بيىل قازاقستاندا جەتى تۇرمە جابىلادى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتى الاڭىندا ءوتىپ جاتقان جاڭعىرتۋ جونىندەگى ۇلتتىق كوميسسيا مۇشەلەرىنىڭ باسپا ءسوز ءماسليحاتىندا ق ر پرەزيدەنت اكىمشىلىگى جەتەكشىسىنىڭ ورىنباسارى مارات بەكەتايەۆ ءمالىم ەتتى.
«2013 - جىلدان بەرى ساناعاندا، تۇرمەدەگى ادامداردىڭ سانى 21 پايىزعا ازايعان. تۇرمەدە وتىرعان ادامداردىڭ سانى ازايعاندىقتان، بيىل جەتى تۇزەتۋ مەكەمەسىن جابۋ جوسپارلانىپ وتىر. ال، وسىلايشا ۇنەمدەلگەن بيۋدجەت قاراجاتى مەن شتات قىزمەتكەرلەرىن پروباتسيا قىزمەتىن دامىتۋعا جانە ىلكى جوبا رەتىندە ەلەكتروندى براسلەتتەر ەنگىزۋ جوباسىن باستاۋعا جۇمساۋ كوزدەلىپ وتىر»، - دەپ حابارلادى م. بەكەتايەۆ.
م. بەكەتايەۆتىڭ حابارلاۋىنشا، قازىر «قىلمىستىق ءتارتىپ بۇزۋشىلىقتار كارتاسى» اتتى جوبا جۇزەگە اسىرىلۋدا. قازىردىڭ وزىندە حالىق استانا، الماتى، وبلىس ورتالىقتارى مەن 21 مونوقالادا جاسالعان قىلمىستار تۋرالى اقپارات الا الادى.
