گەرمانيا بيلىگى قازاقستاندىق ارداگەرلەرگە وتەماقى تولەيدى
قان مايداندا شايقاسقان قارت جاۋىنگەرلەر تۇتقىنعا دا ءتۇسىپ، ءبىراز ازاپتى كەزەڭدى باستان وتكەرگەن. جالپى سوعىس جىلدارى نەمىس كونسلاگەرلەرىنەن 23 مىڭ قازاقستاندىق ورالدى. قازىر سولاردىڭ 4 مىڭى ارامىزدا ءجۇر. ۇلى وتان سوعىسى كەزىندە جاۋ قولىنا تۇسكەن قىزىل اسكەر سولداتتارىنىڭ دەرەكتەرىن تۇگەندەۋ ءالى دە جالعاسۋدا. ق ر پرەزيدەنتى مۇراعاتى ەسىمدەرى مەن جەرلەنگەن جەرى بەلگىلى 35 مىڭ قازاقستاندىق مايدانگەر جايلى مالىمەتتەردى Tutkyn.kz سايتىندا جاريالادى. حابارسىز كەتكەن جاۋىنگەردىڭ ەسىمىن وسى جەردەن تابۋعا بولادى. ەندى 165 مىڭعا تارتا بوزداقتىڭ قايدا قالعانىن، قاي جەردە جەرلەنگەنىن انىقتاۋ قاجەت.
وسپان بەكسەيىتوۆ عاسىرعا جۋىق عۇمىرىندا تار جول تايعاق كەشىپ، تالاي قيىن جولدان ءوتتى. ۇلى وتان سوعىسىندا الدىڭعى شەپتە شايقاسقان قازاق جاۋىنگەرى ءۇشىن فاشيستەر قولىنا تۇسكەننەن كەيىنگى ءومىرىن ەسكە الۋدىڭ ءوزى اۋىر.
وسپان بەكسەيىتوۆ، ۇلى وتان سوعىسىنىڭ ارداگەرى:
- ءبىزدى ۋكراينانىڭ پولتاۆسكي وبلىسىنداعى لاگەرگە اپارىپ قامادى. سونداي-اق 5-10 ادامعا ءبولىپ تاستاپ، جۇمىسقا جەكتى. كورسەتپەگەن قيىندىعى از بولار.
اۋەزحان ءشايدازىموۆ تە قيىن جىلداردى ەسكە العىسى كەلمەيدى. ويتكەنى قان مايداندا قار قۇرسانىپ، مۇز جاستانعان جاۋىنگەر سنارياد جارقىنشاعىنان جارالانىپ، ەس-ءتۇزسىز جاتقان جەرىندە جاۋ قۇرىعىنا ىلىككەن. ءبىراق سان قيلى تاعدىرىندا اجال تىرناعىنا ىلىنبەي، ولىمگە دە قاسقايا قارسى تۇردى.
سەرىك ءشايدازىموۆ، مايدانگەردىڭ ۇلى:
- ول سنارياد جارىلعان كەزدە توپىراقتىڭ استىندا قالىپ قويعان. سودان ەس- ءتۇزسىز جاتىپ قالعان. كەيىن ءيىسشىل يتتەر تاۋىپ الىپتى. سودان سوڭ گوسپيتالعا ءتۇسىپ، ەمدەلىپ شىققان. ءتىپتى اكەم ءوسىپ تۇرعان كارتوپتى قورەك قىلعان كۇندەر بولعانىن ايتادى.
تاريحي دەرەكتەر بويىنشا ۇلى وتان سوعىسى جىلدارىندا مايدانعا اتتانعان 1 ميلليون 200 مىڭ قازاقستاندىقتىڭ التىدان ءبىر بولىگى تۇتقىنعا تۇسكەن دەسەدى. ءبىراق جەڭىس تۋى جەلبىرەگەن كەزەڭدە ولاردىڭ 23 مىڭى عانا ەلگە ورالعان. باسىم بولىگى گەرمانيا كونسلاگەرلەرىندە قازا تاۋىپ، كەيبىرى وزگە ەلدەرگە جان ساۋعالاپ كەتكەنى جايلى دەرەكتەر بار. سوندىقتان ەلىمىزدە بوزداقتاردى تۇگەندەۋ قولعا الىندى. بۇل ىسكە جاۋاپتى ق ر پرەزيدەنتى مۇراعاتى كۇنى بۇگىنگە دەيىن 35 مىڭعا تارتا قازاقستاندىق تۇتقىن تۋرالى دەرەكتەر جيناپ، ولاردى ورتاق بازاعا توپتاستىردى.
بوريس جاپاروۆ، ق ر پرەزيدەنتى مۇراعاتىنىڭ ديرەكتورى:
- رەسەي مۇراعاتىندا وڭدەلمەگەن كوپتەگەن مالىمەت بار. بىلتىر ءبىزدىڭ قىزمەتكەرلەر ءبىراز ەسىمدەردى انىقتاپ كەلدى. ەندى ءارى قاراي ول جۇمىستى جالعاستىرۋىمىز كەرەك. گەرمانيانىڭ «فريدريح ەبەرت» اتىنداعى قورى ارنايى قاراجات ءبولىپ وتىر. سونىڭ ناتيجەسىندە 20 مىڭ بوزداقتىڭ ەسىمىن انىقتايمىز دەگەن ماقساتىمىز بار.
قىزىل اسكەر ساپىندا جان اياماي شايقاسىپ، كونسلاگەر تۇتقىنىنا تۇسكەن كوزى ءتىرى مايدانگەرلەرگە گەرمانيا ۇكىمەتى بيىل وتەماقى تولەيتىنىن مالىمدەدى. نەمىس تارابى ولارعا قارجىلاي كومەك بەرۋگە دايىن.
بوريس جاپاروۆ، ق ر پرەزيدەنتى مۇراعاتىنىڭ ديرەكتورى:
- گەرمانيا فەدەراتيۆتىك رەسپۋبليكاسىنىڭ ۇكىمەتى سوعىستىڭ اياقتالۋىنىڭ 70 جىلدىعىنا 2500 ەۋرو تولەيدى. ءبىز بۇرىنعى سوعىس تۇتقىندارىنىڭ بارلىعىنىڭ نەمىس ۇكىمەتىنە جىبەرىلەتىن قۇجاتتارىن تۇگەندەۋگە كومەكتەسىپ وتىرمىز.
ۇلى وتان سوعىسىنىڭ ارداگەرلەرى وسپان بەكسەيىتوۆ پەن اۋەزحان شايدازىموۆتەر گەرمانيا تاراپىنان بەرىلەتىن بۇل وتەماقىنى زاڭدىلىق دەپ سانايدى. ءبىراق قاريالار تۇتقىندا وتكىزگەن زورلىق-زومبىلىققا تولى جىلداردى ۇمىتۋ، جۇرەككە سالىنعان جارانى ءوشىرۋ مۇمكىن ەمەس ەكەنىن ايتادى.
www.24.kz
