وڭتۇستىك كورەيادا جارىلىستان جاپا شەككەن قازاقستان ازاماتىنا شۇعىل وتا جاسالدى - ق ر سىرتقى ىستەر مينيسترلىگى

استانا. قازاقپارات - وڭتۇستىك كورەيادا جارىلىستان جاپا شەككەن قازاقستان ازاماتىنا شۇعىل تۇردە وتا جاسالدى.

بۇل تۋرالى «قازاقپارات» تىلشىسىنە ق ر سىرتقى ىستەر مينيسترلىگىنىڭ باسپا ءسوز قىزمەتى حابارلادى.

«قولدا بار اقپارات بويىنشا، 2016 -جىلدىڭ 4 -ساۋىرىندە وڭتۇستىك كورەيانىڭ كورەي حالىقتىق دەموكراتيالىق رەسپۋبليكاسىمەن شەكارالاس جاتقان كانۆون پروۆينسياسىندا جارىلىس ورىن الدى، سالدارىنان 1962 -جىلى تۋعان قازاقستان ازاماتى زارداپ شەكتى. ارنايى سانيتارلىق ۇشاق بورتىمەن ق ر ازاماتى سەۋل قالاسىنىڭ «SeoulYonsei» اۋرۋحاناسىنا جەتكىزىلىپ، وندا وعان جەدەل تۇردە وتا جاسالدى. وقيعا سالدارىنان ول وڭ اياعىنداعى ءتورت باقايىنان ايىرىلىپ وتىر. قازىرگى ۋاقىتتا زارداپ شەككەن ازاماتتىڭ حال- جاعدايى تۇراقتى»، - دەلىنگەن حابارلامادا.

سەۋلداعى ق ر ەلشىلىگىنىڭ حابارلاۋىنشا، ول وڭتۇستىك كورەياعا مەديتسينالىق تەكسەرۋدەن وتۋگە كەلگەن. 2016 -جىلى 31 -ناۋرىزدا ول ازامات اتالعان پروۆينسياعا جەنشەن وسىرەتىن فەرماعا جۇمىسقا ورنالاسقان.

تەرگەۋدىڭ الدىن الا مالىمەتتەرىنە قاراعاندا، جارىلىس 1951-53 -جىلدارىنداعى كورەيالىق سوعىستان جارىلماي قالعان مينادان بولۋى ىقتيمال. قازىرگى ۋاقىتتا كورەيانىڭ ۇلتتىق پوليتسياسى جانە قورعانىس مينيسترلىگىنەن قۇرىلعان تەرگەۋ توبى جۇمىس جاساپ جاتىر جانە زەرتتەۋ ناتيجەلەرىن قوسىمشا حابارلايتىن بولادى.

اۆتور: جاسۇلان جولدىبايەۆ