پوليتسەيلەر ارنايى كولىك قاعىپ، مەرت بولعان ازاماتتىڭ تۋىستارىنان كەشىرىم سۇرادى

شىمكەنت. قازاقپارات - شىمكەنتتىڭ پوليتسەيلەرى ينسپەكتور كولىگى قاعىپ، اجال قۇشقان ەرسايىن ءابىلوۆتىڭ تۋىستارىنان كەشىرىم سۇرادى.

ءتارتىپ ساقشىلارى وقيعا بولا سالا جاراقات العان جىگىتتىڭ ۇيىنە كەلىپ، جاقىندارىنان كەشىرىم سۇراعاندارىن، كومەكتەسكەندەرىن ايتادى.

ول كەزدە ەرسايىن ءابىلوۆ اۋرۋحانادا جاتقان. اراعا ەكى كۇن سالىپ جاراقات العان ازامات اۋرۋحانادا كوز جۇمدى. ال ەرسايىن ءابىلوۆتىڭ تىلشىلەرگە سۇحبات بەرۋدەن باس تارتقان تۋىستارى قىزمەت بابىن اتقارعان پوليتسەيلەردىڭ جاعدايىن تۇسىنەتىندەرىن ايتقان ەدى، دەپ حابارلايدى otyrar.kz.

ەسكە سالايىق، قايعىلى جاعداي 17 -ناۋرىزعا قاراعان ءتۇنى بولدى. جول ءجۇرۋ ەرەجەسىن بۇزعان لادا كولىگىن قۋىپ كەلە جاتقان پوليتسيا كولىگىنىڭ الدىنان جاياۋ جۇرگىنشى شىعادى. لادا كولىگى بۇرىلىپ كەتىپ، باعانانى سوققان. ال پوليتسيا كولىگى جاياۋ جۇرگىنشىنى قاعادى.

قاتتى سوققىدان جابىرلەنۋشى بىرنەشە مەتر جەرگە ۇشىپ كەتكەن. اۋىر حالدە جاتقان ول جەدەل جاردەم اۋرۋحاناسىنا جەتكىزىلگەن. ال قاشىپ كەتكەن لادا كولىگىنىڭ جۇرگىزۋشىسى ەكى كۇننەن كەيىن قولعا ءتۇستى.