مەحيكودا قالا ىشىندە جەكە كولىكپەن جۇرۋگە تىيىم سالىندى
جاعدايدى رەتكە كەلتىرۋ ءۇشىن قالا باسشىلىعى ازاماتتاردىڭ جەكەمەنشىك كولىگىمەن شاھار اۋماعىندا جۇرۋىنە ۋاقىتشا تىيىم سالعان، دەپ حابارلادى www.24.kz.
تۇرعىنداردىڭ دەنى ەندى قاجەت جەرىنە قوعامدىق كولىك نەمەسە ۆەلوسيپەدپەن بارادى. ولاردىڭ ىشىندە جاڭا تارتىپكە كوندىگە الماي جۇرگەندەرى دە از ەمەس. قالا ىشىندە جەكە كولىكپەن جۇرۋگە تىيىم سالىندى. اۋا لاستانعان سوڭ وسىنداي ەرەجە قابىلداندى. مامانداردىڭ بۇلاي دابىل قاعۋىندا سەبەپ تە جوق ەمەس. اۋا قۇرامىنداعى ۋلى زات شەكتى دەڭگەيدەن ەكى ەسەگە اسىپ كەتكەن. ونىڭ سالدارىنان 2 ميلليون كولىك قاڭتارىلىپ تۇر. ەندى اپتا ىشىندە جۇرگىزۋشىلەر وزىنە بەلگىلەنگەن كۇنى كولىگىن تىزگىندەي الادى. «بۇل تاكسي جۇرگىزۋشىلەرىن تىعىرىققا تىرەدى»، - دەيدى جۇرگىزۋشى حۋان كاستيللو.
ءوز كولىگىن ءمىنىپ، دىتتەگەن جەرىنە جەتە الماعان تۇرعىندار جاپپاي قوعامدىق كولىكتەر مەن جالعا بەرىلەتىن ۆەلوسيپەدتەرگە وتىرا باستادى. دەگەنمەن، ونداعى جاعداي ءماز ەمەس. تاكسي قىزمەتى ەكى ەسەگە قىمباتتاعان. اۆتوبۋستاردىڭ بىرىندە ينە شانشار ورىن بولماي تولىپ كەلسە، ەندى ءبىرى ۋاقىتىنان كەشىگەدى. اۋاعا بولىنەتىن زياندى زاتتاردى ازايتۋ ماقساتىندا ەنگىزىلگەن ەرەجە ءوندىرىس ورىندارىن دا اينالىپ وتپەدى. زاڭ بويىنشا ەندى بۇل مەكەمەلەر اۋاعا بولىنەتىن زياندى قالدىق كولەمىن 30-40 پايىزعا دەيىن قىسقارتۋعا مىندەتتى.
«وتە دۇرىس شەشىم. مۇنداي قادامعا وسىدان ءبىرتالاي جىل بۇرىن بارۋعا ءتيىس ەدىك. اۋاعا بولىنگەن ۋلى گازدارعا باقىلاۋ بولماعاندىقتان، وسىنداي جاعدايعا تاپ بولدىق. ءبىراق مەن بيلىكتەگىلەر دۇرىس شەشىم قابىلدادى دەپ سانايمىن»، - دەيدى ينجەنەريا سالاسىن دامىتۋ ورتالىعىنىڭ ديرەكتورى كارلوس انتونيو كاباللەرو.
مەكسيكاداعى اۋانىڭ شەكتەن تىس لاستانعانى تۋرالى حابار 14 جىلدان كەيىن تاعى تارادى. قازىر مۇندا اۋاعا زياندى زات بولەتىن كەز- كەلگەن ارەكەت جاساۋعا تىيىم سالىنعان، ءتىپتى جول جوندەۋ جۇمىستارى دا توقتاتىلعان. بيلىكتەگىلەر مۇنداي شارالاردىڭ جاڭبىرلى ماۋسىم باستالعانعا دەيىن جالعاسۋى مۇمكىن ەكەنىن ايتىپ وتىر.
