عالىمدار ادام مۇرنىنىڭ ءوزى تەكتەستەرگە قاراعاندا ۇلكەن بولۋ سەبەبىن انىقتاي المادى

استانا. قازاقپارات - بيولوگتار ادام مۇرنىنىڭ ۇلكەندىگى تابيعي سۇرىپتالۋعا قاتىسسىز ءارى ول ەشقانداي پايدالى فۋنكتسيا اتقارمايدى دەگەن تۇجىرىم جاسادى.

ولاردىڭ ويىنشا مۇرىننىڭ ۇلكەندىگى Homo sapiens- ءتىڭ بەت-الپەتىنىڭ ەۆوليۋتسياسى كەزىندەگى كەرى سالداردان بولعان، دەپ جازادى PLoS Computational Biology جۋرنالى.

كوپتەگەن انتروپولوگتار ادامنىڭ ءىرى مۇرنى مايمىل سەكىلدىلەردىڭ كىشكەنە مۇرنىنا قاراعاندا وكپەگە كەلەتىن اۋانى جىلىتىپ نەمەسە سۋىتىپ بەرەتىن ءتيىمدى «كونديتسيونەر» دەپ سانايدى. الايدا كيوتو ۋنيۆەرسيتەتىنىڭ عالىمى تاكەسي نيسيمۋرا مەن ونىڭ ارىپتەستەرى جوعارىداعى تۇجىرىمنىڭ قاتە ەكەندىگىن انىقتادى.

جاپون عالىمدارى التى ادامنىڭ، ءتورت شيپانزە جانە التى ماكاكا مايمىلىنىڭ مۇرنى مەن مۇرىن قۋىستارىن سكانەرلەگەن. ودان كەيىن قۋىس ارقىلى تىنىس اعىنىن جانە ول ارقىلى سۋىق جانە قۇرعاق، ىستىق جانە قۇرعاق، جىلى جانە ىلعالدى اۋا تۇرلەرىن «كونديتسيونەرلەۋىن» مودەلدەپ شىققان. ناتيجەسىندە مۇرنى كىشىرەك مايمىلدىڭ اۋانى اناعۇرلىم جاقسى «وڭدەيتىنى» انىقتالعان. وسىلايشا زەرتتەۋشىلەر ۇلكەن مۇرىن Homo sapiens-كە ارتىقشىلىق بەرمەيتىندىگىن مويىنداپ ءارى ونى كەزدەيسوق جولمەن «ۇلكەيىپ» كەتكەن دەپ بولجام جاسادى.

عالىمدار ادامنىڭ مۇرنى عانا ەمەس باسقا دا مۇشەلەردىڭ فۋنكتسياسىنا دا قاتىستى ورتاق شەشىمگە كەلە الماي ءجۇر. ايتالىق ادامنىڭ يەگىنىڭ شوشاقتىعى دا ءالى كۇنگە شەيىن جۇمباق. بىرەۋلەر ونى كەزدەيسوق پايدا بولدى، نەمەسە سوققىدان قورعانۋ ءۇشىن تۇرلەنگەن دەپ سانايدى.