حوككەي: «بارىس» ريگادا «دينامو» كومانداسىن تىزە بۇكتىردى
چەمپيونات. كوم سايتىنان الىنعان مالىمەتكە قاراعاندا، تارتىستى وتكەن كەزدەسۋدە نايدجەل دوۋس ەسەپ اشسا، ريگالىق كاسپارس ساۋليەتيس تارازى باسىن تەڭەستىردى. ويىننىڭ ەكىنشى كەزەڭى دە 1:1 ەسەبىمەن اياقتالدى. بۇل جولى «بارىستان» داستين بويد، «دينامودان» گينتس مەيا كوزگە ءتۇستى. ءۇشىنشى كەزەڭدە «بارىستىڭ» كاپيتانى برەندون بوچەنسكي جەڭىس گولىن سوعىپ، استانالىقتار ماڭىزدى ءۇش ۇپايعا يە بولدى.
بۇل تۋردا «بارىستىڭ» نەگىزگى قارسىلاستارى دا جەڭىسكە جەتتى. «اۆتوموبيليست» ماسكەۋدە «سپارتاكتى» 4:2 ەسەبىمەن قاپى قالدىرسا، «نەفتەحيميك» (نيجنەكامسك) ءوز ايدىنىندا مينسكىنىڭ «ديناموسىن» وۆەرتايمدا (3:2) ۇتىپ، ەكى ۇپايعا قول جەتكىزدى. 58 ويىننان كەيىن «اۆتوموبيليست» 88 ۇپايمەن شىعىس كونفەرەنتسياسىندا جەتىنشى ورىنعا نىق ورنىقتى. ال 83 ۇپايى بار «بارىس» «نەفتەحيميكپەن» سەگىزىنشى، توعىزىنشى ورىندى بولىسۋدە. ەندى «بارىستىڭ» تۇراقتى چەمپيوناتتا ەكى-اق ويىنى قالدى. 16- اقپاندا قازاندا «ا ك بارس»، 18- اقپاندا ومبىدا «اۆانگاردپەن» كۇش سىناسادى. بۇلاردىڭ ەكەۋى دە مىقتى كوماندا ەكەندىگىن ەسكەرسەك، «بارىستىڭ» پلەي-وفف باسەكەلەرىنە قاتىسۋعا مۇمكىندىك بەرەتىن العاشقى سەگىزدىككە ىلىگۋى اسا قيىنعا تۇسەدى. ايتا كەتەيىك، نەگىزگى قارسىلاسى «نەفتەحيميك» 16- اقپاندا تولياتتيدە «لادامەن»، ودان كەيىن 18- اقپاندا ءوز ايدىنىندا «سالاۆات يۋلايەۆ» (ۋ ف ا) كومانداسىمەن شەبەرلىك بايقاسادى.
اۆتور: ەلجان ەرالى
