ارابقا كۇيەۋگە شىققان قازاق قىزى وزگە قىزداردان بۇل قاتەلىكتى قايتالاماۋدى سۇرادى - كەسكىن

 استانا. قازاقپارات - ەگيپەتتىك ارابقا كۇيەۋگە شىققان قازاق قىزى ءوزىنىڭ بۇل ارەكەتىن ۇلكەن قاتەلىك دەپ ەسەپتەيدى. بۇل تۋرالى مىسىرعا بارىپ، قانداسىمىزبەن تىلدەسىپ قايتقان پروفەسسور، تۇركىتانۋشى قارجاۋباي سارتقوجا ۇلى مالىمدەگەن.

 عالىمنىڭ اڭگىمەسى جازىلعان بەينەروليك كەشە فەيسبۋكتەگى پاراقشالاردىڭ بىرىندە جاريالاندى.

قازاق قىزى اراب جىگىتىمەن الماتىداعى ق. ساتبايەۆ اتىنداعى ۇلتتىق تەحنيكالىق ۋنيۆەرسيتەتتە بىرگە وقىپ، سول جەردە تانىسقان ەكەن. كوڭىلدەرى جاراسقاننان كەيىن ۇيلەنۋدى ءجون ساناپتى.

قارجاۋباي سارتقوجا ۇلى، ت. ع. د. , پروفەسسور:

- ەگيپەتتەگى قازاق جىگىتتەردەن سۇرادىم، وسىندا تۇرىپ جاتقان قازاق قىزدار بار ما دەپ. ەكى قىزدىڭ بار ەكەنىن ايتى. ءبىرىنىڭ كۇيەۋى كەزدەسۋگە رۇقسات بەرمەپتى، ەكىنشىسى كەلىسكەن. سونىڭ ۇيىنە باردىق. بەس قاباتتى ءۇي ەكەن، كۇيەۋى قارسى الدى دا، ءبىزدى جونىمىزگە قالدىردى. سودان ءارى قىزىمىز جاعدايىن ايتىپ، ەڭىرەپ قويا بەردى: «تانىستىق. ۇيلەندىك. ءبىر بالالى بولدىق. سونىمەن ەلگە بارامىز دەپ ايتتى دا، ەگيپەتكە كەلدىك. سويتسەم، ونىڭ ەكى ايەلى بار ەكەن. سامولەتتەن تۇسكەن سوڭ پاسپورتىمدى الدى دا قالتاسىنا سالدى. سودان بەرى پاسپورتىم جوق. ۇيىممەن سويلەسەيىن دەسەم سويلەسكىزبەيدى، ءبارى باقىلاۋدا. مەن قازىر تۇرمەدەگى اداممىن. كەلگەننەن كەيىن تاعى ەكى بالا تاپتىم. دۇكەننەن وزگە ەشقايدا شىعا المايمىن. قازاقستاننىڭ ەلشىلىگىنىڭ قايدا ەكەنىن دە بىلمەيمىن. مىنا قازاق جىگىتتەر كەلىپ، اپارايىق دەپ ايتتى، الايدا، ونداعىلار مەنى قۇجاتسىز قابىلدايدى ما، جوق پا بەلگىسىز» دەپ قارىنداسىمىز مۇڭىن ايتتى، - دەيدى پروفەسسور.

ال، قوشتاسار ساتتە ارابقا كۇيەۋگە شىققان قازاق قىزى ەلدەگى سىڭلىلەرىنە سالەمدەمەسىن دە جولداپتى.

- كەتەر كەزدە ەڭ سوڭعى ايتقان ءسوزى مىناداي بولدى: «اعا، ءسىز جوعارى وقۋ ورنىندا ۇستاز ەكەنسىز، قازاقتىڭ قىزدارىنا ايتىڭىزشى، باسى تاز، مۇرنى پۇشىق بولسا دا قازاق جىگىتىنە شىقسىن. ەش ۋاقىتتا باسقا ۇلتقا شىقپاسىنشى. وسىنى جۇرگەن جەرىڭىزدە ايتىپ ءجۇرىڭىزشى، اعا. مەن سىزگە تاپسىرار جالعىز ءوتىنىشىم وسى» دەپ قارىنداسىمىز جىلاپ قالدى.

ايتا كەتەيىك، قارجاۋباي سارتقوجا ۇلى تاريح عىلىمىنىڭ كانديداتى، پروفەسسور. ل. ن. گۋميليەۆ اتىنداعى ە ۇ ۋ- ءنىڭ جانىنداعى تۇركى تانۋ، التاي تانۋ عىلىمي زەرتتەۋ ينستيتۋتىنىڭ ديرەكتورى. «قوش بول، اپا!»، «قىراننىڭ قازاسى»، «سايگۇلىكتەر» اتتى كوركەم پروزالىق كىتاپتاردىڭ، 100 گە جۋىق عىلىمي ماقالالاردىڭ اۆتورى.