قىزمەتتىك باسپالداقتا ءوسۋ ءۇشىن ءبىر-بىرىنە كومەكتەسكەن باجالار كىمدەر؟

استانا. قازاقپارات - باجا - قازاقتا تۋىسقاندىقتى بىلدىرەتىن ۇعىم. ياعني، اپەكەلى-ءسىڭلىلى قىزداردى العانداردىڭ كۇيەۋلەرى ءبىر-بىرىنە باجا بولىپ كەلەدى.

ولاردىڭ ءبىر-بىرىنە دەگەن قۇرمەتى ەرەكشە.

«بىزدە كەيبىر باجالاردىڭ قىزمەتتىك باسپالداقتا كوتەرىلۋگە دە ءبىر-بىرىنە ىقپالى ءتيىپ جاتادى. سونىمەن، بيلىكتە جۇرگەندەر مەن جالپى تانىمال تۇلعالاردىڭ باجالارى كىم؟»، - دەپ جازادى كوررەسپوندەنت باسىلىمى.

قايرات ءمامي مەن قۇدايبەرگەن ەرجان



قازاقستان رەسپۋبليكاسى جوعارعى سوتىنىڭ ءتوراعاسى قايرات ءمامي 1954-جىلدىڭ 9- مامىرىندا الماتى وبلىسى، جامبىل اۋىلىندا دۇنيەگە كەلگەن. ونىڭ باجاسى ماجىلىسمەن قۇدايبەرگەن ەرجان.

قۇدايبەرگەن تولەپ ۇلى 1959-جىلى وزبەكستان ەلىندە تۋىلعان. تومەنگى پالاتاعا دەپۋتات بولىپ سايلانباي تۇرىپ تالاي جىل وڭتۇستىك قازاقستان وبلىستىق ءماسليحاتىنىڭ حاتشىسى بولعان. بىلەتىندەردىڭ ايتۋىنشا، قوس باجا وزدەرىنىڭ تۋىسقاندىق بايلانىستارىن كوپ ايتا بەرمەيدى.

ءبىراق وسىدان ءبىراز ۋاقىت بۇرىن ءماسليحات حاتشىسىنا قاتىستى تەرىس پىكىرلەر تاراعان ەدى. ءتىپتى ءبىرى ونىڭ ۇستىنەن ءىس قوزعالىپ قالادى-اۋ دەپ بولجام جاساعان-تۇعىن. وسى ارالىقتا شىمكەنتكە جوعارعى سوت ءتوراعاسىنىڭ ءوزى كەلىپ، جيىن وتكىزىپ، باجالىق تۋرالى ايتىپ قالىپتى دەسەدى.

سودان بەرى وڭتۇستىكتەگى جۇرت قۇدايبەرگەن مىرزا تۋرالى اڭگىمە قوزعالسا، بىردەن قايرات ءماميدى ءسوز اراسىنا قوسىپ ءجۇر. ءدال قازىرگى تاڭدا ەكى باجانىڭ قىزمەتتەرى دە، ۇيلەرى دە ءبىر قالادا.

قايرات ءمامي مەن باعلان حالىقوۆ

بىزگە جەتكەن مالىمەتتەرگە سەنسەك، جوعارعى سوت ءتوراعاسىنىڭ تاعى ءبىر باجاسى شىمكەنتتە تۇرادى ەكەن. ول - باعلان حالىقوۆ. وڭتۇستىك قازاقستان وبلىستىق ىشكى ىستەر دەپارتامەنتىنە قاراستى كادر جۇمىسى باسقارماسىنىڭ باسشىسى باعلان انۋاربەك ۇلى 1954-جىلى وڭتۇستىك قازاقستانداعى كيروۆ اۋدانىندا (سول كەزدەگى) دۇنيەگە كەلگەن.

العاشقى ماماندىعى ينجەنەر- قۇرىلىسشى. ودان كەيىن زاڭگەرلىكتى وقىپ العان. ىشكى ىستەر سالاسىندا 1991-جىلدان باستاپ ەڭبەك ەتىپ كەلەدى. باجاسى قايرات ءابدىرازاق ۇلى ورگانداعى قىزمەتىن 1981-جىلى باستاعان. ايتپاقشى، ءتوراعا جارى ماقپال ەكەۋى ەكى قىز، ءبىر ۇل تاربيەلەپ وتىر.

بەيبىت اتامقۇلوۆ پەن نۇرباح رۇستەموۆ

وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ جارى باعيلا ساپاربايەۆانىڭ اپكەسى گۇلميرا قازاقستاننىڭ ۆەنگرياداعى توتەنشە جانە وكىلەتتى ەلشىسى بولعان نۇرباح رۇستەموۆتىڭ جارى. ەستۋىمىزشە، بۇل باجالاردىڭ جۇبايلارى وڭتۇستىك قازاقستان وبلىسى، تولەبي اۋدانىنىڭ تۋمالارى ەكەن.

نۇرباح رۇستەموۆ 1965-جىلى دۇنيەگە كەلگەن. جارى گۇلميرا رۇستەموۆا 1966-جىلعى. ولار ءبىر قىز، ءبىر ۇلدىڭ اتا-اناسى.

نۇرباح تۇرار ۇلى بۇل قىزمەتكە 2013-جىلى تاعايىندالدى.

وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ دا ەلشىلىك ستاجى بار. 2006-جىلى قازاقستاننىڭ رەسەيدەگى ەلشىلىگىنىڭ كەڭەسشى- ەلشىسى، كەيىن يرانداعى كەڭەسشى- ەلشى بولعان. 2010-جىلدان باستاپ قازاقستان رەسپۋبليكاسىنىڭ مالايزياداعى توتەنشە جانە وكىلەتتى ەلشىسى قىزمەتىن اتقاردى. ال 2012-جىلى يندۋستريا جانە جاڭا تەحنولوگيالار مينيسترلىگىنىڭ جاۋاپتى حاتشىسى بولىپ تاعايىندالدى. ايتا كەتەيىك، بەيبىت باكىر ۇلى مالايزيا پرەمەرىمەن قۇدا. ۇلى دياس مالايزيالىق ءاليا گەنەيد ەسىمدى ارۋعا ۇيلەنگەن.

جانبولات پەن مارات سارسەنوۆتەر

بەلگىلى كاسىپكەر جانبولات سارسەنوۆ ءوزىنىڭ تۋعان اعاسىنىڭ بالدىزى ايمانعا ۇيلەنگەن. جانبولاتتىڭ اعاسى مارات سارسەنوۆتىڭ ايەلىنىڭ ەسىمى شولپان. مارات تا بيزنەس تىزگىنىن ۇستاعان ادام. ول قازاقستانداعى ەڭ باي ادامداردىڭ ەلۋلىگىنە كىرگەن. بىلتىر ونىڭ بايلىعى 140 ميلليون ا ق ش دوللارىنا باعالانعانى بەلگىلى.

قىسقاسى، اپالى-ءسىڭلىلى ايمان مەن شولپان ءبىر ءۇيدىڭ ۇلدارىنا تۇرمىسقا شىققان. ياعني، قوس ميلليونەر ءبىر-بىرىنە باجا.