مامونتتىڭ قاڭقاسىن تاپقان قىرعىز جاستارىنا سمارتفون تابىس ەتىلدى
ىستىقكول وبلىسىنىڭ اكىمشىلىگىنىڭ حابارلاۋىنشا، وبلىستىق ك. جانتوشيەۆ اتىنداعى مۋزىكا دراما تەاترىندا ستۋدەنتتەر مەن جاستار ۇيىمدارىنىڭ باسقوسۋى وتكىزىلگەن.
وسى جيىندا وبلىس اۋماعى بويىنشا ۇكىمەتتىڭ ۋاكىلەتتى وكىلى اسقات اكىبايەۆ وترادنوە اۋىلىنىڭ اكىمى باقىت جۇمابەكوۆ، كىشى ميليتسيا لەيتەنانتى نۇرلان ۇسىپبايەۆ، سونداي- اق ورلينوە اۋىلىنىڭ تۇرعىندارى قانات بولوتوۆ، ەرمەك جانە ەرلان كۇلەتوۆتارعا دالا ءزىلىنىڭ قاڭقاسىن تاپقانى ءارى ارنايى مەكەمەگە تاپسىرعانى ءۇشىن العىس ءبىلدىرىلدى.
«الىپ جانۋار قاڭقاسىنىڭ مادەنيەت جانە تاريح جىلىندا اشىلعانى جاقسىلىقتىڭ نىشانى. وسىنى تاۋىپ ءارى بىزگە تاپسىرعان جاستارعا العىس ايتامىن، بۇل جاڭالىق الەم تاريحى مەن ونىڭ ەۆوليۋتسياسىنداعى جاڭا پاراقشانى اشتى»، - دەدى اسحات اكىبايەۆ.
اۋىل تۇرعىندارىنىڭ ازاماتتىق ءىسىن ەستىگەن «كاسسانا مينەرالس» مەكەمەسىنىڭ باسشىلىعى ءۇش جىگىتكە سمارتفون سىيلاعان.
«بۇل ىستىقكول جەرىندەگى تابىلعان سوڭعى تاريحي قۇندىلىق ەمەستىگىنە سەنەمىن، كەلەسى جولى جادىگەر تابىلسا جىگىتتەر ونى ءوز سمارتفوندارىمەن سۋرەتكە ءتۇسىرىپ الادى»، - دەدى «كاسسانا مينەرالس» مەكەمەسىنىڭ ديرەكتورى تالانت مەدەروۆ.
