ايتىسكەر اقىن اينۇر تۇرسىنبايەۆانى كۇيەۋىنەن اجىراستىرعان كىم؟

استانا. قازاقپارات - جۋىردا ايتىسكەر اقىن اينۇر تۇرسىنبايەۆانىڭ كۇيەۋىمەن اجىراسقانى تۋرالى سەنىمدى دەرەك كوزى مالىمدەگەن بولاتىن.

NUR. KZ ءتىلشىسى اڭگىمەنىڭ انىق-قانىعىن ءبىلۋ ءۇشىن اقىنعا حابارلاسىپ كوردى.

«جولداسىنىڭ فوتوسىن الەۋمەتتىك جەلىگە سالماعاندىقتان، سونداي ويعا كەلگەن شىعار. بۇرىن فوتوسىن سالىپ ءجۇرىپ، قازىر شىعارماي قويعان جوق. بۇل باستاپقىدان اينۇر حانىمنىڭ ۇستانىمى. ال وزدەرى ويدان شىعارىپ، قاۋەسەت تاراتاتىنداردىڭ نە كوزدەگەنىن ءبىز بىلمەيمىز. بۇل - ولاردىڭ قۇقى، تاڭداۋى»، - دەدى اقىننىڭ ديرەكتورى نۇرگۇل الدابەرگەنوۆا.

«بۇل - وتىرىك. وتباسىم ورنىندا»، - دەپ قىسقا قايىردى اينۇر تۇرسىنبايەۆانىڭ ءوزى بۇل اڭگىمەگە قاتىستى.

ەستەرىڭىزگە سالا كەتەيىك، وتباسى جايلى كوپ اشىلىپ سويلەمەيتىن اقىن 2013-جىلى «سىرلاسۋ» باعدارلاماسىنا كەلىپ، ءبىرىنشى كۇيەۋىمەن ايىرىلىسىپ كەتكەنىن، قازىرگى جولداسىمەن باقىتتى عۇمىر كەشىپ وتىرعانىن ايتقان ەدى.

«مەنىڭ اقىندىق ونەرىمە ول كىسىنىڭ بەرگەن باعاسى وتە جوعارى. ايتىسكەر اقىن رەتىندە مەنى وتە قاتتى باعالايدى. مەنىڭ ايتىستارىمدى وتە قاتتى ءسۇيىپ تىڭدايدى. ونىڭ باعالاۋىنشا مەنەن مىقتى اقىن جوق. مەن ورىن الماي قالعان ايتىس ول ءۇشىن ادىلەتسىز ايتىس بولىپ سانالادى. مەنىڭ ونەرىمدى سونشالىقتى ءسۇيىپ قارايتىن ادام مەنىڭ وزىمە دە جامان قارامايدى دەپ ويلاعان بولۋىم كەرەك»، - دەپ قازىرگى جارىنا توقتالا كەتكەن ەدى تۇرسىنبايەۆا.