استانانىڭ جاسىل بەلدەۋى ناعىز ورمانعا اينالىپ كەلەدى - فوتو/بەينە
بۇل تۋرالى بۇگىن پرەسس-تۋر بارىسىندا استانا قالالىق تابيعي رەسۋرستار باسقارماسىنىڭ باسشىسى ادىلبەك سارسەمبايەۆ ءمالىم ەتتى.
«بۇگىنگى كۇنى جاسىل بەلدەۋ ناعىز ورمان بولىپ قالىپتاسىپ كەلەدى، ول جابايى اڭداردىڭ دا تىرشىلىك مەكەنىنە اينالىپ وتىر. بۇعان دەيىن ەشتەڭە وسپەگەن، تاقىر دالادا قازىر قىرعاۋىلدار ۇشىپ، قويان مەن تۇلكىلەر جورتا باستادى. ءبىز ولاردىڭ سانىن ارتتىرۋدى باقىلاۋدا ۇستايمىز. جىل سايىن شامامەن 400-500 قىرعاۋىل تۇرلەرى وسى ماڭعا ۇشىرىلۋدا»، - دەدى ول.
ايتا كەتەرلىگى، بۇگىن استانا ماڭىنداعى ورماندى دالاعا 125 قىرعاۋىل، وتكەن اپتادا 875 قىرعاۋىل ۇشىرىلعان. باسقارما باسشىسىنىڭ ايتۋىنشا، جابايى قۇستار، اڭدار ۇدايى باقىلاۋدا بولادى. ال ورمانعا ۇلاسقان اعاشتارعا كەلسەك، ولاردىڭ جاسىل بەلدەۋدە جەرسىنۋى 90 پايىزدى قۇراپ وتىر.
«جاسىل بەلدەۋدە جەمىس اعاشتارىن وتىرعىزۋدىڭ جاڭا تاجىريبەسىن دە قولعا الىپ جاتىرمىز. دەگەنمەن، ءبىر پروبلەما بار: مۇندا كوبەيگەن قوياندار جەمىس اعاشتارىنىڭ تامىرىن قازىپ، سونىمەن قورەكتەنەدى. بۇل ءبىرشاما تەجەگىش فاكتور بولىپ تۇر»، - دەيدى ءا. سارسەمبايەۆ.
اۆتور: قانات مامەتقازى ۇلى
