قانات يسلامعا «جاپا شەككەن قازاقتىڭ سيمۆولى» رەتىندە قاراۋدى قويۋ كەرەك

استانا. قازاقپارات - قانات يسلامنىڭ «سىرلاسۋىن» كورىپ شىقتىم. قاناتتى «استانادا» «سىرلاستى» دەپ اتىن دابىرايتپاساڭ، سونشالىقتى جاڭا ەشتەڭە ايتقان جوق.

جۋرناليستىڭ سۇراقتارى سول باياعى قاناتتى ۇلتشىلدىقتىڭ سيمۆولى رەتىندە ساناپ، قازاقتاردى بارىنەن قيىنشىلىق كورەتىن بايقۇس حالىق دەپ ەسەپتەيتىن تاپتاۋرىن جولدان اسىپ كەتە الماپتى، وكىنىشكە قاراي.

جو، بۇ جەردە قاناتتى ۇلتشىل ەمەس دەگىم كەلىپ تۇرعان جوق. البەتتە، ول - قازاق ەلىن جان- جۇرەگىمەن سۇيەتىن باتىر ۇل. قىتايدىڭ سالعان ينۆەستيتسياسى مەن ارتقان ۇمىتىنە قاراماستان، اتا جۇرتىم دەپ ەلگە ورالدى. (قىتايدا بوكسشىلار، اسىرەسە چەمپيوندار قاتتى قۇرمەتتەلەتىنىن قىتاي گرۋپپالاسىمنان ءبىلدىم جاقىندا. كورشى ەلدە زوۋ شيمينگ اجەپتەۋىر جۇلدىز كورىنەدى) . مۇنىڭ ءوزى ەرەن ەرلىك. ەكىنىڭ ءبىرى سونشالىقتى اتاق- داڭقتى تاستاپ، اتا جۇرتىنا ورالا بەرمەيدى. (كەرىسىنشە، سول اتاقتى ىزدەپ باسقا ەل ازاماتتىعىن الادى. مىسالى، پودوبەدوۆا، حرۋستاليەۆا دەپ ءتىزىمدى جالعاستىرۋعا بولادى) . ياعني، وسى تۇرعىدان العاندا قانات يسلام ناعىز پاتريوت! بۇل - انىق.

قانات يسلامنىڭ وليمپياداعا قازاقستان اتىنان قاتىسپاۋى دا ءبىراز تالقىلاندى عوي. وعان دا ءجيى- ءجيى ورالۋدىڭ قاجەتى شامالى. قاناتتىڭ لوندونعا بارا الماۋىنىڭ نەگىزگى سەبەبى - حالىقارالىق وليمپيادا كوميتەتىنىڭ 41 - ەرەجەسى. اتالعان ەرەجەگە سايكەس، ەكى ەلدىڭ ازاماتتىعى بار نەمەسە جاڭا ازاماتتىق العان سپورتشى بۇرىنعى ەلىنىڭ اتىنان حالىقارالىق دەڭگەيى بار جارىسقا قاتىسقانىنان كەيىن ءۇش جىل وتپەيىنشە، جاڭا ەلىنىڭ اتىنان وليمپيادالىق باسەكەدە باق سىناي المايدى. بۇل ۋاقىت ليميتى ەكى ەلدىڭ اراسىنداعى كەلىسىممەن نەمەسە ح و ك- تىڭ باسشىسى شەشىمىمەن ازايتىلۋى نە مۇلدەم الىنىپ تاستالۋى مۇمكىن. قانات يسلام مەن ءبىزدىڭ بوكس فەدەراتسياسى اراسىنداعى قارىم- قاتىناستىڭ قالاي بولعانىنان حابارسىزبىن. ماعان بەلگىلىسى - قاناتتىڭ قازاقستان اتىنان شىعۋىنا قارسى بولعان قىتاي.

ءبىزدىڭ كەي جۋرناليستەردە قازاقتى قازاقستانداعى باسقا ۇلتتان ءبولىپ قاراپ، قازاقتى بارىنەن جاپا شەگىپ وتىرعان ۇلت رەتىندە كورسەتۋ ءۇردىسى قاتتى بايقالادى. ۇلتشىلدارىمىز دا «قازاقتى قىرىپ ءبىتتى» دەپ قۇر ايقاي بەرۋدەن باسقا ەشتەڭە بىلمەيدى. وزدەرىنىڭ اسىرەلىكتەرىن كۇشتەيتۋ ءۇشىن الگى توپتىڭ وكىلدەرى قاناتتى تۋ قىلىپ ۇستاپ العان. ولاردىڭ بۇل ارەكەتى قاناتقا دا، قازاققا دا، قازاقستانعا دا پايدا بەرمەيدى. ("سىرلاسۋداعى" سۇحباتىندا قازاقستانداعى باسقا ۇلت تۋرالى جاقسى ايتقان قانات) .

ماسەلەنىڭ ءبارى «سىرلاسۋدان» باستالدى عوي. بۇعان دەيىن دە ايگەرىم سەيفوللانى مىقتى جۋرناليست دەپ ەسەپتەگەنمىن، ءالى دە ەسەپتەي بەرەمىن. ءبىراق ول كىسىگە سپورتشىلاردان سۇحبات العاندا، اسىرەسە قانات يسلام سەكىلدى تۇلعامەن سىرلاسقاندا جۋرناليستيكا سالاسىنا جاڭادان قوسىلعان تاجىريبەسىزدىڭ سۇراقتارىن قويماۋدى وتىنەر ەدىم. ءتىپتى، سپورتتان حابارى جوق بولعاننىڭ وزىندە سپورتتان حابارى بار جۋرناليسكە سۇراق دايىنداتىپ الۋعا بولاتىن ەدى. (مىسالى، Tabigatقا سۇراق دايىنداپ بەرشى دەسە، ءتۇبىن تۇسىرەتىن سۇراق ازىرلەپ بەرەتىن ەدى) .

 "سىرلاسۋمەن" توقتاماي، "جاستار ۇنىندەگى" سۇحباتىن دا وقىپ شىقتىم. الايدا ءوزىم بىلگىم كەلەتىن سۇراقتىڭ جاۋابىن الا العانىم جوق. مىسالى، ماعان امەريكادا كاسىپقوي بوكستىڭ قالاي ەكەنى، قالاي دامىعانى، ەلىمىزدە كاسىپقوي بوكستى قالاي دامىتۋعا بولاتىنى تۋرالى پىكىرلەر قىزىق ەدى. ەكى- ءۇش اي بۇرىن قانات يسلام ەل حەيمونمەن كەلىسىمشارتقا وتىرعان- تۇعىن. وسى كەلىسىمنىڭ بولاشاعى قانداي بولماق، الداعى ۋاقىتتا كىممەن جۇدىرىقتاسۋ جوسپاردا بار، الەم چەمپيونى اتاعىنا تالاسۋعا بيىل مۇمكىندىك بار ما دەگەن سەكىلدى سۇراقتارعا جاۋاپ العىم كەلەدى. وكىنىشكە قاراي، مۇنداي سۇراقتار جوعارىدا اتالعان سۇحباتتا قويىلعان جوق. كەرىسىنشە، نەگىزگى اكتسەنت "ۇلتشىل قاناتقا" قويىلدى. (اق جايىققا شىققان سۇحباتى الدەقايدا جاڭالىققا تولى، ايتپاقشى) .

قانات يسلام - ۇلتىن سۇيەتىن ازامات. حالقىنىڭ جاناشىرى. سونداي- اق، ول - الەۋەتتى بوكسشى. قاناتتى «قازاقتىڭ كورگەن قيىنشىلىعى" رەتىندە كورسەتە بەرۋدى قويۋ كەرەك. كەرىسىنشە، ونىڭ بوكسشىلىق قىرىنا تەرەڭىرەك ءمان بەرۋ كەرەك دەپ ويلايمىن. قانات يسلام كىم؟ ول - قازاق ەلىنىڭ باتىرى. تۋرا سەرىك ساپيەۆ، گەننادي گولوۆكين، ەرماحان ىبرايموۆ، بەكزات ساتتارحانوۆ، ۆاسيلي جيرۆ، باقتيار ارتايەۆ، يليا يلين سەكىلدى قازاق ەلىنىڭ باتىر ۇلى. ەندەشە، قاناتتى "جاپا كورگەن قازاقتىڭ سيمۆولى" رەتىندە كورسەتۋدى قويۋ كەرەك.

P. S. ايتپاقشى، قانات يسلامنىڭ سوزدەرىنەن تسيتاتا كەلتىرەتىن بولساڭىز، "سىرلاسۋدا" ول بىلاي دەپ ايتتى:

"- مەن الەمدىك دەڭگەيدە ەشكىم ەمەسپىن قازىر. كىممىن؟ امەريكا تانىمايدى مەنى. تەلەارنالاردان ەندى ۇسىنىستار ءتۇسىپ جاتىر.. . ادام جەتىستىككە جەتۋ ءۇشىن وزىنەن جوعارىعا قاراۋ كەرەك.. ." ءجاي، ءبىزدىڭ جاعدايىمىز باسقاعا قاراعاندا ءتاۋىر عوي دەيتىندەر ءۇشىن.

 

ابايۋس وتاريۋستىڭ «فەيسبۋكتەگى» پاراقشاسىنان الىندى

 «قامشى» سىلتەيدى