ەرلانبەك كاتەي ۇلىن استانا قالاي قۇرمەتتەدى؟ - فوتو
بۇل اقجولتاي جاڭالىعىمىز ءسۇت ءپىسىرىم ۋاقىتقا جەتپەي التاي مەن اتىراۋ، ارقا مەن الاتاۋ اراسىنداعى ۇلانعايىر دالاعا كەڭىنەن جايىلىپ، قۇتتىقتاۋلار قارشا بورادى. ميللياردتار ەلىندە جۇرسە دە، قازاقتىڭ ابىرويىن اسىرىپ جۇرگەن ازاماتتىڭ ەرلىگىنە سۇيىنگەن جۇرت العىستان باسقا ايتارى بولمادى.
كەشە، كەشتە اتا-جۇرتىنا كەلىپ، ءار ءتۇرلى كاسىپپەن اينالىسىپ جۇرگەن كاسىپكەر قانداستارىمىز، ەل ازاماتتارى ەرلانبەكتىڭ جەڭىسىنىڭ قۇرمەتىنە بالۋان مەن باپكەرىنە، سونداي-اق، گرەك-ريم كۇرەسىنەن قىتاي قۇراماسىن باستاپ كەلگەن قازاق باپكەرى ءالنۇر تورگە ۇلىنا اق داستارحان جايىپ، اتا-سالتىمەن ۇستىلەرىنە شاپان جاپتى. جانكۇيەر اعالارى اق باتاسىن بەرىپ، الداعى وليمپياداعا اقجول تىلەدى.
اتا- جۇرتىنىڭ استاناسىندا قارسىلاستارىن ۇرشىقشا يىرىگەن ەرلانبەككە جانكۇيەرلەردىڭ قالاي قولداۋ كورسەتكەنىن بەينەلەۋگە ءتىل قۇرعىر جەتپەي جاتىر. ءتىپتى، بوز كىلەمنەن الىستا، «جۇمساق» ورىندىقتارعا جايعاسىپ، بالۋانداردىڭ ونەرىن سىرتتاي باقىلاپ وتىرعان كەڭەس وداعى تۇسىندا- اق، اتى اڭىزعا اينالعان، قازاقتىڭ ايگىلى بالۋانى داۋلەت تۇرلىقانوۆ اعامىزدىڭ ءوزى ەرلانبەك باۋىرىنىڭ بەلدەسۋىندە ورىنىنان تۇرىپ كەتتى. قيقۋعا باسىپ، قۇلاشىن كەرە شاپالاق ۇرىپ، ارى- بەرى تەڭسەلىپ تۇردى. مىنە، بۇل ايگىلى بالۋاننىڭ الستا جۇرگەن قانداسىنا دەگەن شىنايى قۇرمەتى مەن ونەرىنە ءسۇيىنۋى ەدى. بۇل عانا ەمەس، ازيانىڭ ءار ەلىنەن كەلگەن قاسقالار مەن جايساڭدار دا ەرلانبەكتىڭ قارسىلاسىنا قارسى جاساعان ءادىس- تاسىلدەرى مەن قيمىل- قوزعالىستارىن، جەڭىسكە دەگەن قۇشتارلىعى مەن جالىندى جىگەرىنە ەرىكسىز باستارىن ءيىپ، شۇلعىپ تۇردى. ال جەرگىلىكتى جانكۇيەرلەر ەرلانبەك بەينە ءبىر، قازاق ەلىنىڭ اتىنان شىعىپ جاتقانداي، ەسىمىن ۇرانداتا ايعايعا باستى. «ەرلانبەك!»، «ەرلانبەك!»، «ەرلانبەك!»، «قازاق!»، «قازاق!»، «قازاق!»، دەگەن داۋىستان ستاديوننىڭ قابىرعاسى جارىلىپ كەتۋگە شاق تۇردى. مىنە، بۇل قايدا جۇرسە دە، قازاقتىڭ قازاققا دەگەن قانى، ىقىلاسى، قۇرمەتى، باۋىرمالدىعى، ۇلتجاندىلىعى قانداي ەكەنىن ءبىر ايگىلەپ تاستادى. ازيا ەلدەرىنەن كەلگەن 30 عا جۋىق ەلدىڭ وكىلدەرى دە قازاقتىڭ باۋىرمالدىعىنا ەركىسىز باس يگەنى انىق...
ءيا، ەرلانبەك باۋىرىمىز ءوز ماقساتىن ورىندادى. دەگەنىنە جەتتى. بۇل جارىستا باستى ماقسات - التىن ەمەس، جولداما بولاتىن. سول ءۇشىن دە جولدامانى ۋىسىنا ۇستاعان سوڭ، فينالعا شىعۋدان باس تارتتى. بۇل شەشىمىن دە، كوكىرەگى وياۋ، كوزى اشىق جانكۇيەرلەر وتە ورىندى «شەشىم» دەپ باعالادى.
ال جارىستان كەيىن، ەرلانبەكتىڭ ارتىنان بىرگە سۋرەتكە ءتۇسىپ، قولتاڭبا الۋ ءۇشىن جۇگىرگەن جانكۇيەرلەردە ەسەپ بولمادى. ءتىپتى، بەلگىلى تانىمال تۇلعالار قوناققا شاقىرىپ، تالاسىپ جاتتى...
مىنە، بۇل قازاقتىڭ قايدا جۇرسە دە، ءبىر- بىرىنە دەگەن ولشەۋسىز قۇرمەتىنىڭ ايعاعى.
اللا ەرلانبەك باۋىرىمىزعا ساتتىلىك بەرىپ، ريودا جەڭىس تۇعىرىنان كورسەتۋگە ءناسىپ ەتكەي!!!!
كۇنسۇلتان وتارباي
