شەتىنەپ كەتكەن ۇلىنىڭ جۇرەگىن دونورلىققا بەرگەن ايەل ونىڭ ءدۇرسىلىن ەستىدى

استانا. قازاقپارات - ا ق ش- تىڭ اريزونا شتاتىندا بولعان وسى ءبىر وقيعا ەشكىمدى بەي-جاي قالدىرمايدى.

ءسابيىنىڭ جۇرەگىن دونورلىققا بەرگەن ايەل ونىڭ ءدۇرسىلىن ەستىدى دەپ حابارلايدى 24.kz.

وقيعا 2013-جىلى بولعان. سول كەزدە كلارك اتتى ايەل 7 ايلىعىندا شەتىنەگەن ۇلى لۋكاستىڭ جۇرەگىن دونورلىققا بەرگەن. سويتسە، بۇل ورگاندى دارىگەرلەر ەستەر گونسالەستىڭ قىزى دجوردان درەيككە وپەراتسيا ارقىلى سالىپ بەرگەن ەكەن.

ال جۋىردا كلارك وسى قىزدى ىزدەپ تاۋىپ الىپ، ونىڭ كەۋدەسىندەگى ءوز ۇلىنىڭ جۇرەك ءدۇرسىلىن ستەتوسكوپپەن تىڭداپ كوردى. ءوز باقىتىنا ءوزى سەنبەگەن انا تەك «ءدۇرسىلى قانداي كۇشتى» دەپ ايتا بەردى.

ونىڭ ايتۋىنشا، كوزى تىرىسىندە لۋكاس تىنىمسىز، شيراق، كوپ قوزعالاتىن بولىپتى. جۇرەك ءدۇرسىلىنىڭ قاتتى بولۋى سودان بولسا كەرەك. ال كەزىندە جاس بالانىڭ جۇرەگىن قىزىنا سالاتىنى تۋرالى حاباردى ەستىگەندە دجورداننىڭ اناسى ءتۇنى بويى جىلاپ شىققان ەكەن.

سەبەبى ونىڭ ايتۋىنشا، «ءبىر جەردە انانىڭ بالاسىنان ايىرىلعانىن ويلاپ، كوڭىل-قوشى ءتۇسىپ، كوزىنەن ەرىكسىز جاس پارلاپتى».

18 ايلىعىندا جاسالعان جۇرەكتى ترانسپلانتتاۋ وپەراتسياسىنان كەيىن ءومىر ءسۇرىپ، 4 جاسقا كەلىپ قالعان قىزدى كورگەن لۋكاستىڭ اناسى ۇلىنىڭ جۇرەگى ءالى دە سوعىپ تۇرعانى ءۇشىن ءوزىن تەك باقىتتى سەزىنەتىندىگىن ايتا بەرەدى.