استانادا ەكى بىردەي حالىقارالىق قۇرىلىس كورمەسى اشىلدى - فوتو
كورمەگە قاتىسۋ ءۇشىن قازاقستانعا 10 ەلدىڭ كومپانيالارى كەلدى.
«ونەر كاسىپ قۇرىلىس-استانا» كورمەسىندە جۇرتشىلىق نازارىنا قۇرىلىس ماتەريالدارىن، تاۋ-كەن ءوندىرىس ونەركاسىبىنە ارنالعان تەحنيكانى جانە باسقا دا ونىمدەر ۇسىنىلىپ وتىر. يران كومپانيالارى كورمەگە العاش رەت قاتىسۋدا.
كوپ جىلدار بويى وسى كورمە بارىسىندا كوپتەگەن ىسكەرلىك باعدارلامالار ىسكە اسىرىلىپ كەلەدى.
«ەكسپو جىلجىمايتىن مۇلىك-2016» كورمەسىنە توقتالاتىن بولساق، بۇل شارا قازاقستان مەن شەتەلدىڭ جىلجىمايتىن مۇلىگى نارىعى جايىندا اقپارات ۇسىنۋدىڭ بىرەگەي مۇمكىندىگىنە اينالىپ وتىر. كورمەگە كەلۋشىلەر تۇرعىن ءۇي جانە كوممەرتسيالىق جىلجىمايتىن مۇلىكتى، جەر تەلىمدەرىن ساتىپ الۋ، بيزنەستى شەتەلدە جۇرگىزۋ ماسەلەلەرى بويىنشا كەڭەس الادى.
ايتا كەتەيىك، قۇرىلىس سالاسىنداعى بۇل شارالاردى «اتاكەنت-ەكسپو» ح ك ك تاراپى ق ر ۇلتتىق ەكونوميكا مينيسترلىگىنىڭ، استانا اكىمدىگىنىڭ قولداۋىمەن وتكىزىپ جاتىر. كورمەلەر 31- ناۋرىزعا دەيىن جالعاسادى.
