سيرياعا اتتانعان ورالدىق فۋتبولشى سول جاقتا قازا تاپتى

استانا. قازاقپارات -  سوڭعى جىلدارى يسلامدى بۇرمالاۋدىڭ كەسىرىنەن ءبىراز قازاق جاسى جات اعىمنىڭ جەتەگىنە تۇسۋدە. ولار ۆاححاببيتتىك يدەيانى قولداپ، ناماز وقىماعانى ءۇشىن اتا- انا، تۋىستارىن «كاپىر»، ولاردىڭ پىسىرگەن تاماعىن «حارام» دەپ، قاعىنان جيرەنىپ، بەزۋدە،

 دەپ جازادى ۇلت پورتالى.

مۇنىڭ اقىرى تەرروريستىك ۇيىم دەپ تانىلعان «يسلام مەملەكەتى» دەگەن جالعان اتپەن تانىلعان تەرىس ۇيىم قۇرامىنا قوسىلۋ ءۇشىن سيرياعا كەتۋمەن اياقتالۋدا. كوبى سول جاقتا ءولىم قۇشۋدا. نە ءۇشىن؟ كىم ءۇشىن؟ بۇل سۇراققا جاۋاپ ىزدەگەن ولاردىڭ اتا- انالارى قۇزىرلى قۇرىلىمداردى ارالاپ، شارق ۇرۋدا. ولاردىڭ ۇل- قىزدارىن كىمدەر تەرىس جولعا سالىپ جاتىر؟

سيرياعا كەتكەن قازاق جاستارىنىڭ اتا- انالارى اشىنىپ، جوعارىداعى سۇراقتارعا جاۋاپ ىزدەۋگە شىقتى. ولار وبلىس مەشىتتەرىنە كەلىپ، يسلامدى بۇرمالاپ، تەرىس باعىتتا جۇرگەندەردىڭ جاۋاپ بەرۋىن تالاپ ەتىپ، اداسىپ جۇرگەندەردى دۇرىس جولعا شاقىرۋدا. سولاردىڭ ءبىرى - ايناش تولەيەۆا جاقىندا وبلىستىق مەشىتكە كەلىپ، جاماعاتتىڭ الدىندا ءسوز سويلەدى.

ورالدىق فۋتبولشى تالعات تولەيەۆ ايناشتىڭ جالعىزى ەدى. تالعات گرانتپەن تۇسكەن ب ق ا ت ۋ- داعى وقۋىن اياقتاماي، تاستاپ كەتتى. فۋتبولشى بولسام دەگەن ارمانىن دا ۇمىتتى.

«جالعىز ۇلىم ەدى.. . ناماز وقيمىن دەگەن سوڭ جامان نارسەدەن اۋلاق بولادى عوي دەپ ويلادىم. ءبىراق كەرىسىنشە بولدى، ۇلىم ءۇمىتىمدى اقتامادى. يمامداردان ۇيرەنبەي، تەرىس جولدا جۇرگەندەردىڭ ىقپالىنا ءتۇسىپ كەتتى. ۇيلەنگەنىن سونشا كۇتىپ ەدىم، ۇلكەن توي جاسايمىن دەپ جىلدار بويى ارماندادىم. ءبىراق ارمانىم ورىندالمادى. ۇلىم توي جاساۋعا قارسى بولدى. «توي جاساۋ دۇرىس ەمەس، ازىرلەگەن تاماقتى ەشكىم جەمەيدى» - دەدى. سەبەبى ول مەنىڭ پىسىرگەن تاماعىمدى «حارام» دەپ جەمەيتىن بولعان. مەن وعان: «مەن سەنى وسى تاماقپەن ءوسىردىم عوي» دەسەم دە، قۇلاق اسپادى. سوندا عانا مەن بالامنىڭ اداسقانىن ءتۇسىندىم.

ۇيلەنگەن سوڭ كەلىن قارا كيىم كيىپ، مالىنىپ ءجۇردى، ماعان بەتىن كورسەتپەدى. ۇلىمدى جالعىز ءوزىم ءوسىرىپ ەدىم، ول ءۇشىن قالا شەتىنەن ءۇي سالدىم، ۇيلەنگەن سوڭ بىرگە تۇرامىز، باقىتتى ءومىر سۇرەمىز دەپ ويلادىم. كولىك الىپ بەردىم، سول بالا ءۇشىن عانا ءومىر ءسۇردىم. ومىرگە ۇل نەمەرەم كەلدى. ءبىر تۇندە بالام ماعان ايتپاستان سيرياعا كەتىپ قالدى. ءتورت اي بويى ىزدەدىك، كۇتتىم، ءتورت ايدى ۇيقىسىز وتكىزدىم، جۇرەگىم جارالى، اۋىرادى... سوسىن... ول سيريادا ءولىپتى. ول جاقتا كەلىنىم مەن ەكى نەمەرەم قالدى... ۇلىم نە ءۇشىن ءولدى، كىم ءۇشىن ءولدى؟ نەگە؟»، - دەيدى كوز جاسىن توگىلگەن ايناش انا.

«بالالارىم، ويلانىڭدار، اداسپاڭدار! مەن مۇندا سەندەردى بالامنىڭ قاتەلىگىن قايتالاماسىن، ساباق بولسىن دەپ ايتۋ ءۇشىن ءوزىمدى- ءوزىم سۇيرەپ، ارەڭ كەلىپ تۇرمىن» - دەدى.

اتا- انالار مەشىتكە جۇما نامازى كۇنى، ءدىني تەرىس باعىتتى ۇستانۋشىلاردىڭ كەلۋىنە وراي كەلىپ، جاماعات الدىنا شىعۋدا. سىرىم اۋدانى - وبلىستاعى وسىنداي اعىمداعى ادامدار كوپ شوعىرلانعان ءۇش اۋداننىڭ ءبىرى. ق ر قىلمىستىق كودەكسىنىڭ 394-بابى، 2-بولىمىمەن سوتتالعان سىرىمدىق مارات سادىقوۆتىڭ اناسى كلارا داۋلەت قىزى يسلام اتىن جامىلىپ، قۇقىق بۇزعان ۇلىنىڭ قاتەلىگىن مەشىت جاماعاتى الدىندا ايتتى.

 «جاقىندا تۇرمەگە بارىپ شىقتىم. بالاما: «مەشىتكە بارىپ، جاماعاتتىڭ الدىندا ءسوز سويلەيمىن» دەدىم. بالام مەنى قولداپ: «مەنىڭ ىستەگەن قاتەلىگىمدى، اداسقانىمدى ايتىڭىزشى، باس يمام باقىتجاننان كەشىرىم سۇراڭىزشى مەنىڭ اتىمنان» دەپ سالەم ايتتى»، - دەدى كلارا داۋلەت قىزى.

وتباسىنىڭ مارات ءۇشىن قانشاما قايعى شەگىپ وتىرعانىن ايتقان انا جاستارعا اتا- انانىڭ ايتقانىن تىڭداۋعا، اتا- بابا سالعان جولدان، ۇلتتىق سالت- داستۇردەن اينىماۋعا شاقىردى. سىرىم اۋداندىق مەشىتىنىڭ باس يمامى باقىتجان سابىراليەۆتەن ۇلى مارات ءۇشىن كەشىرىم سۇرادى.

دەرەككوز: Ult.kz