تۇركياعا جولدارى جابىلعان رەسەيلىك تۋريستەر جازدا قازاقستانعا اعىلماق

استانا. قازاقپارات - جازدا قازاقستانعا كەلەتىن رەسەيلىك تۋريستەر اعىنى 200 مىڭنان استام ادامدى قۇرايدى، دەپ حابارلادى «كوممەرسانت».

باسىلىم جۇرگىزگەن ساۋالناما ناتيجەسىندە ءمالىم بولعانداي، تۋريستەردىڭ الداعى ماۋسىمدا ەڭ كوپ باراتىن جەرى ابحازيا بولماق. جازدا ابحازياعا 1, 5 ميلليون رەسەيلىك بارادى دەپ جوسپارلانۋدا، بۇل وتكەن جىلمەن سالىستىرعاندا 20 پايىزعا كوپ. گرۋزياعا، «دەلفين» كومپانياسىنىڭ باعالاۋىنشا، وسى جازدا رەسەيدەن 200-300 مىڭ تۋريست قاتىناماق. قازاقستانعا 100-200 مىڭ، قىرعىزستانعا 100 مىڭ، وزبەكستانعا - 50 مىڭ، تاجىكستانعا - 30 مىڭعا جۋىق تۋريست بارادى دەپ بولجانۋدا.

نارىق قاتىسۋشىلارى اتاپ وتكەندەي، بۇرىنعى كەڭەس وداعى رەسپۋبليكالارىنا ماسكەۋدەن عانا ەمەس، رەسەيدىڭ باسقا دا ءىرى قالالارىنان سۇرانىس ارتقان. «تۇركياعا جول جابىق، حالىق باسقا دەمالىس ورىندارىن ىزدەۋدە» ، - دەدى «سۆيازنوي ترەۆەل» كومپانياسىنىڭ ديرەكتورى الەكسەي دوروش.