جاتىپ اتار - وگىزگە تۋعان كۇن
كەي قىلىعىنا قاراپ قارنىڭ اشادى. جەلپ- جەلپ، كەي تىرلىگى شالدىكى ەمەس، شالانىكى.. . ىشىرتكىسىن ءىشىپ الىپ گوي- گويلەگەنىندە «اكەم ەدى» دەگەننەن ءبىرجولا باس تارتقىڭ دا كەلىپ كەتەدى.. . «كەلىن بار- اۋ، نەمەرە دە ەسەيدى» دەمەيدى، اۋزىنان ءسوزى، وزىنەن ءبوزى ءتۇسىپ تۇگەسىلەتىنى تۇڭىلتەدى.. . ويپىر- اي، كەيبىر قۇرداستارى سياقتى سالماقتى دا ساليقالى قالىپقا تۇسەر كەزى بولار ما ەكەن! اتالى ءسوز ايتىپ، كورەگەندى قىلىق تانىتار اكەدەن اينالىپ كەتپەيسىڭ بە! «اتتەڭ، اكەمسىڭ، ايتپەگەندە ايتار ەدىم!» دەپ بارماق تىستەپ باقالشى بولعانى بار.
سويتكەن اتام دا باقيلىق بولعان. زۋلاعان ۋاقىت، مەن اكەمنىڭ جاسىنا كەلىپ، اكەم اتامنىڭ كەيپىن كيگەن.. .
«تارتپاساڭ تۋماعىر» دەگەن بار، قارتايعانىندا اكەم اتامنىڭ «كەيپىن» كيگەنى.. .
ءبىر كۇنى اكەمنىڭ اكىرەڭ قىلىعى ءوتىپ كەتكەن بولۋى كەرەك، وڭاشادا: «اتتەڭ، اكەمسىڭ، ايتپەگەندە كەرى كەتكەن قىلىعىن بەتىنە باسار ەدىم- اۋ!. قىلىعى قىلىق ەمەس، قاراپ وتىرىپ جىنىڭ كەلەدى. كەمپىرىمەن كەرىلدەسكەنى بىلاي تۇرسىن، كورشى- كولەم، تۋىس- جەكجاتپەن دە ءيت پەن مىسىقتاي.. . جەلپ- جەلپ، كوپ قىلىعى شالدىكى ەمەس، ناعىز شالانىكى.. . اتا ساقالى اۋزىنا تۇسكەندە دە اراعىن قويماۋدان وتكەن ولەرمەندىك جوق ەكەن. ىشىرتكىسىن ءىشىپ العانداعى كەيپىن كورسەڭ.. . باز كەشىپ، بەزىپ كەتۋگە بارمىن. اتتەڭ، تورىنەن كورى جاقىن كەزىندە تاستاپ كەتۋ وبال- اق. ويپىر- اي، ساليقالى دا سالماقتى قالىپقا تۇسەر كەزى بولا ما ەكەن! جونىمەن قارتايىپ، بەدەل- قاسيەتىن ساقتاي بىلگەن اكەدەن اينالدىم! اتتەڭ، اكەمسىڭ، ايتپەگەندە ايتار ەدىم- اق!» دەپ وكىرەڭدەپپىن.
«وگىزگە تۋعان كۇن بۇزاۋعا دا تۋادى» دەگەن بار.. .. ءبىر كۇنى بالام اراعىنا تويىپ كەلىپ: «اتتەڭ، اكەمسىڭ!» دەپ باستاپ.. . ايتپاعانى جوق، ءيت تەرىمدى باسىما قاپتاسىن كەپ.. . ءاي، ءيت- اي، ايتارىن ايتسا دا، قىلجيارىنداعى سوڭعى ءسوزى «اتتەڭ، اكەمسىڭ، ايتپەگەندە ايتار ەدىم!» بولدى.
قايتەيىك، باسقا تۇسسە، باسپاقشىل دەگەن.. . باعانادان بەرگى بۇل «تەگىن كونسەرتتى» ەس ءبىلىپ، اقىل توقتاتقان نەمەرەم زەيىن قويا تىڭداپ وتىر ەكەن.. . بۇعان دا شۇكىرشىلىك.. .
بەرىك سادىر،
«جاتىپاتاردىڭ» استاناداعى تىڭشىسى
شاحمات شاھارىنداعى «شاتاق»
بۇگىن شاحمات شاھارىنىڭ ءتورت بۇرىشىن ولاي دا، بۇلاي دا كەزەتىن، جاقپاعان بۇرىشىنان باسىن الا بەزەتىن، توڭعان جەرىندە سەكىرىپ، تويعان جەرىندە كەكىرىپ، رەتى كەلسە لەپىرىپ، ماڭدايىمنان تەر شىقتى دەپ شەشىنىپ جۇرگەن «ايدىك» ءبيى اۋىسىپ كەتتى. مۇنى ەستىگەن مايدا- شۇيدە پەشكالار «اۋىشىپ» جاتىر، ءدال سول كۇيىندە جاڭا بيمەن قاۋىشىپ جاتىر، ول دا كەلە سالىسىمەن ءتوزىمنىڭ ءتۇبىن تاۋىسىپ جاتىر. ەسكى بيمەن ەتەنە ارالاساتىندار جىلاپ ءجۇر، اندا ءبىر، مىندا ەكى سەكىرەتىن ونى ۇستاي المايتىندار سىناپ ءجۇر. ايتەۋىر ول تۋرالى بار اقپاردى قۇراق كورپەشەدەي قۇراپ ءجۇر. بىرەۋلەرى مەزگىلىندە كەتىپ تىنعانىنا قۋانىپ ءجۇر، ەندى بىرەۋلەرىنىڭ جانارى سۋالىپ ءجۇر. بۇرىنعى ءبيسىز اتتاپ قادام باسا المايتىنداردىڭ كوپ ويلانعاننان باس ميلارى قۋارىپ ءجۇر.
بۇعان دەيىن شاحماتتىڭ ويىنى قۇساتىپ ويناتىپ كەلگەن تەرريتوريانى باسقا پاتشالىقتان كەلگەن حان جاۋلاپ الدى. بۇرىنعى ءۇردىستىڭ بارلىعىن جايپاپ، ءتورت بۇرىشتى اپتاسىنا ءبىر رەت شايقاپ، تەگەۋرىنى مىقتىلاردى تايپاپ تاستايتىن قارقىنمەن كەلدى، ءجۇزى قاتىڭقى سالقىنمەن ەندى. ال ويلاناتىن نارسە، كىمنىڭ قابىرعاسى قايىسار ەكەن، كىمنىڭ ءمۇيىزى مايىسار ەكەن؟ قايسىسىنىڭ بۇعاناسى سىنار ەكەن، قايسىسىنىڭ شارۋاسى العا باسىپ، تىرلىگى تىنار ەكەن؟ قاي بۇرىشتاعىنىڭ باسى جارىلار ەكەن، وكپەسى قابىنار ەكەن، كىمنىڭ اۋزى مايلى جىلىككە مالىنار ەكەن؟ بۇعان دەيىن كەيبىرەۋلەر تۋىستانىپ كۇلسە، بۇدان كەيىن ءاربىر مايدا- مايدا كۆادراتتاردى مەنشىكتەپ العاندار قۋىستانىپ، شاشقان جەرلەرىن جيناماعاندار ۋىستانىپ جۇرەر مە ەكەن؟ پاتشالىقتىڭ قاباق- بۇلتى اشىلار ما ەكەن، الدە اجداھا- اۋىزدان زاھار شاشىلار ما ەكەن؟ مۇنى ويلاعاندار تەرەڭ ويعا شومىپ، باستارىن قاسىنار ما ەكەن، الدە شاپپا- شاپ بەرىپ قارۋلارىن اسىنار ما ەكەن؟ ءاي، قايدا- ا- ا- ا- م، قازانعا تۇسكەن قويدىڭ باسىنا ورتاق بولىپ، ەتتى بولە جەگەندەرىن جاسىرار ما ەكەن؟ الدە «ءسىزدىڭ جەگەنىڭىز - ءبىزدىڭ جەگەنىمىز» دەپ باس ۇرار ما ەكەن؟ !.
نۇربيكە قازي قىزى،
قىزىقوردانىڭ قىزىق قىزى
«ايقىن»
