ورامال تاققان تۇڭعىش تەلەجۇرگىزۋشى باعىن سىنادى

استانا. قازاقپارات - زابي گايتكۋيەۆا رەسەيلىك «دوجد» تەلەارناسىنا جۇرگىزۋشىلىككە ۇمىتكەرلەردىڭ ىشىندەگى شاريعات ءشالىسىن جامىلعان تۇڭعىش قاتىسۋشى.

بۇعان دەيىن ول شەشەن- ينگۋش تەلەارناسىندا جۇمىس اتقارعان. الەۋمەتتىك جەلى قولدانۋشىلارى قىزدىڭ باتىلدىعىنا قايران قالىپ، جارىسا جازىپ جاتىر. اتاقتى اكتريسا اندجەلينا دجوليگە ۇقسايتىنىن دا ايتىپ جاتقاندار كوپ.

ايتا كەتۋ كەرەك، «دوجد» تەلەارناسى تەلەجۇرگىزۋشىلەرگە بايقاۋ جاريالاعان بولاتىن. ارنانىڭ رەسمي سايتىندا «ديكتور جاڭالىقتى بار جان تانىمەن جاقسى كورۋ كەرەك، ول تۋرالى ءبىلىپ قانا قويماي، حالىققا جەتكىزە ءبىلۋى ءتيىس» دەگەن تالاپتارىن كورسەتكەن.

سونىمەن قاتار، حابارلامادا تەلەارنا ەشقانداي دا گەندەرلىك نەمەسە جاس ەرەكشەلىگىنە شەكتەۋ قويمايمىز دەلىنگەن. مۇسىلمان قىزىنىڭ بايقاۋدان ءوتۋ - وتپەۋى ازىرگە بەلگىسىز. ءبىراق ورامالداعى تەلەجۇرگىزۋىشىنىڭ ۆيدەوسى الەۋمەتتىك جەلىدە تانىمالدىلىققا يە بولۋدا.

 ihsan.kz