بريتان ينجەنەرلەرى درون «اۋلايتىن» قارۋ جاساپ شىقتى

استانا. قازاقپارات - بريتاندىق كومپانيا زاڭ بۇزعان درونداردى (ۇشقىشسىز ۇشاتىن اپاراتتار) اۋلايتىن پنيەۆما زەڭبىرەك جاساپ شىقتى.

 قۇرىلعى پاراشيۋتى بار اۋ اتادى جانە دروندى بۇلدىرمەي جەرگە تۇسىرەدى. 

شاعىن SkyWall 100 قارۋى گراناتا اتقىشقا ۇقسايدى، سالماعى 10 كەلى. ونىڭ زياتكەر نىساندى تانۋ جانە ۇستاۋ جۇيەسى نىساناعا دەيىنگى ارا قاشىقتىقتى جانە وعان وقتى جەتكىزۋ جىلدامدىعىن انىقتايدى، ءارى وپەراتورعا شۇرىپپە باسار ۇتىمدى ءساتتى ءوزى ۇسىنادى.

SkyWall 100 سىعىلعان اۋامەن اتىلادى، وعان ءتورت ءتۇرلى وق قولدانىلادى. وقۋ- جاتتىعۋعا ارنالعان، اۋى بارى، اۋمەنەن قاتار پاراشيۋتى بارى، سونداي- اق ەلەكتروماگنيتتى تولقىن جىبەرەتىن سناريادتارمەن اتىلادى. قارۋدى جاساۋشىلاردىڭ ايتۋىنا قاراعاندا، ول مينۋتىنا 7 رەت وقتالادى.

 وسىلايشا SkyWall 100 قارۋىنا بىرنەشە پيلوتسىز باسقارىلاتىن اپپاراتپەن كۇرەسۋگە مۇمكىنشىلىگى بار.

ونى جاساۋشىلار، قارۋ ەڭ الدىمەن پوليتسياعا كومەكتەسەدى دەپ وتىر. ويتكەنى ءتارتىپ ساقشىلارى دروندى جويماي «ۇستاۋىنا» ونىڭ تىركەۋ ءنومىرىن انىقتاۋىنا بولادى. قۇرىلعى ارمياعا، شەكاراشىلارعا، جەكە كۇزەت مەكەمەلەرىنە دە ارنالعان.

قازىرگى ۋاقىتتا قاشىقتان باسقارىلاتىن درونداردى ەسىرتكى ساتۋشىلار، ونەركاسىپتىك تىڭشىلار، اتاقتى ادامداردىڭ جەكە ومىرىنە قول سۇعۋشىلار، سونداي- اق لاڭكەستەر پايدالانۋدا.

درونداردىڭ ءتارتىپ بۇزۋىنا قارسى ءار مەملەكەت وزىنشە كۇرەسۋدە. ايتالىق، جاپونيادا وعان قارسى اۋمەن قارۋلانعان پيلوتسىز اپپارات جىبەرىلەدى، گوللانديادا ارنايى ۇيرەتىلگەن بۇركىتتەر قولدانىلادى، ال گەرمانيادا دروندارعا قارسى لازەرلەر پايدالانىلادى.