الماتىدا « تاڭجارىق جولدى ۇلىنىڭ وقۋلارى» وتەدى
تاۋەلسىزدىكتىڭ 25 جىلدىعىنا وراي وتكىزىلەتىن شارا الاش ۇراندى ادەبيەتتىڭ بەلدى وكىلى، ۇلت قايراتكەرى، اقىن-اعارتۋشى تاڭجارىق جولدى ۇلىنىڭ ءومىرى مەن شىعارماشىلىعىن جاس ۇرپاققا كەڭ كولەمدە ناسيحاتتاۋدى ماقسات ەتەدى، دەپ حابارلادى وسى جوعارى وقۋ ورنىنىڭ باسپا ءسوز قىزمەتى.
تاڭجارىق جولدى ۇلى - الاش يدەياسىن قىتايداعى قازاقتارعا ناسيحاتتاپ، حالىقتى وياتقان قايراتكەر تۇلعا. 1934-1935جىلدار ارالىعىندا قۇلجادا العاش گازەتىن شىعارىپ رەداكتورى بولدى. تۇڭعىش قازاق تەاترىن اشىپ «شۇعانىڭ بەلگىسى» قويىلىمىن قويىپ، ءوزى باستى ءرولدى وينادى.
مەكتەپتەر اشىپ، اعارتۋ ءىسىن جانداندىردى. ۇلتتى وياتقان ءىس-ارەكەتى مەن شىعارمالارى بيلەۋشىلەرگە ۇناماي ەكى مارتە تۇرمەگە قامالدى. ادام ايتقىسىز ازاپتاۋدى كورسە دە مويىماي ءور رۋحتى ولەڭ، تولعاۋ، داستان، اندەر جازدى. دەنى بۇگىنگى ۇرپاققا جەتتى. اقىن شىعارمالارى ارقىلى وتكەن عاسىرداعى قىتايداعى قازاقتاردىڭ ساياسي-الەۋمەتتىك ءومىرى، قيىن-قىستاۋعا تولى تاۋقىمەتتى تاريحى، مادەنيەتى مەن ونەرى تۋرالى ءبىرشاما قۇندى ماعۇلمات الۋعا بولادى. اقىننىڭ ءومىرى مەن ەڭبەكتەرى جايلى كوپتەگەن زەرتتەۋشىلەردىڭ جاقسى پىكىرلەرى بار.
ۇلت قايراتكەرىنىڭ ونەگەلى ءومىرى مەن شابىتتى شىعارماشىلىعىن كەڭ كولەمدە ناسيحاتتاۋ ماقساتىندا «حالىقارالىق تاڭجارىق زەرتتەۋ قوعامدىق قورى» قۇرىلدى. جاستار اراسىندا جىل سايىن ءداستۇرلى تۇردە وتكىزىلەتىن كەزەكتى تاڭجارىق وقۋلارىندا اتالعان قوردىڭ تۇساۋى كەسىلەدى. اقىن ءومىرى مەن ەڭبەكتەرى توڭىرەگىندە ستۋدەنتتەردىڭ كوزقاراسى مەن پىكىرى تىڭدالادى. جاستار اقىن ولەڭدەرىن مانەرلەپ وقىپ، سۇراققا جاۋاپ بەرۋ ارقىلى سىنعا ءتۇسىپ باق سىنايدى. يگى شاراعا ەسىمى ەلگە بەلگىلى ادەبيەتشى، زەرتتەۋشى، اقىن، جازۋشى، جۋرناليستەر جانە وقىتۋشى، ستۋدەنتتەر قاتىسادى. تانىمال انشىلەر تاڭجارىق اندەرى مەن تولعاۋلارىن ورىندايدى.
