يران ەكى مىقتى ستراتەگيالىق سەرىكتەس قاراستىرىپ وتىر: ءبىرى - ءۇندىستان، ەكىنشىسى - قازاقستان

استانا. قازاقپارات - يران مەملەكەتى وزىنە ەكى مىقتى ستراتەگيالىق سەرىكتەس قاراستىرىپ وتىر، ونىڭ ءبىرى - ينديا دەپ اشىق ايتتى، ەكىنشىسىن - قازاقستان دەپ بەلگىلەدى.

بۇل تۋرالى بۇگىن ورتالىق كوممۋنيكاتسيالار قىزمەتىنىڭ باسپا ءسوز ماسليحاتىندا قازاقستانداعى مۇناي سەرۆيس كومپانيالار وداعى ءتورالقاسىنىڭ ءتوراعاسى راشيد جاقسىلىقوۆ ءمالىم ەتتى.

«25 جىلدا ترانسۇلتتىق كومپانيالار مەن ينۆەستورلاردىڭ ارقاسىندا ءبىز شەبەرلىگىمىزدى، كاسىبي ماماندارىمىزدىڭ دەڭگەيىن كوتەردىك. قازىر ءوزىمىزدىڭ وتاندا عانا قىزمەت ەتپەي، ءبىلىم مەن ونەرىمىزدى باسقا ەلگە ەكسپورتتاپ جاتىرمىز. مىسالى، تۇركىمەنستان، ازەربايجان، رەسەي، يران ەلدەرى بار. وسى ءتورت مەملەكەتتىڭ ىشىندە بىزگە ەڭ قىزىعى يران مەملەكەتى بولىپ وتىر. قازىر جەتى كومپانيامىز يرانمەن ناقتى كەلىسىمشارتقا وتىرىپ، جۇمىستارىن باستاپ كەتتى. يران مەملەكەتى دامۋ ۇستىندە جانە بۇل جۇمىستاردى جۇرگىزۋگە قارجىلارى دا جەتكىلىكتى»، - دەگەن ر. جاقسىلىقوۆ جۋىردا يراندا وتكەن ىسكەرلىك فورۋم بارىسىندا يران قازاقستاندى ەكى ستراتەگيالىق سەرىكتەسىنىڭ ءبىرى دەپ بەلگىلەگەنىن ءمالىم ەتتى.

«جاقىندا يراندا ىسكەرلەر فورۋمى ءوتتى، وعان ءبىز دە بارىپ قاتىستىق. يران مەملەكەتى وزىنە ەكى مىقتى ستراتەگيالىق سەرىكتەس قاراستىرىپ وتىر، ونىڭ ءبىرى - ءۇندىستان دەپ اشىق ايتتى، ەكىنشىسىن - قازاقستان دەپ بەلگىلەدى. سوندىقتان، بىزبەن قويان- قولتىق جۇمىس ىستەۋ ىڭعايلى بولماق. جانە دە يراننىڭ دا بىزگە بەرەرى وتە مول. بىرىنشىدەن، يران وتىز جىل توڭىرەگىندە مۇنايسىز ءومىر ءسۇرىپ ۇيرەنگەن ەل، بۇرىن مۇنايعا قىزمەت كورسەتكەن كومپانيالار باسقا سالالارعا كەتىپ، قازىردە مەملەكەتىنە قاجەت تاۋارلارىنىڭ 98 پايىزىن وزدەرى ءوندىرىپ وتىر. بۇل - وتە جاقسى كورسەتكىش. ەكىنشىدەن، بىزگە ۇيرەتەتىنى - قالدىقسىز ءونىم شىعارۋ جانە اۋىل شارۋاشىلىعىن يگەرۋ»، - دەپ ءمالىم ەتتى ر. جاقسىلىقوۆ.

اۆتور: كەنجەكەي توقتامۇرات قىزى