قازاقستاندىق ايتىسكەر اقىنداردىڭ وتباسى - فوتو
اقىن ەلدىڭ مۇڭى مەن زارىن جىرلاعان. بۇگىندە جۇرت ايتىس اقىندارىن زور ىقىلاسپەن تىڭداپ، قۇرمەتتەيدى. ال اقىندارىمىزدىڭ وتباسى تۋرالى كوپشىلىك بىلە بەرمەيدى. سونىمەن ايتىسكەر اقىنداردىڭ وتباسى جايلى نە بىلەمىز؟
تاۋەلسىز ەل اتانعان سوڭ، قازاق ايتىسىن حالقىمەن قايتا قاۋىشتىرعان ءجۇرسىن ەرمان وسىدان 48 جىل بۇرىن شاڭىراق كوتەرگەن. ءجۇرسىن بويجەتكەن باقىتجامالدى العاش رەت 1966-جىلى ۇلىتاۋ اۋدانىندا جاستاردىڭ كەشكى وتىرىسىندا كورگەن.
قالادان كەلگەن سۇلۋ قىزدى جىگىت بىردەن ۇناتادى. ادەمى قىزدىڭ ءار ءىزىن اڭدىپ، سوڭىندا قىزدىڭ جۇرەگىن جاۋلاپ الادى. 1968-جىلى ەكى جاس ءبىر وتباسى بولۋدى ۇيعارادى. باقىتجامال كوپ جىلدار تەلەديدار ديكتورى بولىپ قىزمەت ىستەگەن. وتباسىندا قىزعالداق، ارداق ەسىمدى قىزدارى مەن دارحان اتتى ۇلدارى بار. ءجۇرسىن مەن باقىتجامال بۇگىندە نەمەرە ءسۇيىپ، شوبەرە كورگەن باقىتتى اتا-اجە.
ايتاقىن بۇلعاقوۆتىڭ جارى - العاشقى ماحابباتى. «ءبىزدىڭ ماحابباتىمىز 8-سىنىپتان باستالدى. مەنىڭ انام ساۋىنشى بولدى. ءجاميلا اپكەسىمەن ءبىزدىڭ اۋىلعا كەلىپ تۇراتىن. ءسويتىپ ءجۇرىپ ءبىر-بىرىمىزبەن ءتىل تابىستىق. سودان بالا كەزدەن باستالعان تۇنىق سەزىمىمىز، قارىم-قاتىناسىمىز سول تۇنىق كۇيىندە كەلە جاتىر. ءبىر جەرگە ءىس-ساپارعا كەتىپ، ءبىر-ءبىرىمىزدى ءبىر اپتا كورمەي قالساق، كادىمگىدەي ساعىنىپ قالامىز. ەندى وتباسى بولعان سوڭ ىدىس-اياق سىلدىرلاماي تۇرمايدى، ارينە. ءبىراق ءارى كەتسە ءبىر ساعاتتان اسپايدى، ءبىر-بىرىمىزگە دەگەن رەنىشىمىز سەيىلىپ، اشۋىمىز تەز تارقاپ كەتەدى. مۇڭىمىز دا، سىرىمىز دا ءبىر بولىپ، وسىلاي تاتۋ-ءتاتتى ءومىر ءسۇرىپ كەلەمىز» - دەدى اقىن.
ايتاقىن مەن ءجاميلا انامىز 2 بالانىڭ اتا-اناسى. ۇلدارى جانداربەك تە اكە جولىن قۋىپ، ايتىستىڭ تۋىن بيىك ۇستاپ جۇرگەندەردىڭ قاتارىندا. جانداربەك تە وتباسىن قۇرىپ، قازىردە ءبىر بالانىڭ اكەسى.
امانجول التايەۆتىڭ جارىنىڭ ەسىمى اقمارال. ەلدىڭ سۇيىكتى اقىنى 14 جىل بىرگە تۇرعان جۇبايىنان ايىرىلىپ قالادى. ول تۋرالى: «ويلاماعان جەردەن قاپيادا جول اپاتىنان ون ءتورت جىل وتاسقان جان جارىم مەن جۇرەگىمنىڭ جارتىسى ءتاپ-ءتاتتى قىزىمنان ايىرىلىپ، قوس قاناتىم قاتار قايىرىلدى. راس، ومىردەن ءتۇڭىلىپ، تىرشىلىكتەن باز كەشىپ كەتەتىندەي كۇندەرىم بولدى. قانشا مىقتى بولعانمەن ادام تەمىر ەمەس ەكەن. سوندا سىنا جازداپ، قايتا تۇرۋىما سەبەپكەر بولعان بالالارىم بولدى.
«ەگەر مەن باسىما تۇسكەن مىنا قايعىنى كوتەرە الماي سىنىپ كەتسەم، ۇشەۋىنىڭ بولاشاعى نە بولادى؟» دەگەن وي ەس جيعىزدى. ولاردى اياعىنان تۇرعىزىپ، ۇيادان ۇشىرىپ، قياعا قوندىرۋ - اكەلىك مىندەتىم. وسىلارعا قارايمىن دا، ءومىر سۇرەم. سول ۇشەۋى ماعان ءۇمىت بەرىپ، تاۋەكەل سىيلايدى.
وسى كۇنگە دەيىن «وسىلاردىڭ الدىندا مەن ءالسىز بولىپ كەتپەۋىم كەرەك» دەگەن قاعيدامەن ءومىر ءسۇرىپ كەلە جاتىرمىن. انالارى ومىردەن وتكەلى مەنىڭ موينىمداعى جۇك ەكى ەسە ەمەس، ون ەسەگە سالماقتانىپ كەتتى. ۇشەۋىنىڭ ۇلكەن جەتىستىككە جەتكەنىن كورسەم، اقمارالدىڭ الدىنداعى پارىزىمدى وتەگەنىم دەپ بىلەم. ول كەزدە مەنەن باقىتتى جان جوق بولار ەدى».
مۇحامەدجان تازابەكوۆتىڭ جۇبايى قازاقستان پارلامەنتى ءماجىلىسىنىڭ دەپۋتاتى بەكبولات تىلەۋحاننىڭ قارىنداسى بولىپ كەلەدى. اقىننىڭ جارى ەڭلىكتى اتا-اناسى الماتىدان قاراعاندىعا كوشىپ كەتەدى دە وقۋىنا بوگەت قىلمايىق دەپ اعاسىنىڭ ۇيىنە تاستاپ كەتەدى.
مۇحامەدجان مەن بەكبولات تىلەۋحان اعالى-ءىنىلى بولىپ ارالاسىپ تۇرعاندىقتان، اقىن جىگىت ول ۇيگە ءجيى كەلىپ جۇرگەن ەكەن. اقىن ەڭلىكتى ۇناتىپ، وعان ءسوز ايتادى. كوڭىلدەرى جاراسقان ەكى جاس وتاۋ قۇرادى. ول تۋرالى: «ەڭلىكتى كورگەن كەزىمدە ماعان اسەر ەتكەنى، ونىڭ ناماز وقيتىنى بولدى. سودان مەندە «ىزدەگەن قىزىم وسى ەكەن عوي» دەگەن وي تۋدى. 1999-2000-جىلدارى مەكتەپتە ءجۇرىپ ناماز وقيتىن قىزدار جوقتىڭ قاسى ەدى» - دەيدى مۇحامەدجان تازابەكوۆ.
مۇحامەدجان مەن ەڭلىك بۇگىندە ايشا، فاتيما، اسما، ابدۋلعافۋر ەسىمدى ۇل- قىزداردى تاربيەلەپ وتىر.
سەرىكزات دۇيسەنعازين 2002-جىلى استاناعا ەۋرازيا ۇلتتىق ۋنيۆەرسيتەتىنە مىرزاتاي جولداسبەكوۆ اعامىزدىڭ قول استىنا قىزمەتكە بارادى. سول جاقتا اينۇر ەسىمدى ارۋعا ۇيلەنەدى. ەكەۋىنىڭ جاسىندا سەگىز جاستاي ايىرماشىلىق بار. اقىن ۇيلەنەر كەزدە 28-دە بولسا، اينۇر كولىك جانە كوممۋنيكاتسيا اكادەمياسىندا ستۋدەنت بولعان. ماماندىعى - ينجەنەر-ەلەكتريك.
قازىر ەۋرازيا ۇلتتىق ۋنيۆەرسيتەتىندە راديوەلەكترونيكادان ساباق بەرەدى. وتباسىنىڭ ارۋجان اتتى قىزى مەن ءاليحان اتتى ۇلى بار.
بۇگىندە ايتىستاعى ساناۋلى اقىن قىزداردىڭ ءبىرى جانسايا مۋسينا تۇرمىسقا شىقپاعان. ايتىستاعى ارىپتەستەرى اقىننىڭ وسى «ءمىنىن» ىلعي دا ءسوز قىلادى. سەبەبى دە بەلگىلى. قازاقتىڭ اياۋلى اقىن قىزى بيىل وتىز بىرگە كەلدى. الايدا جانسايانىڭ بۇنداي پىكىرلەرگە اسا نازار اۋدارمايتىنى بايقالادى.
رينات زايىتوۆتىڭ كەلىنشەگىنىڭ ەسىمى - زۋلفيا تۇرسىن قىزى. ەكەۋىنىڭ تانىستىقتارىنا ريناتتىڭ ۇستازىنىڭ اناسى بەيحان اپا سەبەپشى بولعان ەكەن. اپاسىنان كەلىنشەك بولۋعا قاي قىز دۇرىس دەپ قالجىڭداپ سۇراسا، زۋلفيانىڭ بيازى مىنەزى مەن قازاقى ۇياڭدىعىن جاقسى جار بولادى دەپ توپشالاعان.
كوركەم مىنەزدى ارۋدى ۇناتقان رينات 2005 -جىلى دۇركىرەتىپ توي جاسايدى. 10 جىلدان اسا ۋاقىت بىرگە بولعان جاراسىمدى جۇپ جاقىندا تاعى ءبىر جانمەن تولىقتى. ومىرگە قىز بالا دۇنيەگە كەلدى. اقىن نارەستەنىڭ ەسىمىن اقىن اياگوز دەپ قويعان بولاتىن. كىشكەنتاي اياگوزدىڭ اقجۇنىس، ايشا، وسپان ەسىمدى اعا-اپكەلەرى بار.
ايتىستاعى ءسوزى ناركەسكەن اقىن قىز سارا توقتامىسوۆا دا وتاعاسى جايلى كوپ ايتا بەرمەيدى. الايدا اقىننىڭ جارى بۇرىن «شىمكەنت-شوۋ» تەاترىنىڭ پروديۋسەرى بولعان. قازىر جەكە كاسىپكەر.
بەلگىلى ايتىسكەر اقىن بالعىنبەك يماشەۆ وتباسىن قۇپيا ۇستايتىن اقىنداردىڭ ءبىرى. بەلگىلىسى اقىن وسى جىلى بەس ۇلدان كەيىن قىز بالا سۇيگەن.
