قىتايلىق كلۋبقا اۋىسپاعانى ءۇشىن ايەلى كۇيەۋىن تاستاپ كەتىپ قالدى

استانا. قازاقپارات - تۇرىكتىڭ «فەنەرباحچە» كلۋبىندا وينايتىن پورتۋگال جارتىلاي قورعاۋشىسى ناني كلۋبتان كەتكىسى كەلمەگەنى ءۇشىن ءوزىنىڭ ايەلىمەن ءدۇرداراز بولىپ، رەنجىسىپ قالدى.

بۇل تۋرالى Lenta.ru مالىمەتىنە سۇيەنگەن ras.kz حابارلادى.

پورتۋگالدىقتىڭ زايىبى دانيەلا مارتينش جۇبايىنا قىتايلىق كلۋبتاردىڭ بىرىنە اۋىسۋعا ۇسىنىس جاسايدى. اتالمىش كلۋب «فەنەرباحچەگە» ترانسفەر ءۇشىن 20 ميلليون ەۋرو تولەۋگە جانە ويىنشىعا جىلىنا 10 ميلليون ەۋرو تولەۋگە ءازىر ەكەنىن مالىمدەگەن.

ءبىراق ناني ماۋسىم اياقتالعانشا قازىر ويناپ جۇرگەن جاماعاتىنان كەتپەيتىنىن ايتقان. وسىدان كەيىن قاسارىسقان قىرسىق جۇبايىنا رەنجىگەن دانيەلا بالالارىن الىپ، پورتۋگالياعا كەتىپ قالادى.

ناني ءوزىنىڭ قازىرگى كلۋبىندا جىلىنا 5 ميلليون ەۋرو الىپ ءجۇر ەكەن.

بۇگىن، سونداي-اق قىتاي فۋتبول كلۋبتارىنىڭ ءبىرى «چەلسيدىڭ» قورعاۋشىسى دجون تەرريگە دە قىزىعۋشىلىق تانىتىپ وتىرعانى بەلگىلى بولدى. انگليا قۇراماسىنىڭ بۇرىنعى ويىنشىسىنا قىتايلىقتار ءبىر جىلعا 26 ميلليون ەۋرو بەرۋگە ۋادە ەتىپتى.

«فەنەرباحچە» قازىر تۇركيا چەمپيوناتىندا 19 ماتچتان كەيىن 46 ۇپايمەن تۋرنير كەستەسىندە توپ باستاپ كەلەدى. ناني وندا 16 ويىنعا قاتىسىپ، 6 گول سوققان جانە تاعى 4 گول پاسىن بەرگەن.