د. نازاربايەۆا: شەتەل ءتىلىن ۇيرەنۋ - الجۋ اۋرۋىنىڭ الدىن الۋدىڭ ءبىر جولى - فوتو

استانا. قازاقپارات - ق ر پرەمەر- ءمينيسترىنىڭ ورىنباسارى داريعا نازاربايەۆا شەتەل ءتىلىن ۇيرەنۋ التسگەيمەر (الجۋ) اۋرۋىنىڭ الدىن الۋدىڭ جاقسى جولى ەكەندىگىن ايتتى. ول بۇل ويىن استانا قالاسى اكىمدىگىنە قاراستى كاسىبي- تەحنيكالىق كوللەدج ۇجىمى مەن ستۋدەنتتەرىمەن كەزدەسۋ بارىسىندا ايتتى.

 ۆيتسە- پرەمەر ءوز سوزىندە 2018-2019 -جىلدارى مەكتەپ تۇلەكتەرى مەن 9-10 سىنىپتى بىتىرەتىن وقۋشىلاردىڭ اعىلشىن ءتىلىن ءبىلىپ شىعاتىندىعى جوسپارلانىپ وتىرعاندىعىن اتاپ ءوتتى. ونىڭ اتاپ وتۋىنشە، كوللەدج باسشىلىعى مەن وقىتۋشىلار قۇرامىنا ەرەكشە تالاپ قويىلاتىن بولادى. سوندىقتان قازىردەن باستاپ اعىلشىن ءتىلىن ۇيرەنە باستاۋلارى قاجەت.

«كوپتەگەن تاسىلدەر بار: قاشىقتان وقىپ، ەلەكتروندى سىناقتار تاپسىرۋعا بولادى. بۇل ءتيىمدى ءارى ەكونوميكالىق تۇرعىدا ارزان. ماعان وقۋلىقتاردىڭ جوق ەكەندىگىن، ادەبيەتتەردى تابۋ وتە قيىن ەكەندىگىن، ال اعىلشىن تىلىندە وتە كوپ ەكەندىگىن ايتتى. ەگەر ءبىز ءتىل بىلگەنىمىزدە بۇل ادەبيەتتەر قول جەتىمدى بولار ەدى، زاماناۋي ءبىلىمدى يگەرۋ ايامىز كەڭەيە تۇسەر ەدى. قالاي الىپ قاراساقتا ونىڭ وڭ جاقتارى وتە كوپ. جالقاۋلانباۋ كەرەك. ادامدار قوسىمشا ءتىل ۇيرەنە باستاعان كەزدە ەستە ساقتاۋ جادى جاقسارادى جانە بۇل - التسگەيمەر اۋرۋىنىڭ الدىن الۋدىڭ جولى دا. بۇل عىلىمي تۇرعىدا دالەلدەنگەن» ، - دەدى ول.

سونىمەن قاتار ول قازىر مۇلدەم باسقا زامان ەكەندىگىن، عالامتور، ونداعى عىلىم مەن ءبىلىم نەگىزىنەن اعىلشىن تىلىندە ەكەندىگىن ايتتى. «سوندىقتان ءوزىمىزدى جانە بالالارىمىزدى بۇل مۇمكىنشىلىكتەردەن شەكتەمەيىك» ، - دەپ تۇيىندەدى ءسوزىن د. نازاربايەۆا.