رامزان قادىروۆ ستالين مەن بەرياعا قارعىس جاۋدىردى

استانا. قازاقپارات -  رەسەي قۇرامىنداعى شەشەنستان رەسپۋبليكاسىنىڭ باسشىسى رامزان قادىروۆ شەشەن مەن ينگۋش حالىقتارىن جەر اۋدارعانى ءۇشىن يوسيف ستالين مەن لاۆرەنتيي بەريانى قارعادى.

  بۇل تۋرالى ول ءوزىنىڭ ينستاگرام پاراقشاسىندا مالىمدەدى.

«ءبىز قايعىلى تاريحىمىز قايتالانباس ءۇشىن ونى ەشقاشان ۇمىتپايمىز!» دەدى قادىروۆ الەۋمەتتىك جەلىدە. ايتا كەتەيىك، 23 - اقپان - ەلدە جەر اۋدارۋ كەزىندە قايتىس بولعان شەشەندەر مەن ينگۋشتاردى ەسكە الۋ كۇنى. وسىدان 72 جىل بۇرىن ستالين اتالعان حالىقتاردى دەپورتاتسيالاعان بولاتىن. ال، بۇل وپەراتسيانى لاۆرەنتي بەريا جۇزەگە اسىرعان.

«ولاردى عاسىرلار بويى قارعىس اتسىن!» دەپ اتاپ ءوتتى شەشەن كوشباسشىسى ءوز جازباسىندا. ونىڭ ايتۋىنشا، ستالين 120 مىڭ شەشەندى ايداۋعا جىبەرىپ، كوزىن جويعان. جالپى، وسى سوعىس جىلدارى شەشەن حالقىنىڭ 54 پايىزى قىرىلىپ قالدى دەيدى ر. قادىروۆ.

ايتا كەتەيىك، شەشەن- ينگۋش حالىقتارىن يوسيف ستالين 1944 - جىلدىڭ 23 - اقپانىندا جاپپاي جەر اۋدارعان بولاتىن. ولاردى ك س ر و كوسەمى فاشيستەرمەن ءسوز بايلاستى دەپ ايىپتاعان. تەك، 1957 - جىلى عانا وزگە ەلدەرگە كۇشتەپ قونىستانعان شەشەندەر اقتالىپ، تۋعان جەرگە ورالۋعا رۇقسات الدى.

رەسمي دەرەكتەرگە كوز جۇگىرتسەك، شەشەن- ينگۋش ك س ر- ءنىڭ اۋماعىنان جارتى ميلليون تۇرعىن ايداۋعا كەتكەن. ولار قازاقستان مەن قىرعىزستان جەرلەرىنە قونىستاندى. سونداي- اق، شەشەندەرمەن بىرگە بۇل ۋاقىتتا سولتۇستىك كاۆكازداعى بىرنەشە ۇلتتار دا جەر اۋدارىلعان بولاتىن. ولاردىڭ قاتارىندا قالماقتار، قاراشايلار، بالقار حالىقتارى بار.

https://sn.kz