بۇگىن شارشى الاڭدا جاسىنداي ويناعان بوكسشى بەكزات ساتتارحانوۆتىڭ دۇنيەگە كەلگەن كۇنى
2000-جىلى سيدنەيدە وتكەن XXVII وليمپيادادا جارتىلاي جەڭىل سالماقتا (57 كەلى) چەمپيون اتاعىن جەڭىپ الىپ، قازاقتىڭ مەرەيىن اسقاقتاتقان بىلعارى قولعاپ شەبەرى ءتىرى بولسا، بۇگىندە 36 جاسقا تولار ەدى.
بەكزات ساتتارحانوۆ وڭتۇستىك قازاقستان وبلىسى تۇركىستان قالاسىندا تۋعان. ول تۇركىستان قالاسىنداعى قاراپايىم وتباسىندا دۇنيەگە كەلگەن. بەكزات اكەسى سەيىلحان مەن اناسى سىرلىكۇلدىڭ كەنجە بالاسى. ساتتارحانوۆتاردىڭ بەكزاتتان وزگە مەكتەپ قابىرعاسىنداعى سپورتتىق باسەكەلەردە وزا شاپقان ءۇش ۇلى بولدى. باعدات، بولات، ماقسات ەسىمدى بالالارى دا سپورتتى سەرىك ەتكەنىمەن، بەكزات سەكىلدى ەشقايسىسى الدىنا بيىك مۇرات قويماعان كورىنەدى. ءسابي كۇنىندە ول وتە نازىك، اۋرۋشاڭ، ءالجۋاز بولعان ەكەن. سوندىقتان بەكزاتتان اتاعى جەر جۇزىنە جايىلاتىن داڭقتى بوكسشى شىعادى دەپ ەشكىم ويلاماسا كەرەك.
العاشىندا ءوزىن-ءوزى قورعاپ ۇيرەنسىن دەگەن ويمەن اتا-اناسى بەكزاتتى كۇرەس ۇيىرمەسىنە قاتىستىرادى. الايدا كۇرەسكە ىنتاسى بولماي، ەكىنشى جاعىنان كۇرەسپەن اينالىسۋ بويدىڭ ءوسۋىن تەجەيتىنىن ۇعىپ ۇيىرمەگە بارماي، بىردەن بوكسقا بەت بۇرادى. 1986-1996-جىلدار ارالىعىندا اباي اتىنداعى مەكتەپ ينتەرناتتا، كەيىن جۇمابەك ەدىلبايەۆ اتىنداعى 18№ ورتا مەكتەپتە وقيدى. 1995-جىلى العاش رەت بوكس ۇيرىمەسىنە جازىلىپ، بالالار باپكەرى نۇرلان جۇمابايەۆتان ءتالىم الا باستايدى. اتا-اناسى مەن تۋىستارى بەكزاتتىڭ بوكسقا دەگەن ىنتاسىن بايقاعانىمەن، مۇنى جاي، وتپەلى كەزەڭ دەپ ويلاعان. ءبىراق ول بوكسپەن شۇعىلدانعانىنا ءبىر جىل تولماستان رەسپۋبليكالىق سايىستىڭ جەڭىمپازى اتانىپ، بىلعارى قولعاپتى بەكەر كيمەگەنىن دالەلدەيدى.
زاڭ سالاسى ماماندىعىن يگەرگەن. الدىمەن مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ دەنە شىنىقتىرۋ فاكۋلتەتىنە ءتۇسىپ، كەيىن تۇركىستان قالاسىنداعى قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ زاڭ فاكۋلتەتىن ءتامامداعان. بەكزات بوكستا سەرىك قوناقبايەۆتى ۇلگى تۇتقان. مۇنىڭ سەبەبى دە جوق ەمەس. 1980-جىلى ماسكەۋ وليمپياداسىنىڭ فينالىندا سەرىك قوناقبايەۆ جۇدىرىقتاسقان ساتتە بەكزات بەسىكتە جاتقان ءسابي ەدى. اناسى سىرلىكۇل ساتتارحانوۆانىڭ سەرىك قوناقبايەۆ سەكىلدى بەكزات تا چەمپيون بولسىن دەگەن ۇلكەن ارمانى بولعان. بەكزات كەيىن انا ارمانىن ورىندايدى دا. ول سيدنەيدەگى جەڭىسىن تۇركىستان قالاسىنىڭ 1500 جىلدىعىنا تارتۋ ەتەتىندىگىن ايتقان.
ول بوكستان حالىقارالىق دارەجەدەگى سپورت شەبەرى، قازاقستانعا ەڭبەك سىڭىرگەن سپورت شەبەرى بولعان. سونداي-اق، 1- دارەجەلى «بارىس» وردەنىنىڭ ءبىرىنشى يەگەرى. 1998-جىلى وتكەن الەم چەمپيوناتىنىڭ، 1999-جىلعى ازيا چەمپيوناتىنىڭ كۇمىس جۇلدەگەرى اتانعان.
سپورتشى 2000-جىلدىڭ 31- جەلتوقسانى كۇنى، جاڭا جىلعا ساناۋلى مينۋتتار قالعاندا، شىمكەنت قالاسى جانىنداعى تەمىرلان بەكەتى ماڭىندا اۆتوكولىك اپاتىنان قازا بولدى.
