اقتوبە فۋتبول كلۋبىنىڭ باسشىسى د. ۆاسيليەۆ شىلدەگە دەيىن قازاقشا سايراۋدى ۇيرەنبەك
بۇل جايىندا ءوزىنىڭ Facebook پاراقشاسىندا مەرەي قۇپجان مالىمدەدى. ونىڭ ايتۋىنشا، ولاردىڭ ماقساتى - شىلدەگە دەيىن قازاق تىلىندە ەركىن سويلەۋ، دەپ حابارلادى كەرەك- ينفو.
«اقتوبە» ف ك باس ديرەكتورى دميتري ۆاسيليەۆ بۇگىننەن باستاپ قازاق تىلىنەن ساباق الا باستادى. ۇستازى - مىنا مەن! ۋاقىتىنىڭ تىعىزدىعىنا قاراماستان، مەملەكەتتىك ءتىلدى ۇيرەنۋگە بەل شەشە كىرىسكەن ول ەكى ساعاتتىق ءبىرىنشى دارىستەن تاماشا كورسەتكىش كورسەتۋدە. وعان ديماش دەگەن قازاقشا ات قويىپ تا ۇلگەردىم. ماقسات - شىلدەگە دەيىن ونى قازاقشا سايراتۋ. ساتتىلىك ساعان، ديماش!»، - دەيدى مەرەي قۇپجان.
ەسكە سالا كەتەيىك، ۆاسيليەۆ «اقتوبەنىڭ» باس ديرەكتورى بولىپ وتكەن جىلدىڭ جەلتوقسان ايىندا تاعايىندالدى. ونىڭ الدىندا مىناداي ماقساتتار تۇر: ول فۋتبول ورتالىعىنىڭ جۇمىسىن ءتيىستى دارەجەدە ۇيىمداستىرا وتىرىپ، كلۋبقا اقشا تۇسىرەتىن قوسىمشا پايدا كوزدەرىن تابۋى، سونىمەن قاتار جانكۇيەرلەرمەن جۇمىستى جانداندىرۋى ءتيىس. بۇنىڭ الدىندا ول قازاقستان فۋتبول فەدەراتسياسىنىڭ باس مەنەدجەرى قىزمەتىندە ءجۇردى.
