اقپاراتتاندىرۋ جانە بايلانىس كوميتەتىنىڭ ەكس-باسشىسى مەن ورىنباسارى جانە «قازاق تەلەكوم» ا ق ستراتەگيالىق باسقارۋ جونىندەگى باس ديرەكتورى ۇستالدى

استانا. قازاقپارات - الماتى قالاسىنىڭ سىبايلاس جەمقورلىققا قارسى كۇرەس قىزمەتى اقپاراتتاندىرۋ جانە بايلانىس، «قازاق تەلەكوم» اكسيونەرلىك قوعامى، سونداي-اق «قازتاگ» ح ا ا» ج ش س- نىڭ لاۋازىمدى تۇلعالارىنىڭ اسا ءىرى كولەمدەگى مەملەكەتتىك قاراجاتتى ۇرلاۋ فاكتىلەرى بويىنشا قىلمىستىق ىستەردى تەرگەۋ امالدارىن جالعاستىرىپ جاتىر.

بۇل تۋرالى ق ر مەملەكەتتىك قىزمەت ىستەرى مينيسترلىگىنىڭ سىبايلاس جەمقورلىققا قارسى تۇرۋ ۇلتتىق بيۋروسى حابارلادى.

وسىلايشا، تەرگەۋ 2010-2015 -جىلدارى مەملەكەتتىك ساياساتتى اقپاراتتىق العا جىلجىتۋعا بولىنگەن 160 ميلليوننان استام تەڭگە ۇرلانعانىن انىقتادى.

ۇرلىق جاساۋ كۇدىگىمەن 25 -ناۋرىزدا كوميتەتتىڭ بۇرىنعى باسشىسى بەرسەبايەۆ پەن كوميتەت ءتوراعاسىنىڭ ورىنباسارى ارپابايەۆ ۇستالدى.

اتالعان تۇلعالار «قازتاگ» اگەنتتىگىمەن عانا شارت ورناتۋ ءۇشىن قاساقانا جاعدايلار جاساپ، سول ارقىلى مەملەكەتتىك ساتىپ الۋلار تۋرالى زاڭناما تالاپتارىنىڭ ورەسكەل بۇزىلۋىنا جول بەردى.

وسىلايشا، مەملەكەتتىك تاپسىرىستى ورىنداۋعا باسقا باسەكەلەستەر الىنىپ تاستالدى.

بۇدان باسقا، مەملەكەتتىك ساياساتتى العا جىلجىتۋ تەگىن، تۇرعىندار ءۇشىن اشىق جانە قولجەتىمدى رەجيمدە جۇزەگە اسىرىلۋى ءتيىس بولعان.

الايدا، مەملەكەت تولەگەن ماتەريالدار اقپاراتتىق اگەنتتىكتىڭ سايتىندا جابىق فورماتتا ورنالاستىرىلىپ، پايدالانۋشىلاردان قوسىمشا تولەم تالاپ ەتتى.

بيۋدجەتتىك قاراجات «قازتاگ» اقپاراتتىق اگەنتتىگىنىڭ ەسەپ شوتىنان «ۇلتتىق باسپا ءسوز كلۋبى» اففيليرلىك قوعامدىق بىرلەستىككە اقشانى جالعان نەگىزدە اۋدارۋ جولىمەن ۇرلانعان.

***

تاعى ءبىر فاكت %51 اكتسياسى مەملەكەتكە تيەسىلى «قازاق تەلەكوم» ا ق لاۋازىمدى تۇلعالارىنىڭ 260 ميلليون تەڭگەنى جىمقىرۋىمەن بايلانىستى.

قاراجات قوعامنىڭ اقپاراتتىق- جارنامالىق ماتەريالدارىن باسپا باسىلىمدارىندا جاريالاۋعا ارنالعان. بۇل ءۇشىن جوعارىدا ايتىلعان «ۇلتتىق باسپا ءسوز كلۋبى» قوعامدىق بىرلەستىگىمەن شارت جاسالعان.

تەرگەۋ بارىسىندا انىقتالعانداي، اكسيونەرلىك قوعام قىزمەتتىڭ ەكى ەسەلەنگەن سوماسىن تولەپ، كەيىن ونى قالتاسىنا باسقان.

25 -ناۋرىزدا مەملەكەت قاراجاتىن ۇرلادى دەگەن كۇدىكپەن اكسيونەرلىك قوعامنىڭ ستراتەگيالىق باسقارۋ بويىنشا باس ديرەكتورى ب. ماحانبەتاجيەۆ ۇستالدى.

بۇرىن حابارلانعانداي، ماتايەۆ «ءۇي قاماعىنا» الىندى.

***

سونىمەن قاتار، سەيتقازى ماتايەۆ «ۇلتتىق باسپا ءسوز- كلۋبى» ق ب- نىڭ 326,9 ميلليون تەڭگە سوماسىنداعى سالىعىن تولەۋدەن جالتاردى دەگەن كۇدىك بار.

باسپا ءسوز كلۋبىنىڭ كاسىپكەرلىك قىزمەتىنەن (كەڭسەلەردى جالعا بەرۋدەن) تاپقان 1,4 ميلليارد تەڭگە كولەمىندەگى تابىسىنىڭ سالىعىن تولەمەۋ سالدارىنان وسىنداي قارىز قالىپتاسقان.

بارلىق فاكتىلەر بويىنشا تەرگەۋ امالدارى جۇرگىزىلىپ جاتىر. ونىڭ ناتيجەسى تۋرالى زاڭدا بەكىتىلگەن تارتىپپەن جۇرتشىلىققا جەتكىزىلەدى.