ق ر ي د م كوميسسياسى ۇشاقتىڭ اپاتتى جاعدايدا قونۋ سەبەپتەرىن انىقتايتىن بولادى
بۇل تۋرالى ق ر ينۆەستيتسيا جانە دامۋ ءمينيسترى اسەت يسەكەشيەۆ ءمالىم ەتتى.
شۇعىل دەرەكتەرگە قاراعاندا، «Bek Air» اۆياكومپانياسىنىڭ «فوككەر-100» ءتيپتى اۋە كەمەسى «قىزىلوردا- استانا» باعدارىمەن رەيس ورىنداۋى بارىسىندا ءشاسسيدىڭ الدىڭعى تىرەۋ تاعانىنسىز اپاتتىق جاعدايدا جەرگە قونعان، دەپ حابارلادى ق ر ي د م باسپا ءسوز قىزمەتى.
كەستە بويىنشا ۇشاق استاناعا 09.45-تە قونۋعا ءتيىس بولاتىن. الايدا شتاتتان تىس جاعدايدا ءورت شىعۋ قاۋپىن مەيلىنشە ازايتۋ قاجەت بولدى. وسىعان بايلانىستى ۇشاق اۋەدە قوسىمشا 50 مينۋتتەي ۋاقىت ۇشىپ ءجۇردى. ول ەكى ورتادا استانا اۋەجايى ءورت بولۋ قاۋپىنىڭ الدىن الۋ ماقساتىندا ۇشۋ- قونۋ جولاعىن كوبىككە تولتىردى. قوسىمشا 7 ءورت تەحنيكاسى مەن 4 جەدەل جاردەم ماشيناسى ازىرلەندى.
ۇشاق 10.36 - دا قوندى. ۇشاق بورتىندا 116 جولاۋشى مەن 5 ەكيپاج مۇشەسى بولدى. جاپا شەككەندەر جوق.
اۋەجايدىڭ، قالانىڭ شۇعىل قىزمەتتەرىنىڭ ۇيلەسىمدى جۇمىسى مەن اۋە كەمەسى ەكيپاجىنىڭ جوعارى كاسىبيلىگىن اتاپ وتكەن ءلازىم.
قازىرگى ۋاقىتتا ق ر ي د م ارنايى كوميسسياسى قۇرىلدى. زەرتتەۋ ناتيجەسى كەيىنىرەك حابارلاناتىن بولادى.
كۋاگەرلەردىڭ ايتۋىنشا اۋە كەمەسىنىڭ الدىڭعى دوڭگەلەگى اشىلماي قالعان. دوڭگەلەكتىڭ ىستەن شىعۋىنا بايلانىستى ۇشاق 30 مەتر جەرگە دەيىن تۇمسىعىمەن جەر ءسۇزىپ بارىپتى. ال اۋە لاينەرىن كۇتىپ العان ءورت سوندىرۋشىلەر ماڭايعا كوبىك شاشىپ، قاتەردىڭ الدىن الۋعا تىرىستى. ابىروي بولعاندا ۇشاقتى تىزگىندەگەن تاجىريبەلى ۇشقىشتىڭ ارقاسىندا ەشكىم زارداپ شەككەن جوق. دەگەنمەن قۇتقارۋشىلار جولاۋشىلار اۋە كولىگىنەن تۇسە سالىسىمەن، ولاردى دەرەۋ قاۋىپسىز جەرگە الىپ كەتتى. وقيعا بۇگىن تاڭعى ساعات 10:30 شاماسىندا بولعان.
بۇل دەرەكتى استانا اۋەجايىنىڭ باسپا ءسوز قىزمەتى راستاپ وتىر.
نۇرلان جۇماسۇلتانوۆ، Bek Air اۋە كومپانياسى ديرەكتورلار كەڭەسىنىڭ ءتوراعاسى:
- ۇشقىش قونار الدىندا ۇشاقتىڭ تۇمسىعىن جوعارى كوتەرىپ وتىرعان. سوندىقتان سالوندا تەحنيكالىق اقاۋ ايتارلىقتاي سەزىلمەگەن. ۇشاق كومانديرى ناعىز شەبەرلىك تانىتتى. ونى مەملەكەتتىك ماراپاتقا دا ۇسىنۋعا بولادى. ال جولاۋشىلاردىڭ بارلىعى ءدىن امان.
