ءۇندى عالىمدارى قازاق عالىمدارىنىڭ ماقالاسىن ۇرلاپ باستى

استانا. قازاقپارات - 2015 -جىلدىڭ جەلتوقسانىندا انتاليادا وتكەن «Computer، Control and Communication Technologies» ەكىنشى حالىقارالىق كونفەرەنسياسىنا ەلىمىزدەگى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «ينفورماتيكا جانە اقپاراتتىق قاۋىپسىزدىك» كافەدراسىنىڭ عالىمدارى قاتىسىپ، ناتيجەسىندە «Ontological Model of Educational Programs in Computer Science (Bachelor and Master Degrees)» ماقالاسى «International Journal of Computing, Communication and Instrumentation Engineering» باسىلىمىنىڭ 2-سانىندا جارىق كورگەن بولاتىن.

كوپ ۇزاماي ماقالا اۆتورلارىنىڭ ءبىرى ت. ع. ك. گ. ت. بەكمانوۆا ءوز عىلىمي ەڭبەكتەرىنىڭ ءتىزىمىن جاڭارتىپ وتىرىپ، بۇل ماقالانىڭ باسقا ادامداردىڭ، اتاپ ايتقاندا ءۇندى عالىمدارىنىڭ اۆتورلىعىمەن ينتەرنەتتە تۇرعانىن بايقاپ قالعان. بەلگىلى بولعانى، Priti S. Patel جانە پروفەسسور S. G. Desai ماقالانىڭ ءبىر دە ءبىر ءسوزىن وزگەرتپەي، اۆتورلاردىڭ ورنىنا ءوز اتى- جوندەرىن جازىپ قويىپتى.

 

زەرتتەي كەلە، ۇرلىق ماقالانىڭ «National Conference on ICT» كونفەرەنسياسىنىڭ جيناعىندا 2016 -جىلدىڭ قاڭتار ايىندا جاريالانعانى انىقتالدى (https://issuu.com/ijsrd/docs/ncictp002 ).

 

ماقالا اۆتورلارى اتالمىش كونفەرەنسيا ۇيىمداستىرۋشىلارىنا شاعىم حات جازعانىن، ال ولار ازىرگە ءمان- جايدى انىقتاۋعا ۋادە ەتىپ جاۋاپ قايتارعانىن ايتىپ وتىر.

«بۇل ماقالا كافەدرا وقىتۋشىلارىنىڭ حالىقارالىق Tempus Promis جوباسى اياسىندا «ينفورماتيكا» ءبىلىم باعدارلاماسىنىڭ ونتولوگيالىق مودەلىنە قاتىستى جازىلعان ۇجىمدىق ءتول ەڭبەگى»، - دەيدى ت. ع. د. , پروفەسسور التىنبەك ءشارىپباي.

رەداكسيامىز بۇل ماسەلە تۋرالى الداعى ۋاقىتتا تولىعىراق جازاتىن بولادى دەپ حابارلادى Munara.kz.