عالىمدار ۇلتتىق قۇندىلىقتار جويىلعان، ايەلدەردىڭ ءرولى ارتقان كەزدە قىزتەكەلەردىڭ كوبەيەتىنىن ايتادى

ءبىرجىنىستىلاردىڭ قۇقىعىن تاپتاماۋعا ارنالعان سەميناردا بولعان جۋرناليست وسىلاي دەپ دابىل قاقتى.

بۇل تۋرالى NUR. KZ ءتىلشىسى حابارلايدى.

«ەندى ول جەردە ءبىرجىنىستى ادامداردى سۇيىڭدەر، تۇسىنىڭدەر، ولار قايعىرىپ جۇرگەن ادامدار دەپ يتەرمەلەگەن جوق. تەك ورتامىزدا سونداي ادامدار بارى ءجيى ايتىلدى. ءبىراق، نەگە قازاق جۋرناليستەرىنىڭ اراسىندا؟ جەكە پىكىرىم، ەرتە مە، كەش پە قازاقستاندا ءبىرجىنىستىق قاتىناس تۋرالى، ولاردىڭ قۇقىعىن قورعاۋعا بايلانىستى زاڭدى كوتەرەتىن سەكىلدى. ول ىشتەن ەمەس، سىرتتاعى ادامداردىڭ ىقپالىمەن قوزعالادى دەپ ويلايمىن. وسى تاقىرىپتى قابىلداۋ ءۇشىن قازاق ءتىلدى جۋرناليستەردىڭ اراسىندا سەمينار وتكىزىلىپ جاتىر دەگەن پىكىردەمىن. وتكەن جىلى وسى زاڭدى رەسەيگە كوپ يتەرمەلەدى. ءبىراق، رەسەي ءوز كوزقاراسىن ناقتى كورسەتتى. ول ەلدە ول زاڭ پايداعا اسپاي قالعاسىن ءۇشىنشى كۇش سونى بىزگە اكەلىپ جاتقان سەكىلدى. سوعان قازاق ءتىلدى جۋرناليستەردى دايىنداپ جاتقان جوق پا؟»، - دەيدى جۋرناليست اقمارال مايكوزوۆا.

ورىس ءتىلدى رەسپۋبليكالىق باسىلىمدا جۇمىس جاسايتىن جۋرناليست قازاق ءتىلدى جۋرناليستەردىڭ ءبىرجىنىستىلار تاقىرىبىنان مۇلدە حابارسىز ەكەنىنە تاڭ قالعانىن ايتادى.

«قازاق ءتىلدى جۋرناليستەردىڭ ءبىرجىنىستىلار تۋرالى بىلمەيتىنىنە تاڭ قالدىم. ارينە، نە ءۇشىن ءبىلۋىمىز كەرەك ەكەن دەۋشىلەر تابىلارى انىق. ءبىراق جۋرناليست بولعان سوڭ، ءدىن تاقىرىبىنا، نەمەسە سەكتالار تاقىرىبىنا، سپورت، سوت، مەديتسينا تاقىرىبىنا ماتەريال ازىرلەيسىڭ. سپورت بولعان سوڭ كەم دەگەندە 10-15 سپورت تۇرىنەن، وندا كەزدەسەتىن ىشكى وزەكتى پروبلەمالارىمەن تانىس بولۋىڭ كەرەك. سوت تاقىرىبىنا اقپارات دايارلاساڭ دا، ەڭ قۇرىعىندا ۇكىمنىڭ شەشىمنەن، شەشىمنىڭ قاۋلىدان نە ايىرماشىلىعى بار ەكەنىن ءبىلۋىڭ قاجەت. ءبىرجىنىستى قاتىناستار تاقىرىبى دا سول سياقتى، گەيلەردى پەدوفيلدەردەن اجىراتپايتىن «ماماندار دا» جوق ەمەس جۋرناليستەر اراسىندا. سوندىقتان وي- ءورىستى كەڭەيتكەن ارتىق ەتپەيدى»، - دەدى جۋرناليست.

ول توقسانىنشى جىلداردى بۇزاقىلار جارنامالاعان سەكىلدى قازىر دە ءبىرجىنىستىلاردىڭ قاتارى ءورشىپ كەتۋى مۇمكىن دەگەن پىكىردە.

«ءبىر قىزىعى، جينالعانداردىڭ توقسان پايىزدان استامى بۇل تاقىرىپتان حابارسىز ەكەنىن كوردىم. «ازعىندار» دەپ جاتقاندار دا بولدى. «قىتايدان 25 جىلدىڭ ىشىندە نەبىر تاماقتار كەلىپ جاتىر، سول تاماقتى جەگەن قازاق وسىنداي قىزتەكە، ترانسگەندەر بولىپ كەتىپ جاتقان جوق پا» دەيدى. تاعى بىرەۋلەرى ولاردا ايەلدىڭ گورموندارى قاپتاپ كەتكەن، سودان دەگەن پىكىر ايتتى. ال سول سەمينارعا قاتىسقان ماماندار قازاق ءتىلدى جۋرناليستەرگە قىزتەكەلەردىڭ ءتۇرىن ايتقان كەزدە، ارىپتەستەرىم ۇستەلدىڭ استىنا كىرىپ كەتە جازدادى. تاڭ قالعانىم، قازاق ءتىلدى ارىپتەستەرىم بۇل تاقىرىپتى قابىلداي العان جوق. «ولاردى نە ءۇشىن ايتۋ كەرەك؟» «ءبىزدىڭ ايتقانىمىز ولار ءۇشىن جارناما» دەگەن پىكىرلەر ايتتى. ايتقان سوزدەرىنىڭ جانى بار، كەزىندە «بۋمەر» كينوفيلمى شىققان كەزدە كوپ ساراپشىلار بۇزاقىلارعا جاسالىپ جاتقان جارناما دەدى. كينونىڭ «چەرنىي بۋمەر» دەپ كوپشىلىكتى قيالداتىپ جىبەرگەنىن بىلەمىز»، - دەيدى جۋرناليست.

ب ا ق وكىلى ەركەكشورالار مەن قىزتەكەلەردىڭ قاي زاماندا دا بولعانىن، تەك ونى ءورشىتىپ الماۋ كەرەكتىگىن ايتادى.

«ءسوزدىڭ شىنى كەرەك ونداي ادامدار قازىر دە بار، بۇرىن دا بولعان. قازاق «ەركەكشورا»، «قىزتەكە» دەگەن سوزدەردى بەكەردەن ايتپاعان. وسى تاقىرىپتاعى ىزدەنىستەرى بار عالىمداردىڭ پايىمداۋىنشا، ونداي جاعداي وتباسىندا قالىپتاسادى. ول ءۇشىن ايەل - ايەل بولىپ، ەر ادام - ەركەك بولىپ قالۋ كەرەك. «ەركەك ايەلگە قاراپ بوي تۇزەيدى» دەيدى قازاق، ونىڭ بار بولمىسى، ويى - ايەلدى قالاي باقىتتى ەتسەم عانا. ەركەكتى سىيلاماساق، كىمگە رەنجيمىز؟ ! ءبىز وتكەن داعدارىستان ساباق الۋىمىز كەرەك. ءقازىر اجە مەن اتا ينستيتۋتىن جويىپ جىبەردىك. قازاقتا ەركەكتى ەركەك قىلاتىن ايەل دەيدى، ودان ارتىق نە كەرەك؟!»، - دەيدى اقمارال مايكوزيەۆا.

قيىن قىستاۋ زاماندا ۇلتتىق قۇندىلىق ساقتالۋ كەرەك. ەگەر ايەل ادام ەر ادام ورنىندا بولسا، بالالارعا ونى كورسەتۋگە بولمايتىنىن ايتقان جۋرناليست بۇگىنگى داعدارىستىڭ دا جەتكىنشەكتەردىڭ پسيحولوگياسىن بۇزۋى مۇمكىن دەگەندى ايتادى.

«ءبىر جىنىستىلاردىڭ سانى ازايىپ، كوبەيىپ وتىرادى. ونى عالىمدار ۇلتتىق قۇندىلىقتار جويىلعان كەزدە، ايەلدەردىڭ ءرولى ارتقان كەزدە قىزتەكەلەردىڭ كوبەيەتىنىن ايتادى. قىز اكەسىن، ۇل اناسىن جاقسى كورۋ كەرەك. شەشەسىن جاقسى كورەتىن ەر بالا اناسىنا كورسەتكەن ەركەلىكتى ايەلىنە دە كورسەتەدى. شەشەسىن قورعاعان سەكىلدى ايەلىن دە قورعاي الاتىن بولادى. "پاپاسىنىڭ قىزى" دەگەن اكەسىنىڭ مەيىرىمىن كورىپ وسكەن قىز. اكەسى قورعاشتاپ وسكەن قىز بالا وزىنە دە سونداي قورعان بولاتىن ادام ىزدەيدى. وتباسىندا تەپە تەڭدىك ساقتالۋ كەرەك. توقسانىنشى جىلداردا ايەلدەر الادوربا ارقالاپ، بازار جاعالاپ كەتتى. بالامەن اينالىسقان جوق. كۇيزەلىسكە ۇشىراعان ەر ادامدار پەش تۇبىندە جاتىپ قالدى. ءبىز قازىر تاعى دا سونداي داعدارىستا تۇرمىز. قازىر ءبىز سول قاتەلىكتەردى تاعى دا قايتالاۋىمىز مۇمكىن. قازىر ايەلدەر بىرنەشە جۇمىستىڭ باسىن ۇستاپ ءجۇر، ياعني بالاعا قاراي المايدى. ەركەكتەر قىسقارتۋعا ۇشىراپ جاتىر. اۋىتقۋلار وسىنداي كەزدە ورىن الۋى مۇمكىن. ءبىز قاي زاماندا دا بالا تاربيەسى مەن ءوز قۇندىلىقتارىمىزدى جوعالتپاۋىمىز كەرەك»، - دەيدى جۋرناليست.

دەرەككوز: Nur.kz