بۇعان دەيىن دەپۋتات اتانعان قازاقستاندىق جۇلدىزدار نە تىندىردى؟
وسى ورايدا «قازاق ءۇنى» پورتالىنىڭ جۋرناليسى انشىلەرىمىز جىلى جەر، جۇمساق ورىندىقتا وتىرىپ، قالتاسىن قالىڭداتۋدى كوزدەيدى مە دەگەن ساۋالعا جاۋاپ ىزدەدى.
«ولار وسى جيىندارعا قاتىسقاندارىنا تۋرا ءبىر ءماجىلىستىڭ تورىنە وتىرىپ ۇلگەرگەندەي ءماز-ءمايرام. ءبىر دە بىرەۋى «قوي، قايتەمىن دەپۋتاتتىقتى، مەنىڭ ومىردەگى ورنىم بيلىكتە ەمەس، ونەردە عوي» دەمەيدى. قايتا قايرات نۇرتاس پەن سەرىك ساپيەۆ سەكىلدى «سايلاسا ىستەيمىن، قولىمنان كەلەدى» دەپ قۇلشىنىپ وتىر. ءبىز دە ولاردىڭ «قولىنان كەلمەيدى» دەۋدەن اۋلاقپىز. كورە الماۋشىلىق تۋرالى، ءتىپتى ءسوز جوق. دەگەنمەن، ناپولەونداي قارادان شىعىپ حان بولعان جاننىڭ: «ادامزات بالاسىنا كەلەتىن بالەنىڭ ءبارى ءار ادامنىڭ ءوز ورنىن تاۋىپ وتىرماۋىنان باستالادى» دەگەن دانىشپاندىق ءسوزىن ۇمىتپاعانىمىز ءجون بولار»، - دەپ جازادى جۋرناليست ءومىرزاق اقجىگىت.
اۆتوردىڭ ويىنشا، پارلامەنتكە بارعان ونەرپازدارىمىز اقىرى ونەرىن وشىرەدى.
«ءبىر ءسات وتكەنىمىزگە كوز سالايىقشى. پارلامەنتكە بارعان قاي ونەرپازدىڭ اتى شىقتى؟ ەشقايسىسىنىڭ! قايتا ونەرى ءوشتى. مارقۇم قۇدايبەرگەن سۇلتانبايەۆ باقانداي 5 جىل وتىردى. سول 5 جىلدا ءشوپتى باسىندىرعان جوق. بار بىتىرگەنى - ەلدىڭ ەسىندە قالعان «مۇنداعىلاردىڭ ءبارى دە ءارتىس ەكەن، تەك كاسىپقويى - مەن عانامىن» دەگەن جالعىز اۋىز ءسوزى»، - دەپ جالعاستىردى جۋرناليست.
اقجىگىت، ءتىپتى نۇرلان ونەربايەۆتىڭ دا تىندىرعان شارۋاسى شامالى بولعانىنا سەنىمدى.
«نۇرلان ونەربايەۆتىڭ قوڭىر داۋسى قانداي ەدى! ءتۇر دەسەڭ ءتۇر بار، بوي دەسەڭ بوي بار، ناعىز بۇگىنگى كۇننىڭ سال-سەرىسى دەۋگە لايىق. نە تىندىردى؟ تۇك تە! ەسەسىنە قازاق كەرەمەت ءبىر ءانشىسىن جوعالتتى»، - دەپ جازدى ول.
اۆتور پارلامەنت تورىنەن ءبىر-اق شىققان بەكبولات تىلەۋحان دا ۇتىلىپ قالعانىن العا تارتتى.
«نۇر وتاننىڭ» قۇرىلتايىندا پارتيا قاتارىنا كىرۋگە تىلەك بىلدىرگەن، سول ەڭبەگى بيلىك تاراپىنان «لايىقتى باعاسىن» الىپ، پارلامەنت تورىنەن ءبىر-اق شىققان بەكبولات تىلەۋحان باۋىرىمىز شە؟! «وبالى نە كەرەك، حالىق ءۇشىن ايانعان جوق، قانشاما ۇسىنىس ايتتى، تەك جوعارعى جاقتان قولداۋ تاپپادى عوي» دەگىزىپ، جۇرت جادىندا قالا الدى ما؟ جاۋابى بارىڭىزگە بەلگىلى. ەسەسىنە ۇتىلعان الدىمەن بەكبولاتتىڭ ءوزى، ودان دا بۇرىن - قازاق حالقى. ءبىر عانا اقتامبەردى جىراۋدىڭ تولعاۋىمەن قازاقتىڭ رۋحىن ءدۇر كوتەرگەن ءانشى تاپقان سول ءوز جولىمەن، وزىنە عانا ءتان سۇرلەۋىمەن دامي بەرگەندە قانشاما قۇندى دۇنيە ومىرگە كەلۋى مۇمكىن ەدى عوي»، - دەپ وكىنىشىن ءبىلدىردى اۆتور.
جۋرناليست ونەر ادامدارىنىڭ اراسىندا فاريزا وڭعارسىنوۆانى دا ءسوز ەتتى.
«ءبىر ءوزى ءبىر توبە مارقۇم فاريزا اپامىز شە؟ «بۇل عيماراتتا ەلدىڭ، جەردىڭ قامى اڭگىمە بولمايدى ەكەن» دەگەن ءسوزى عانا تاريحتا تاڭبالاندى. ءىسى شە؟ ءىسى - «جەردى ساتۋ - اناڭدى ساتۋ!» دەپ، ەلگە ۇندەۋ جازعان، ارتىنان وزىنە ءوزى قارسى شىققان شەرحان اعامىزبەن قوسىلىپ «ساتىلعانىن قولدايمىن» دەپ قولىن كوتەرگەنى عانا»، - دەپ جالعاستىردى ول.
اۆتوردىڭ پىكىرىنشە، ونەر ادامىنىڭ تابيعاتى مەن بيلىك ادامىنىڭ تابيعاتى ءبىر-بىرىنە كەرەعار.
«وسى جوعارىدا اتتارى اتالعان پارلامەنتارييلەردىڭ ءبارى جابىلىپ، كوشى-قون تۋرالى العاشقى زاڭدى قازاق تىلىندە جازىپ شىققان مۇعالىم، اۋداندىق ءبىلىم ءبولىمىن باسقارعان اكىم ىسقاق جۇمىس ىستەي المادى. نەگە؟ سەبەبى، ونەر ادامىنىڭ تابيعاتى مەن بيلىك ادامىنىڭ تابيعاتى ءبىر-بىرىنە كەرەعار بولىپ جاراتىلادى.
سونى بىلگەن اتاتۇرىك «ءبىزدىڭ كەز-كەلگەنىمىز مينيستر، ءتىپتى پرەمەر-مينيستر بولا الۋىمىز مۇمكىن، ءبىراق، كەز-كەلگەنىمىز ونەر ادامى بولا المايمىز! سوندىقتان ولار ءبىزدىڭ ەمەس، ءبىز ونەر ادامىنىڭ قولىن ءسۇيۋىمىز كەرەك» دەگەن ەدى»، - دەپ جازدى اۆتور.
جۋرناليست جاراتۋشى دارىندى ەلى كورسىن دەپ بەرەتىنىن العا تارتتى.
«سەن قۇدايدان قورقاتىن جان بولساڭ، تالانتىڭدى بارىنشا ۇشتاي تۇسۋگە، ونى مۇمكىندىگىنشە حالقىڭا مولىنان بەرۋگە مىندەتتىسىڭ! دارىنىڭدى، تالانتىڭدى، ءتىپتى قابىلەتىڭدى جارىققا شىعارماساڭ، ونى ورنىمەن جۇمساماساڭ نەمەسە جەكە باسىڭنىڭ مانسابىنا، پايداسىنا ايىرباستاپ جىبەرسەڭ، ەرتەڭ اللانىڭ الدىندا جاۋابىن بەرەسىڭ!»، - دەپ جالعاستىردى ول.
اۆتور انشىلەرىمىز دە جىلى جەر، جۇمساق ورىندىقتا وتىرۋدى اڭساپ ءجۇر مە دەگەن ساۋال تاستادى.
«ءبىراق، بىزدە قۇدايدان قورقاتىن جان قالدى ما بۇگىن؟ ەندەشە، انشىلەرىمىز دە «كونسەرت قوياتىن ەدىم، ديسك جازدىراتىن ەدىم» دەپ ميىن اشىتپاي، جىلى جەر، جۇمساق ورىندىقتا وتىرىپ، قولداعى بيلىكتىڭ ارقاسىندا ءبىز دە وزگەلەر سەكىلدى يميتاتسيا جاسايىق، ءسوز جۇزىندە ەلدىڭ قامىن ويلاعان بولىپ، ءىس جۇزىندە بايلىقتىڭ ءبىر شەتىنەن ءبىز دە اسايىق دەيتىن شىعار. پرەزيدەنتىمىز «يميتاتسياعا جول جوق» دەسە دە، ءبارىبىر ول بالەنىڭ ازاياتىن ءتۇرى جوق، بەس- التاۋىمىز پارلامەنتكە بارعاننان ەشنارسە ويىلىپ، وپىرىلىپ قالماس دەيتىن شىعار، كىم بىلەدى...»، - دەپ ءتۇيدى ول.
Nur.kz
