنتى نۇرسۇلتان نازاربايەۆقا الماتىدا تۇراتىن نيگەريا تۋماسىنىڭ قازاق تىلىندە ورىنداعان ءانى ۇنادى. سوڭىندا، مەملەكەت باسشىسى دانيەلگە ساتتىلىك تىلەپ، اق باتاسىن بەردى.
اۆتور: جاسۇلان جولدىبايەۆ
