د ن ك زەرتتەۋى قازاقتاردىڭ اندرونوۆتىقتارمەن جانە عۇندارمەن تۋىستىعىن قۋاتتادى
دەپ جازادى «ەكسپرەسس ك» گازەتى.
قازاقستاندىق عالىمدار قازاقتار مەن عۇن جاۋىنگەر حالقىنىڭ، سونداي- اق ارييلەر رەتىندە تانىمال اندرون مادەنيەتى وكىلدەرىنىڭ د ن ك- لارىن سالىستىردى. شامالانعانداي، بۇل ءۇش حالىقتىڭ اراسىندا جاقىن تۋىستىق بايلانىس انىقتالعان.
زەرتتەۋدى Shejire DNA جوباسىنىڭ باسشىسى جاقسىلىق ءسابيتوۆ جۇرگىزدى. باتىس عىلىمىندا اندرون مادەنيەتىنىڭ وكىلدەرىن اريلەر دەپ اتايدى. اتى اڭىزعا اينالعان ارقايىم قالاسىن سالىپ، العاشقى ەكى اياقتى كۇيمە اربانى ويلاپ تاپقان - وسىلار. ولاردىڭ مادەنيەتىنىڭ ىزدەرى سىبىردەن باستاپ، ءۇندىستانعا دەيىنگى الىپ اۋماقتا كەزدەسەدى. عۇندار كەرەيىت، ۋاق جانە سىرگەلى رۋلارىنان شىققان قازاقتارعا جاقىن بولىپ شىقتى. جاقسىلىق ءسابيتوۆ سولتۇستىك قىتايدىڭ اۋماعىنداعى ەگين- گول، دۋۋرليك نارس جانە باركول قورىمدارىندا جەرلەنگەن جاۋىنگەرلەردىڭ د ن ك- سىن زەرتتەگەن سوڭ وسىنداي پىكىرىن جاريا ەتتى.
عۇندار يەلىگى شامامەن 4 ميلليون شارشى مەتر اۋماقتى قۇراعان قۋاتتى رۋلى ەل بولعان. وسى جاۋىنگەر سالت اتتى كوشپەلىلەردەن قورعانۋ ءۇشىن، قىتاي يمپەراتورى سي شي حۋاندي ۇلى قىتاي قورعانىن سالدى. ءبىزدىڭ ءداۋىرىمىزدىڭ 1 - عاسىرىندا قىتاي يمپەرياسىمەن سوعىستا جەڭىلگەن كوشپەلىلەر باتىسقا قاراي ىعىسىپ، وزدەرىن عۇندار دەپ اتاي باستادى.
عۇنداردىڭ ورنىن سولتۇستىك قىتايدا جاۋىنگەر قيدان رۋى باستى. ولار بىرنەشە جۇزدەگەن جىل بويى شىعىس ازيادا ەڭ قۋاتتى يمپەريا دارەجەسىن ۇستاعان مەملەكەتتى قۇردى. اقىرى قيداندار شۇرجەندەردەن جەڭىلىپ، قازاقستان اۋماعىنا ىعىسىپ، قازاق حالقىنا كەلىپ قوسىلدى. ولار وزدەرىن نايماندار دەپ اتاعان (موڭعول تىلىندە «سەگىز» دەگەندى بىلدىرەدى). يمپەرياسى گۇلدەنگەن كەزدە قيدانداردىڭ سەگىز ۇلىسى بولدى.
