تەمىرگە قۇشتار تەمىربەك

استانا. قازاقپارات - نەگە ەكەنىن كىم ءبىلسىن، وسى اقسارى بالا تەمىر- تەرسەككە ءۇيىر بولدى. كەڭەس كەزىندە اۋىل اينالاسىندا بەيساۋات جاتقان تەمىر بولمايتىن، ءبارى دە مەتالل قالدىقتارى رەتىندە وتكىزىلىپ جيناستىرىلاتىن ەدى.

جامبىل وبلىسى، مەركى اۋدانىنداعى ءتاتتى اۋىلىندا دا تەمىر- تەرسەك جەتىپ- ارتىلاتىن. كىشكەنتاي تەمىربەكتىڭ اڭسارى وسى تەمىر ۇيمەگىنە اۋاتىن دا تۇراتىن. ءۇيدىڭ جەڭىل- جەلپى شارۋاسىن تىندىرا سالىپ، مەتالل قالدىقتارىنا تارتىپ وتىراتىن. ساباعىنان قالعان ەمەس، ءبىراق ءبىر مينۋت بوس ۋاقىتى بولا قالسا، تەمىر ۇيمەگىنە قاراي تارتىپ تۇراتىن- دى. قولىندا - ۆەلوسيپەدتىڭ امبەباپ كىلتى. كىلتتىڭ تورەسى ءوزى! بارلىق بولتتار مەن گايكالاردى بۇراي بەرەدى. كىشكەنتاي تەمىربەك مۇرنى پىشىلداپ، كولىكتەردىڭ سىنعان موتورىن، باسقا دا بولىكتەرىن اشىپ كورىپ، ىشىندەگى ءاربىر بىلىكتىڭ، تەمىردىڭ قالاي ورنالاسقانىن زەردەلەپ، قايتا قۇراستىرىپ، ءاي، ءبىر راحات كۇيگە ەنەتىن ەدى. اۋىلدا تەمىربەكتى ىزدەگەندەر بىردەن وسى ماڭايعا كەلەتىن. تەمىرگە قۇمار تەمىربەك بولاشاقتا ءوزىنىڭ وسى قۇشتارلىعى ماشىققا، ءتىپتى كاسىپقويلىققا ۇلاسارىن بولجاپ ءبىلدى دەيسىز بە؟

 دەگەنمەن تەمىرگە قۇمارلىق تەمىربەكتىڭ قانىندا بار ەدى. ناعاشى اتاسى جۇماسات اعاشتان ءتۇيىن تۇيگەن كىسى بولعان. ال ۇلكەن اكەسى ورمان وڭدەۋ شەبەرحاناسىندا تەمىر ۇستاسى بولىپ ىستەدى. ۇلكەندەردەن كورگەنىن تەمىربەك جادىنان شىعارعان ەمەس. ولاردىڭ قاسىندا ءجۇرىپ، ءار نارسەنى سۇراي بەرەتىن، العان جاۋابىنا قاناعاتتانباسا، قايتا سۇراۋدان دا قىسىلا قويمايتىن.

ات جالىن تارتىپ مىنگەن كەزدە، ءومىر جاس جىگىتتى ويعا- قىرعا سالىپ، ءبىراز سىناپ كوردى. الماتى بىردەن باۋىرىنا تارتا قويعان جوق. ءسۇت تاسيتىن كولىك تىزگىندەپ ءبىراز ءجۇردى. جۇرگىزۋشى بولىپ تا ءبىرشاما ۋاقىتىن سارپ ەتتى. كولىكتەن ءسال اقاۋ شىقسا ءوزى جوندەۋگە تالاپتانىپ، باياعى بالا كۇنىندەگىدەي قانى قىزىپ، بەل شەشە كىرىسىپ كەتەتىن. ونىڭ ۇستىنە، بىرگە جۇمىس ىستەيتىن ۆيتيا اعاي دا قايراپ- قايراپ قوياتىن. ادەتتە، كولىگى بۇزىلعانداردىڭ ءبارى ۆيتيا اعايدى توڭىرەكتەيدى. ونىڭ بىلمەيتىنى جوق. عۇمىر بويى تەمىردەن ءتۇيىن تۇيگەن ۆيتيا اعاي جالىققاننان با، الدە «جاستار ۇيرەنسىن» دەي مە، ۇساق- تۇيەك اقاۋلاردى تەمىربەكتەرگە سەنىپ تاپسىرا بەرەتىن. ءوزى سىرتتاي باقىلاپ، قاعىس كەتكەن تۇسىن كوزىمەن- اق اڭعارىپ، كەڭەسىن بەرىپ قاراپ تۇراتىن. ءسويتىپ ءجۇرىپ- اق تەمىربەك كوپ نارسەگە قانىعىپ قالدى. بۇل كولىك دەگەنىڭىز - قىزىققا تولى الەم ەكەن. كۇن سايىن ۇيرەنىپ، كۇن سايىن وزىنە جاڭالىق اشىپ، ءوسىپ وتىردى. ۆيتيا اعاي ءبىر كۇنى «موسكۆيچ» كولىگىن جوندەۋدى سەنىپ تاپسىردى. ىنتا- ىقىلاسىن سالا قيمىلداپ، كەڭەستىك ەسكى كولىكتى جورعالاتىپ جىبەرگەنىنە تەمىربەك ءوزى دە قاتتى ريزا بولدى.

سوسىن ول ءبىراز ۋاقىت قوسالقى بولشەكتەر ساتۋمەن اينالىستى. قاي كولىككە قانداي بولشەكتىڭ كەلەتىنىن ويشا پايىمداپ، قاجەتتىسىن تابا قويۋعا ادەتتەندى. اۋەلى ويمەن جۇمىس ىستەپ كورگەنى وزىنە كەيىن كوپ كومەكتەستى.

 ءبارىبىر تەمىربەك ءوزىن بوس، ەشتەڭە تىندىرىپ جۇرمەگەندەي كورەتىندى. ء«وزىمنىڭ كولىك جوندەيتىن ارنايى ورتالىعىم بولسا.. .» دەپ قيالعا دا بەرىلەتىن. قۇر قيالدىڭ جەمىس بەرمەيتىنىن دە بىرتە- بىرتە انىق تۇسىنە باستادى. اقىرى تاۋەكەلدىڭ جەل قايىعىنا ءمىنىپ، 2007 -جىلدىڭ قاراشا ايىندا الماتىداعى اتاقتى «Car City» امبەباپ ساۋدا كەشەنىندەگى كولىك جوندەۋ ورتالىعىنان بوكستى جالعا الدى. ءيا، بۇل شىنىندا دا ۇلكەن تاۋەكەل ەدى. وي جاقسى، ورىندالۋى قالاي بولار ەكەن؟ ءبىراق تەمىربەكتىڭ وزىنە سەنىمى زور ەدى. العاشقى تاپسىرىس تۇسكەندە ءبىرشاما تولقىعانىن وسى كۇنى سۇيىنىشپەن ەسكە الادى. باستاپقىدا «ورىننىڭ جال قۇنىن تولەي الماي قالامىن با؟ » دەگەن قاۋپى دە بولدى. بىرتە- بىرتە تەمىربەكتىڭ اينالاسىنا ادامدار ۇيىرىلە باستادى. كىسى اقىسىن جەمەيتىن، اۋزىنان شۇكىرى تۇسپەيتىن، نە نارسەنى دە ادال ىستەيتىن جىگىتتىڭ تۇراقتى كليەنتتەرى دە پايدا بولدى.

 قازىر تەمىربەكتىڭ بوكسىنىڭ الدى كولىكتەن بوسامايدى. تەلەفون سوعا قالساڭىز، ول قاي كۇنى قاي ساعاتتا كەلۋگە بولاتىنىن ناقتى ايتادى. بارعان ۋاقىتىڭىزدا بىردەن «ەمگە» كىرىسەدى. كومەكشىسى اسقات قامبايەۆ ەكەۋى تاڭ بوزىنان كەلىپ، ءتۇن كىرگەندە عانا ۇيگە قايتادى. ەكەۋىنىڭ التىن قولىنا كليەنتتەرىنىڭ ءبارى ريزا. ءتىپتى «Car City دىڭ» جۇمىسشىلارى بىرنەشە جىلدان بەرى اينالاداعى بوكستاردىڭ بارىندە دەرلىك كولىك جوندەۋشىلەر اۋىسقانىن، تەمىربەك پەن اسقاتتىڭ جانە تاعى ءبىر بوكستاعى ازاماتتاردىڭ عانا تۇراقتى شارۋا ىستەپ كەلە جاتقاندارىن ايتادى.

وسى كۇنى تەمىربەك بارلىق وتاندىق جانە شەتەلدىك كولىكتەردىڭ اقاۋىن جوندەۋگە ماشىقتانعان. بىرەۋلەر كولىكتىڭ موتورىن، ەندى بىرەۋلەر قورابىن جوندەتۋ ءۇشىن تەمىربەكتىڭ بوكسىنا اسىعادى. تۇراقتى كليەنتتەر ءۇشىن تەمىربەك - تيمۋر نەمەسە تاكە. ءبىراز جىلدان بەرى تيمۋردىڭ جۇمىس ورنىندا كوللەدج ستۋدەنتتەرى تاجىريبەدەن ءوتىپ ءجۇر. بىلگەنىن ۇيرەتۋدەن شىن شەبەر ەشقاشان جالىققان ەمەس.

- ماقساتىم - ەڭبەكتەگى تازالىق، ەشكىمدى الداماۋ. قولىمنان كەلمەيتىن ءىس بولسا، كەلۋشىگە بىردەن ەسكەرتەمىن. كولىكتى جوندەپ، يەسىنە قايتارعاندا ۇيالمايتىن بولسام، مەن ءۇشىن قۋانىش - سول، - دەيدى تەمىربەك سۋاتبەك ۇلى.

 ءبىر جىلدارى ءدال وسى ورتالىقتاردان قازاق شەبەرلەرىن سيرەك كورەتىن ەدىك. تەمىربەك سياقتى شىن كاسىپقوي جىگىتتەردىڭ تاباندى ەڭبەگىنىڭ ارقاسىندا قازىر «Car City» اينالاسىندا قازاق شەبەرلەرىنە سەنىم ۇلعايدى. كولىگىڭىزدىڭ عۇمىرىن ۇزارتىپ بەرىپ قانا قويماي، سىزبەن ەركىن اڭگىمە قۇرىپ، بىلمەگەنىڭىزدى ۇيرەتىپ جىبەرۋگە ولار اركەز پەيىلدى.

ەڭبەگىڭ جانسىن، تەمىرگە قۇشتار تەمىربەك!

 

ەسەي جەڭىس ۇلى

«ايقىن»