تورەعالي تورەالى ەركەنى سىنايمىن دەپ ەسەنتايەۆادان ءسوز ەستىدى

استانا. قازاقپارات - ءانشى تورەعالي تورەالى «سىرلاسۋ» باعدارلاماسىنا قوناققا كەلىپ «ەركە مەنىڭ ارقامدا تانىلىپ كەتتى» دەگەن سارىنداعى ويىمەن ءبولىسىپتى.

مۇنى ەسەنتايەۆاعا ەركە ەسماحاننىڭ تىڭدارماندارى جەتكىزگەن. وسىدان كەيىن بايان ەسەنتايەۆا تورەعاليمەن بىرگە جاسالعان جۇمىس جايلى ايتىپ، وعان وزگەلەردىڭ جۇمىسىن سىناي بەرۋدىڭ جاقسى ەمەس ەكەنىن تۇسىندىرمەك بولعان.

بۇل تۋرالى STAN. KZ سايتى حابارلايدى.

«مەنىڭ ارىپتەسىم تورەعالي سوڭعى كەزدەرى وزگەنىڭ ارتىستەرىنە قاتىستى جاۋاپكەرشىلىكتى وزىنە الۋدى قاتتى جاقسى كورىپ كەتتى! «اللو» ول ورتاق تۋىندى. ءاندى تورەعالي، كليپتى مەن ۇسىنىپ بىرگەلىكتە جاقسى جۇمىس ىستەگەن سياقتى ەدىك. ەركەنىڭ جەكە ءانشى رەتىندە تانىلىپ جۇرگەن ۋاقىتى تورەعاليدىكىمەن تەڭ، ەكى جىل بولدى. مەنىڭشە وزگەنىڭ ەڭبەگىن باعالاي ءبىلۋ كەرەك. قىمباتتى تورەعالي، مەن دە مۇندا ءوز جۇمىسىمدى بىلەتىن ادامنىڭ ءبىرىمىن. ول بەينەباياندى توعىز ميلليونعا جۋىق جۇرت تاماشالاپ، كوپشىلىگىنىڭ كوڭىلىنەن شىعىپ جاتىر. سىزدەر دە ءتىپتى ارمانداماعان كليپكە قولدارىڭىز جەتىپ قالدى. سوندىقتان ورتاق ەڭبەگىمىزدى باعالايىق. ەركە ەرەكشە داۋىس يەسى، ءارى ءوزىنىڭ تىڭدارماندارىن تاپقان ءانشى. ولاي بولماسا تورەعاليدىڭ ءوزى بىرگە ءان شىرقاۋ ۇسىنىسىن جاساماس ەدى. بىزدەر تورەعاليدىڭ ۇسىنىسىنا قاتىستى سول كەزدە ءبىراز ويلانعان بولاتىنبىز»، - دەيدى بايان ەسەنتايەۆا.

جۇرت جاقسى قابىلداعان انگە بايان ەسەنتايەۆا كينو تۇسىرەتىنى جايلى ايتقان بولاتىن. مىنانداي ارازدىقتان كەيىن ونىڭ تاعدىرى نە بولارى بەلگىسىز. ال تورەعالي بۇعان دەيىن «91» توبىنىڭ كيىم كيىسى مەن ساحناداعى جۇرىستەرىنە قاتىستى اۋىر سوزدەر ايتقان ەدى.