پارتيا جەتەكشىلەرى جاپپاي داۋىس بەردى

استانا. قازاقپارات - بۇگىن قازاقستاندىقتار ءۇشىن تاعىلىمى مول تاريحي كۇن.

ەلىمىزدىڭ تۇكپىر- تۇكپىرىندە ەل ازاماتتارى ءوز تاڭداۋىن جاسادى. بۇل مالىمەتتىڭ باتىس وڭىرىنە قاتىسى جوق.

ويتكەنى بۇل ايماقتاردا وزگە وڭىرلەردەن 1 ساعات ۋاقىت ايىرماسى بار. قاي پارتيانىڭ باسىمدىق تانىتقانىن تەك سايلاۋدىڭ تۇپكى قورىتىندىسى كورسەتەدى. دەگەنمەن ءار پارتيا جەتەكشىلەرى جەڭىستەن ءۇمىتتى. ەلوردالىقتار ەلىمىزدەگى سايلاۋدا ەرەكشە بەلسەندىلىك بايقاتۋدا. ماسەلەن، استاناداعى №16 سايلاۋ ۋچاسكەسىندە داۋىس بەرۋى ءتيىس 2 مىڭنان استام ادامنىڭ باسىم بولىگى تۇسكە دەيىن- اق ءوز تاڭداۋلارىن جاساپ ۇلگەردى.

ولاردىڭ اراسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ تە بولدى. تاڭداۋ جاساۋدا كوپ كىدىرمەگەن مىرزاحمەتوۆ مىرزادان سەنىمدىلىك بايقالدى. قازاقستان كوممۋنيستىك حالىق پارتياسىنىڭ كوشباسشىلارى ءارى ق ر پارلامەنتى ءماجىلىسى دەپۋتاتتىعىنا ۇمىتكەرلەر ۆلاديسلاۆ كوساريەۆ پەن ايقىن قوڭىروۆ تا ءوز سايلاۋ ۋچاسكەلەرىندە العاشقىلاردىڭ ءبىرى بولىپ تاڭداۋ جاسادى. بيۋللەتەنىن تولتىرىپ، جاشىككە سالعان سوڭ، ۆلاديسلاۆ كوساريەۆ «پارتيامىز ۇگىت- ناسيحات شارالارىن ويداعىداي وتكىزدى» دەپ پىكىرىمەن ءبولىستى.

ۆلاديسلاۆ كوساريەۆ، ق ك ح پ وك ساياسي بيۋرو مۇشەسى:

- بۇگىن ەلىمىز ءۇشىن تاريحقا ەنەتىن كۇن. سەبەبى قازاقستان رەسپۋبليكاسىنىڭ داۋىس بەرۋ قۇقى بار ءار ازاماتى ءوزىنىڭ ىشكى تۇيسىگى ارقىلى ازاماتتىق تاڭداۋىن جاسايدى. تۇرعىنداردىڭ بۇگىنگى بەلسەندىلىگى جوعارى دارەجەدە كورىنىس تابادى جانە سايلاۋشىلاردىڭ سايلاۋعا كەلۋ كورسەتكىشى ايتارلىقتاي بولادى دەپ ۇمىتتەنەمىن.

ساياسي دودا بارىسىندا «اق جول» پارتياسىنىڭ ءتوراعاسى ازات پەرۋاشەۆ وتباسىمەن بىرگە ءوزى تىركەلگەن سايلاۋ ۋچاسكەسىنە بارىپ، تاڭداۋىن جاسادى. «اق جول» پارتياسى اعىمداعى سايلاۋعا 35 كانديدات ۇسىنىپ وتىر. ولاردىڭ دەنى كاسىپكەرلەر مەن زيالى قاۋىم وكىلدەرى.

ازات پەرۋاشەۆ، «اق جول» ق د پ ءتوراعاسى:

- سايلاۋ ءاربىر پارتيا ءۇشىن ەمتيحانداي. وتكەن جولى سايلاۋشىلارىمىزعا بەرگەن ۋادەلەرىمىزدى ورىندادىق، ورىنداي المادىق. سايلاۋشىلارىمىزدىڭ كوڭىلىنەن شىقتى ما، شىقپادى ما دەگەندەي وتىرمىز. جەڭىس كۇتەمىن.

استاناداعى №258 -سايلاۋ بولىمشەسىندە «بىرلىك» پارتياسىنىڭ ءتوراعاسى سەرىك سۇلتانعالي دا داۋىس بەردى. ۇيىم ءتوراعاسى كوتەرىڭكى كوڭىل- كۇيمەن كەلگەنىن ايتا كەلە، سايلاۋدىڭ دەموكراتيالىق تالاپتارعا ساي تىنىش ءوتىپ جاتقانىن اتاپ ءوتتى. سونداي- اق ول بارشا حالىقتى ساياسي ناۋقاندا بەلسەندىلىك تانىتۋعا شاقىردى. ايتا كەتەيىك، «بىرلىك» پارتياسى پارلامەنت ءماجىلىسىنىڭ سايلاۋىنا ءبىرىنشى رەت قاتىسىپ وتىر.

سەرىك سۇلتانعالي، «بىرلىك» پارتياسىنىڭ ءتوراعاسى:

- كوڭىل- كۇي جاقسى. سايلاۋ دەگەن مەيرام عوي. شەتەلدەن كەلگەن باقىلاۋشىلار ەرەكشە قاراپ جاتىر. سەبەبى، بارلىق پارتيالارعا تەڭ مۇمكىندىك بەرىلىپ جاتىر. ءبىزدىڭ پارتيامىز ءبىرىنشى رەت قاتىسىپ وتىر سايلاۋعا. ارينە، كۇشىمىزدى بايقاۋىمىز كەرەك. سەگىز كانديداتىمىز بار. بۇيىرعانىن كورەمىز.

ج س د پ- نىڭ ءتوراعاسى جارماحان تۇياقباي الماتىداعى №159 سايلاۋ ۋچاسكەسىندە داۋىس بەردى. «بۇگىن ەلىمىزدىڭ ءار ازاماتى كونستيتۋتسيالىق قۇقىعىن ءبىلدىرىپ، ءوزىنىڭ قالاعان پارتياسىن تاڭداۋى كەرەك»، - دەپ اتاپ ءوتتى ءتوراعا. «20 -ناۋرىز قازاقستان ءۇشىن تاريحي كۇن. ازاماتتار پارلامەنت ءماجىلىسى دەپۋتاتتارىنىڭ سايلاۋىندا داۋىس بەرۋ ارقىلى ءوز بولاشاعىن تاڭدايدى. ءماجىلىستىڭ جاڭا قۇرامى، مەملەكەتتە قولعا الىنىپ جاتقان رەفورمالاردىڭ ساپالى ىسكە اسۋىنا اتسالىسادى».

«اۋىل» حالىقتىق- دەموكراتيالىق پاتريوتتىق پارتياسىنىڭ ءتوراعاسى ءالي بەكتايەۆ وسىنداي پىكىردە. پارتيا جەتەكشىسى ءوزىنىڭ وتباسىمەن بىرگە استاناداعى №91 -سايلاۋ ۋچاسكەسىنە كەلىپ داۋىس بەردى. ءالي بەكتايەۆ ۇگىت-ناسيحات ناۋقانى كەزىندە بارلىق پارتيالارعا بىردەي جاعداي جاسالعانىن اتاپ ءوتتى.

ءالي بەكتايەۆ، «اۋىل» ح د پ پ ءتوراعاسى:

- مىنا جەردە داۋىس بەرىپ جاتقان سايلاۋشىلار وتە كوپ. سوعان ءبىز قۋانىپ وتىرمىز. سەبەبى قازاقستان حالقى ەلىمىزدىڭ ەرتەڭىنە بەيجاي قاراپ وتىرعان جوق. كەلىپ داۋىس بەرىپ، سايلاۋعا قاتىسىپ جاتىر دەگەن ءسوز -  ءبىزدىڭ بولاشاعىمىزدى، ەلىمىزدىڭ بولاشاعىن ويلاۋ دەگەن ءسوز. ەستەرىڭىزگە سالا كەتەيىك، سايلاۋدىڭ الدىن الا قورىتىندىسى بۇگىن تۇنگى 00:00-دەن كەيىن بەلگىلى بولادى. اۆتورلارى: ەلدار باقپايەۆ، ومىربەك ءىزىموۆ

24.kz