ۇيات - جالاڭاشتانۋدان ولەدى

استانا. قازاقپارات - سوڭعى كەزدە قىزداردى جۇرت الدىندا جالاڭاشتاپ «ارۋ» اتاندىرۋدىڭ اتى وزگەرە باستاپتى.

بۇرىنعى «ارۋلار بايقاۋى» تۋرالى نەبىر سىن جازىلىپ، ۇياتسىزدىقتى توقتاتۋ جايلى ايتىلماعان ءسوز قالماپ ەدى. «قۇرتتىڭ اتىن ول جاقتا مالتا قويىپتى» دەگەندەي، ەندىگى جەردە «قىزداردى جالاڭاشتاپ جارىستىرۋدىڭ» اتاۋىن باسقاشالاپ وتكىزۋ ايلاسى ويلاپ تابىلىپتى.

كۇنى كەشە الماتى وبلىسىنىڭ ەسىك قالاسىندا سونداي جارىس «بارىنەن دە سەن سۇلۋ» دەگەن اتاۋمەن ۇيىمداستىرىلدى. ۇيىمداستىرۋشىلاردىڭ تۇسىندىرۋىنشە بۇل ونەر سايىسى ەكەن.

ماقساتتارى: «قازاق ارۋلارىنىڭ سۇلۋلىعى مەن يناباتتىلىعىن پاش ەتىپ، ۇلتىمىزدىڭ سالت-ءداستۇرىن جاڭعىرتىپ، مادەني قۇندىلىقتارىمىزدى ارتتىرۋ» كورىنەدى.

ءبىراق، «باياعى جارتاس، سول جارتاس» قوي. ونەر سايىسى اتاۋىمەن سول بۇرىنعى جالاڭاشتانۋ جارىسى قايتالانىپ جاتىر. قىزداردى شەشىندىرىپ قويىپ «سۇلۋلىق ايقىنداۋ» مۇندا دا باستى تالاپ بولعان.

سوندا جوعارىداعى ماقسات قايدا قالدى؟ ساحناعا جارتىلاي جالاڭاش شىققان قازاق قىزدارى «يناباتتىلىق» كورسەتتى مە؟ ءدال وسىنداي «سايىس» ۇلتىمىزدىڭ سالت-ءداستۇرىن قالاي جاڭعىرتادى، مادەني قۇندىلىقتارىمىزدى قالاي ارتتىرادى؟ قىزداردىڭ كويلەكتەرىن ءوز قولدارىمەن تىگىپ، ماحامبەت باتىردىڭ جىرىن جاتقا ايتقانى جاقسى-اق.

الايدا، جۇرتتىڭ الدىندا جالاڭاش يىق پەن قارا ساندارىن جارقىلداتۋدان ەش قىمسىنباعان قىزداردىڭ بويىنا ۇياتسىزدىقتىڭ ءدانى وشپەستەي بولىپ ەگىلىپ جاتىر ەمەس پە؟

وسى تۇستا، ۇياتقا قاتىستى ماماندار باياعىدا دالەلدەپ شىقسا دا، جارياعا كوپ ۇسىنىلمايتىن مىنا مالىمەتتەردى تاعى ءبىر قايتالاۋدى ءجون كوردىك.

اقىل-ەسى ءبۇتىن تۋعان ءار ءسابيدىڭ بويىنا اللا تاعالا ۇياتتى قوسا دارىتادى. ماماندار دا دەنى ساۋ ادامنىڭ ءاۋ باستا ۇياتى تولىق بولاتىنىن عىلىمي-زەرتتەۋ ناتيجەسىندە انىقتاپ قويعان. ونى ادام ميىنداعى سانى 15 ميللياردتان اساتىن «نەيرون» كلەتكالارىنىڭ ەڭ نازىگى دەپ ەسەپتەيدى. وسى ەڭ نازىك ۇيات كلەتكالارى ەكى جاعدايدا ءبىرىنشى بولىپ تۇگى قالماي قىرىلىپ قالادى ەكەن. ءبىرى - الكوگولدى ىشىمدىكتى ىشكەن كەزدە، ەكىنشىسى - ۇيات سانالاتىن ىستەردى جۇرت الدىندا ۇيالماي جاساۋعا بالانى قارشادايىنان داعدىلاندىرۋدان باستاپ جويىلادى ەكەن.

قازاق قىزدارىنىڭ جالاڭاش سايىسى وتكەن سايىن بىزدەردىڭ ءۇنسىز قالا المايتىنىمىز سول عوي.

جالاڭاش تانۋمەن بىرگە قازاق ۇلتىنىڭ ۇياتى قوسا قىرىلىپ جاتىر، ءداتىمىز قالاي شىدايدى...

تولەگەن جاكىتاي ۇلى،

 Namys.kz