قازاقستان بالا تۋۋ دەڭگەيىن ءتيىمسىز باقىلايتىن ەلدەردىڭ قاتارىنا ەندى

استانا. قازاقپارات - قازاقستان بالا تۋۋ دەڭگەيىن رەتتەۋ ادىستەرىن مۇلدە ءتيىمسىز قولداناتىن ەلدەر قاتارىندا تۇر دەپ حابارلايدى «ازاتتىق».

Thomson Reuters Foundation مەدياكومپانياسىنىڭ جازۋىنشا، الەمنىڭ 43 ەلىنىڭ اراسىندا زەرتتەۋ جۇرگىزگەن نيۋ-يوركتەگى گۋتماحەر ينستيتۋتىنىڭ وسى اپتادا جاريالاعان ەسەبىنە قاراعاندا، دامۋشى ەلدەردە بالا تۋۋ دەڭگەيىن رەتتەۋ ادىستەرىن مۇلدە ءتيىمسىز قولداناتىنى بايقالعان.

وسى ەلدەردە جىل سايىن جوسپارلانباعان جۇكتىلىك كورسەتكىشى 74 ميلليونعا جۋىقتاپ وتىر.

قازاقستان بالا تۋۋ دەڭگەيىن باقىلاۋ ادىستەرىن قولدانۋ تيىمسىزدىگى ەڭ جوعارى ەلدەر قاتارىندا اتالعان.

ول بەنين، بوليۆيا، برازيليا، بۋرۋندي، دومينيكان رەسپۋبليكاسى، ەگيپەت، يوردانيا، پاراگۆاي جانە تۇركيا سياقتى ەلدەرمەن بىرگە تىزىمگە ەنگەن.

زەرتتەۋدە نەگىزىنەن حالىق دەنساۋلىعىنىڭ جىنىستىق جانە ۇرپاق ءسۇيۋ قابىلەتى ماسەلەلەرىنە كوڭىل بولىنگەن. زەرتتەۋ بارىسىندا انىقتالعان جاعىمسىز قۇبىلىستاردىڭ سەبەپتەرى كورسەتىلمەگەن ءارى قوسىمشا تالداۋ قاجەت ەكەنى ايتىلعان.