قازاقستاندىق دەلەگاتسيا قىتاي مۇراجايلارىنىڭ تاجىريبەسىن زەردەلەۋدە - فوتو
«ساپار ماقساتى - قىتايدىڭ زاماناۋي مۇراجايلارى جانە ەكسپوزيتسيالارىمەن تانىسۋ. ءبىز نازاربايەۆ ورتالىعى، پرەزيدەنت كىتاپحاناسىندا زاماناۋي يننوۆاتسيالىق ادىستەر مەن دەمونستراتسيالىق تەحنولوگيالاردى قولدانعىمىز كەلەدى. ءبىز قىتاي تاجىريبەسىنىڭ ەڭ ۇتىمدىسىن العىمىز كەلەدى، سەبەبى ولار داستۇرلەر مەن بۇگىنگى زاماندى ۇيلەستىرە بىلەدى. ءبىز ساپار ءۇشىن بەيجىڭ، شاڭحاي جانە شيان قالالارىن تاڭدادىق»، - دەدى قازاقپارات تىلشىسىنە بەرگەن سۇحباتىندا ق ر تۇڭعىش پرەزيدەنتى كىتاپحاناسى ديرەكتورىنىڭ ورىنباسارى تيمۋر شايمەرگەنوۆ.
قازاقستاندىق دەلەگاتسيا قىتايدىڭ شەتەلمەن دوستىق بويىنشا حالىقتىق قوعامداستىعىنا (ق ش د ح ق) بارىپ، ونىڭ ءتوراعاسى لي سياولينمەن قازاقستان مەن قىتايدىڭ مادەني-گۋمانيتارلىق سالاداعى ىنتىماقتاستىق ماسەلەلەرىن، سونىڭ ىشىندە 2017-جىلى قازاقستان مەن قىتاي اراسىندا ديپلوماتيالىق قارىم-قاتىناستاردى ورناتۋدىڭ 25 جىلدىعىن مەرەكەلەۋ ماسەلەسىن ورتاعا سالدى. م. قاسىمبەكوۆ لي شياوليندى استاناعا جانە ەكسپو-2017 كورمەسىنە شاقىردى.
ودان كەيىن م. قاسىمبەكوۆ، قازاقستاننىڭ ق ح ر- داعى ەلشىسى شاحرات نۇرىشيەۆ، قازاقستاندىق ديپلوماتتار جانە «جينتاي» مۇراجايىنىڭ قىزمەتكەرلەرىمەن بىرگە بەيجىڭدەگى «چاويان» ورتالىق ساياباعىندا ورنالاسقان اباي ەسكەرتكىشىنە گۇل شوقتارىن قويدى. اتالعان راسىمنەن كەيىن «جينتاي» مۇراجايىنىڭ ديرەكتورى جو حۋا ارنايى قازاقستان قوناقتارى ءۇشىن مۇراجاي بويىنشا ەكسكۋرسيا وتكىزدى.
«ءبىز قازاقستان ەلشىلىگىمەن تىكەلەي قىزمەت ەتىپ، وتە جاقسى قارىم-قاتىناستار ورناتتىق، بىرلەسىپ كوپتەگەن مادەني شارالار - كورمەلەر، «اباي وقۋلارىن» جانە ت. ب. وتكىزەمىز. جىل سايىن ابايدىڭ تۋعان كۇنىن اتاپ وتەمىز، مۇندا قىتايلىق جاستار دا، ق ح ر- دا ءبىلىم الىپ جۇرگەن قازاقستاندىق ستۋدەنتتەر دە كەلىپ جاتادى»، - دەدى قوناقتارعا «جينتاي» مۇراجايىنىڭ ديرەكتورى جو حۋا.
