پان گي مۋن تاۋلى قاراباقتاعى اتىستى توقتاتۋعا شاقىردى

استانا. قازاقپارات - ب ۇ ۇ باس حاتشىسى پان گي مۋن تاۋلى قاراباق ايماعىندا اسكەري قارۋدىڭ اۋىر تۇرلەرى قولدانىلىپ، كوپ ادامنىڭ قازا بولعانى، ولاردىڭ اراسىندا بەيبىت تۇرعىندار بارى تۋرالى حابارعا الاڭداۋشىلىق بىلدىرگەن.

پان گي مۋن تاراپتاردى اتىستى دەرەۋ توقتاتىپ، جانجالدى بەيبىت جولمەن رەتتەۋگە شاقىردى دەپ حابارلادى ونىڭ باسپا ءسوز قىزمەتى.

«باس حاتشى جانجالعا قاتىسى بار بارلىق تاراپتاردى قارۋلى ءىس-قيمىلداردى دەرەۋ توقتاتىپ، اتىستى توقتاتۋ تۋرالى جاسالعان كەلىسىمدى تولىق ورىنداۋعا جانە شيەلەنىستى سەيىلتۋ جونىندەگى قادامدارعا دەرەۋ كىرىسۋگە شاقىرادى» دەلىنگەن مالىمدەمەدە.

پان گي مۋن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ تاۋلى قاراباق بويىنشا مينسك توبى مەن داۋلى ايماققا قاتىستى ماسەلەنى بەيبىت كەلىسسوزدەر نەگىزىندە شەشۋ جولىن ىزدەپ، قاۋىپتى احۋالدى رەتتەۋ جونىندەگى جۇمىستارعا قاتىسۋشى بارلىق تاراپتارعا تولىق قولداۋ بىلدىرەتىنىن ايتقان.

تاۋلى قاراباقتا ەكى تاراپ اراسىنداعى سىزىق بويىندا سەنبى كۇنى بولعان قارۋلى قاقتىعىستار سالدارىنان ارمەنيا مەن ازەربايجاننان جالپى سانى 30 ادام مەرت بولىپ، ونداعان ادام جارالانعان. باكۋ مەن ەرەۆان قارۋلى قاقتىعىسقا ءبىر-ءبىرىن ايىپتادى.

نەگىزىنەن ارمياندار كوپ قونىستانعان تاۋلى قاراباق اۆتونوميالىق وبلىسى 1988-جىلى ازەربايجان قۇرامىنان شىعاتىنى تۋرالى مالىمدەگەننەن كەيىن، داۋلى ماسەلەنىڭ سوڭى ارمەنيا مەن ازەربايجان اراسىندا قارۋلى جانجالعا ۇلاسقان. 1994-جىلى تاراپتار اتىستى توقتاتۋ تۋرالى كەلىسىمگە قول قويعان. سودان بەرى ايماق ماسەلەسى ب ۇ ۇ- نىڭ كۇن تارتىبىندە تۇر. ەۋروپاداعى قاۋىپسىزدىك جانە ىنتىماقتاستىق ۇيىمىنىڭ تاۋلى قاراباق بويىنشا مينسك توبىنىڭ تەڭتوراعالارى داۋلى ايماقتاعى قارۋلى قاقتىعىسقا بايلانىستى الداعى اپتادا ۆەنادا شۇعىل وتىرىس وتكىزبەك.

«ازاتتىق»